الربيع دائم تتفتح فيه زهور عمرنا وهم أطفالنا " فن التعامل مع الأبناء "

[amaninona]

الحمد لله رب العالمين

الحمد لله رب المشارق والمغارب

خلق الإنسان من طين لازب

ثم جعله نطفة بين الصلب والترائب

خلق منه زوجه وجعل منهما الأبناء والأقارب

نحمده تبارك وتعالى حمد الطامع فى المزيد والطالب

ونعوذ بنور وجهه الكريم من شر العواقب

وأشهد أن لا اله إلا الله القوى الغالب

شهادة متيقن بأن الوحدانية لله أمر لازم لازب

وأشهد أن سيدنا محمد عبد الله ورسول الملك الواهب

ما من عاقل إلا وعلم أن الإيمان به حق وواجب

يا رب صل على الحبيب المصطفى أهل الفضائل والمواهب

وعلى الصحب و الآل ومن تبع عدد ما فى الكون من عجائب وغرائب

أما بعد ....،،،،

" رب اشرح لى صدرى ويسر لى أمرى وأحلل عقدة من لسانى يفقهوا قولى "

"وما توفيقى إلا بالله عليه توكلت وإليه أنيب "

أطفالنا هم فلذات أكبادنا .. وهم هبة من الله عز وجل ونعمة من المنعم الوهاب ..

كثير منا حرم نعمة الرزق بالأولاد وذلك لحكمة خفية يعلمها" العليم " "الخبير" بعباده... ونغفلها نحن ذوى الألباب لقصر نظرتنا . فلله الأمر والتدبير ونحن علينا الرضا والتسليم والإستسلام لقضاء الله وقدره .ومن هنا كان علينا شكر النعمة التى أنعم الله بها علينا وحرم منها غيرنا .

ولأن أولادنا هم أمانة فى أعناقنا ونحن مسئولون عنهم... كما أرشدنا الحبيب المصطفى صلوات الله عليه وسلامه:
" كلكم راع وكلكم مسئول عن رعيته"... وكما قال عليه الصلاة والسلام : " إن الله سائل كل راع عما إسترعاه حفظ أم ضيع "
فمن حقهم علينا أن نكرمهم ونحسن تربيتهم ... " أكرموا أولادكم وأحسنوا أسماءهم ".

واليوم ونحن فى هذه الأيام تقابلنا مشاكل عديدة فى تربية أبنائنا وكيفية التعامل معهم ..

وبنبقى متلغبطين ومش عارفين .. العيب فين ؟ فيهم.. ولا فينا.. ولا فى أيامهم اللى أكيد إختلفت عن أيامنا ...

ولا فى قيمنا اللى بنعلمها لهم وبيتصدموا بعكسها تماما أول ما يواجهوا بداياتهم فى التعامل مع الحياة والمجتمع المحيط بهم من أول يوم فى المدرسة ..

ولا فى قلة صبرنا ..

ولا.. ولا .. ولا .. أسئلة كثيرة تايهة جوانا مش لاقين إجابة تريحنا ؟

وبتبدأ معركة بين الأم والطفل :

تبدأ المعركة بتصادم من الأم مع الطفل .. هو يقول : إنتى مش فاهمانى ؟ أنا ما عملتش حاجة غلط ؟ إنتى ليه بتزعقى؟

والأم تقول : أنا تعبت وما فيش فيك فايدة تربيتى ليك ضاعت وإنت مش بتسمع الكلام ؟

ويبدأ الصراخ وتعلو الصيحات من كلا الطرفين ولا أحد يسمع الآخر... وتقع الأم فى المحظور بأن يواجهها طفلها بأول إتهام ويكون محقا فيقول : إنتى بتزعقى ليه طيب إسمعينى الأول قبل ما تهاجمينى .. طيب إفهمينى !!!!

والأم مش سامعة غير صوتها .. ومش شايفة غير إبنها المذنب اللى ما نفذش أوامرها ... ويبدأ كل واحد يضرب رأسه فى الحيط .

وترى الأم نوع من التمرد والعناد وتصل فى النهاية إلى طريق مسدود لا عارفة تكمل المشوار ولا عارفة ترجع تانى
لبداية السكة اللى مشت فيها..

وتبدأ الأم فى الإنهيار .. وتمتلكها العبرات ويختنق صوتها داخل الحنجرة ويخرج متقطعا وهى فى أضعف حالاتها ..
حرام عليكوا .. ما حدش حاسس بيا . مش كفاية الضغوط اللى أنا فيها واللى متحملاه علشانكم ..و...و..و..و...
مع العلم إنها عارفة من جواها إن إبنها ما لهوش ذنب وما لهوش أى علاقة باللى هى فيه غير إنه المتنفس الوحيد اللى بتفجر فيه كبتها ومشاعرها المضغوطة.

وتبدأ سلسلة من الإحباطات تحوط على رقبة الأم وتتلف حواليها تخنقها وتحس إن كل مجهودها فى تربيتها راح هباء ... وتبدأ تسقط ما تعانيه من مشاعر سلبية على الطفل المسكين اللى تايه ومش عارف يسمع مين ؟ ولا يكلم مين ؟

وفى الحالة دى الأم برضوا مسكينة.. مش عارفة هى صح.. ولا غلط... ولا الزمن غلط !!!!! وكل ما تزعق ولا تزعل إبنها ضميرها يأنبها فتعيش حالة أسوأ من الحالة اللى هى عليها ..

وتبدأ تستغفر ربنا وتلجأ له .. تناجيه : يا رب ما ليش غيرك يا رب فرج همى وكربى وإهدى لى نفسى وإهدى أولادى ..
وتبدأ تسمع فى أذنيها كلام سيد الخلق الرءوف الرحيم ..

" من لا يرحم لا يرحم "

وتستحضر رحمة ربنا سبحانه وتعالى اللى أرحم بينا من أنفسنا حين يقول عز من قائل للملائكة :

" دعوهم لو خلقتموهم لرحمتموهم " .

ودلوقت .. إيه الحل ؟؟؟

لازم الأم تتنبه لنقطة مهمة جدا .. وتقتنع بها تماما رضت أم أبت .. إن الزمن بيتغير من حواليها ..و إن عمر إبنها ما حيكون صورة طبق الأصل منها ... وإن طموحاتها بالنسبة له وما تريده منه من إنجازات تختلف تماما عما يهواه ويتمناه .
فلا بد من مساحة يعبرفيها عن نفسه دون تسلط من الأم والحجر علي أفكاره وقتلها قبل ما تتولد . وما تحولش طفلها لطير بلا عش و فى نفس الوقت مكبل بأمانيها التى تخشى ضياعها ..

وهنا تستوقفنى المقولة الشهيرة الرائعة لسيدنا على بن أبى طالب ـ كرم الله وجهه ـ :

"علموا أولادكم على غير شاكلتكم فإنهم مخلوقون لزمان غير زمانكم "..

ومنذ عدة أيام توقفت كثيرا عند هذة الكلمة وكاد يغلبنى البكاء وقلبى يذوب مع المغيب...
وكان الليل يظهر من بعيد كأنه حزن يطارد يوم عيد ..
وأتى يداعبنى : " رجعت تحزن من جديد "
فبقيت وحدى أنظر فى الطريق وخطواتى تسألتى : متى قلبى يفيق؟
هل أمضى فوق أمواج الحياة ؟ ولا أعرف أين المرسى وأين النجاه ؟..
ولكنى صرخت فى الصمت وقلت : سأوقد فى الليل نارا .
وقد خلقت بحلم كبير... وما زلت أعرف أين الأمانى.. وإن كان درب الأمانى طويل .
و إتخذت القرار بحتمية التغيير .. فما زال فى الصبح ضوء وفى الليل يضحك بدر جميل .

ولذلك حبيت كل الأمهات الحبيبات اللى عايشين معايا فى بيت واحد وهو منتدانا المبارك الذى هو ملاذى وسكنى وواحتى الغناء التى أهرب فيها من زحام الأيام وهمومها ... حبيت يشاركونى ونعيش مع بعض رحلة إلى واحة أطفالنا لنكتشف ما بداخلهم ونسعى لتحقيق الأفضل لهم ولنا من أجل حياة ترفرف عليها السعادة و ربيع دائم تتفتح فيه زهور عمرنا وهم أطفالنا اللى أشرقت على أيديهم أرواحنا ..

فأوصيكم وأوصى نفسى قبلكم ..

دعوا الزهور تتفتح .

حنبدأ الرحلة .... وأول خطوة فى بداية الرحلة هى ... محتاجين نفهم أطفالنا ..!!!!!!

ولى معكم ميعاد...
أستودعكم الرحمن ...