قصيده ام لأبنها العاق

بشير المحمدي · #1 01-04-2011, 11:28 PM

قصيده أم في ابنها العاق بعدما رماها في دار المسنين بطلب من زوجته

الأم ماتت والقصيده سلمها الدكتور للولد وهو يستلم الجثه ....

يامسندي قلبي على الدوم يطريك ..
ماغبت عن عيني وطيفك سمايا ..

هذي ثلاث سنين والعين تبكيك ..
ماشفت زولك زايراً يا ضنايا ..

تذكر حياتي يوم أشيلك وأداريك ..
وألاعبك دايم وتمشي ورايا ..

وترقد على صوتي وحضني يدفيك ..
ماغيرك أحدً ساكنن في حشايا ..

وليا مرضت أسهر بقربك واداريك ..
ماذوق طعم النوم صبح ومسايا ..

ياما عطيتك من حناني وابعطيك ..
تكبر وتكبر بالأمل يامنايا ..

لكن خساره بعتني ليش وشفيك ..
وأخلصت للزوجه وانا لي شقايا ..

أنا ادري أنها قاسيه ماتخليك ..
قالت عجوزك ما أبيها معايا ..

خليتني وسط المصحه وانا أرجيك ..
هذا جزا المعروف وهذا جزايا ..

ياليتني خدامه بين أياديك ..
من شان أشوفك كل يوم برضايا ..

مشكور ياوليدي وتشكر مساعيك ..
وأدعي لكم دايم بدرب الهدايا ..

حمدان يا حمدان أمك توصيك ..
أخاف ماتلحق تشوف الوصايا ..

أوصيت دكتور المصحه بيعطيك ..
رسالتي وحروفها من بكايا ..

وأن مت لاتبخل عليه بدعاويك ..
أطلب لي الغفران وهذا رجايا ..

وأمطر تراب القبر بدموع عينيك ..
ماعاد ينفعك الندم والنعايا ..

يارب اسألك رضى الوالدين ((وقل ربي إرحمهما كما ربياني صغيرا ))
منقول