المدرسين أولياء الأمور نقاش ..عن إمتحان الصف الرابع الإبتدائى..رجاء التفاعل.

[الغصن الاخضر]

السلام عليكم ورحمه الله وبركاته

الأخوه والأخوات وحشتونى..

جأت لكم اليوم بشئ جديد أعتقد أول مره يطرح ..
بس عايزه أخذ رأيكم فيه..
طبعا معظم أولادنا أو أخواتنا بيمتحنوا الأن..
وبمناسبه الإمتحانات عندى إمتحان للصف الرابع الإبتدائى..
سأكتبه وعايزه رأيكم فيه ولو حد فيكم عنده بن أو أخ وأخت فى نفس السن يطرحه عليه وأشوف اللى أنا شيفاه فى الإمتحان ده صح ووجهه نظرى صحيحه فيه ولا أنا غلطانه..

أولا:من موضوع "غرائب الحيتان"
"اكتشف العلماء أن أنواع من الحيتان تقوم بشئ يثير الدهشه"
(طبعا اخذتوا بالكم ان القطعه كبير اد أه ولها معنى طبعاوإحنا متعودين أن الإجابه بتبقى فى القطعه.... !!!)
1_تخير الإجابه الصحيحه مما بين القوسين:
أ-مضاد "العلماء" (الجهلاء-الأغبياء-الخائبون)
ب-جمع "الدهشه" (الدهاش-الدهشات-الأدهشه)
2_ما الشئ الذى اكتشفه العلماء؟وما فائدته؟
3_لماذا تهاجم طيور النورس الحيتان؟

2_من موضوع (أمنيه هناء)
"لقد كان ذلك الكوكب الامع تحت قدمى لكننى لم أشعر بأنى عملاق بل شعرت بأنى ضئيل جدا أمام عظمة الخالق"
ا-هات معنى "لامع" ,جمع "ضئيل"

(بالله عليكم فى طفل فى الرابع الإبتدائى يستطيع ان يأتى بجمع كلمه "ضئيل"اقولكم الامتحان ده ليكم انتم وفى إنتظار التفاعل واللى هيجاوب عليه كله بدون مساعده عندى له جائزة..اتفقنا يله لبقيه الإمتحان)

ب-من قائل العباره السابقه؟وما المناسبه؟
(المدرسه الفاضله اللى حاطه الامتحان عايزة اسم رائد الفضاء نفسه)

ج-أكمل تحب هناء.........وتهوى..........

ثانيا:المحفوظات
من موضوع"أحب أن أكون"
أحب أن أكون محررا أريب
أكتب فى السياسه أو أكتب الأدب
الصدق فى حديثى أغلى من الذهب

أ-هات مرادف"الأدب" ,جمع"أريــب"

ب-ما المبدأ الذى يتمسك به مروان فى كتابته ؟ولماذا؟

ج-وضح الجمال فى قوله "محررا أريب"؟

د-هات سطرا شعريا يدل على أن الصحفى ينقد الفنون والكتب

5أكمل :قائل الأبيات السابقه هو.........على لسان من..........

ثالثا: القواعد النحويه
"نهر النيل نهر عظيم ،يتفرع لفرعين ،وهو نعمه من الله أمام عيوننا ،فتبارك الله أحسن الخالقين "

1-اعرب ما فوق الخط فى العباره السابقه

ب-استخرج من العباره السابقه:
(مبتدأ ،مثنى ،جمعا ،ظرفا )

ج-(الحوت الأزرق هو العملاق الأعظم )
اجعل الجمله السابقه "جمعا"وغير ما يلزم

(طبعا دى محتاجه مدرسين لغه عربيه للإجابه عليه!!!!)

د-(المسلمون يصلون فى المسجد)
اجعل الجمله السابقه جمله فعليه

ه-(الرحله غدا و..........أشترك فيها )
تخير أداه النفى المناسبه مما بين القوسين (لم ، لن)

و-"لا،سؤال النحو ليس صعبا"
هات سؤال للإجابه السابقه

رابعا التعبير
(دى بقه الطامه الكبرى)
"تخيل أنك قمت برحله الى القمر ،تحدث عما شاهدته ،وماذا أخذت معك فى الرحله؟"
(طبعا هنأحذ شوال رز وعيش ومايه وطبعا شويه لب وسودانى للتسليه وإخوانا بتوع الخليج يجيبوا مكسرات ونبدل مع بعض فوق!!!)
كان الاخ الفاضل ابو الشيماء طرح علينا هذا السؤال مره فى موضوعه
بس طرحه علينا على الاعضاء والكثير منا لم يشترك فيه مابالك بطفل عنده عشر سنوات

خامسا الخط
أكتب بخط الرقعه مرة والنسخ مرة
"يوم الامتحان يكرم المرء أو يهان "
(بجد عندهم حق مع هذا الامتحان!!!)

سادسا الإملاء
اكتب ما يملى عليك.

فى النهايه

أستحلفكوا بالله كل مدرس دخل او والى أمر ده امتحان يوضع لطفل فى الرابع الإبتدائى..!! عندهم حق الأولاد بعد هذا الإمتحان يقولوا لا مذاكره بعد اليوم...

عايزة بجد رأيكم فيه لما أنا كأم طول النصف الثانى أذاكر لإبنى واديه إمتحانات ويحل ويتعود على وضع الامتحان المكتوب فى الكتب الخارجيه ويأتى يوم الإمتحان
يشوف هذه الورقه وهذا الامتحان أصدقكم القول أنا لما إبنى جابلى الإمتحان أنا جالى هبوط...وفقدت النطق من الاندهاش..ونيجى نكلم المدرسه الفاضله اللى حاطه الإمتحان ترد وتقول :

علشان العيل يشغل خياله !!!

يشغل خياله فجأه فى الإمتحان

أقول أه ...!!!!

فى أنتظار رأيكم واللى عنده طفل فى نفس السن اقسمت عليكم بالله يمتحنه فى هذا الامتحان...!!! ومستنيه الرد...

طولت عليكم ....
معلش ....
بفضفض معكم.....امال اعمل اه ...اتنقط.....!!!!

فى أمان الله.