الكورة ....ولا حصار غزة ايهما اهم ؟

[بسمة شهيد]

السلام عليكم ورحمة الله وبركاته

غدا بإذن الرحمن هيكون مباراة الاهلى المصري والنجم الساحلى التونسي في استاد القاهرة

واللي بيلعبوا على النهائي عشان يروحوا كاس العالم للاندية في اليابان ..وللاسف ما عنديش توقعات بالنتيجة النهائية


حاجتين بمصر بتتوقف الحياة بالبلد عند حدوثهم :

أحدهم: لما الريس بيعدي من مكان لآخر بيكون يوم (تكفير ذنوب ) لاغلبنا وكلنا بنتعطل عن كل مشاغلنا

ثانيهم : لما يكون في استاد القاهرة ماتش مهم زي بتاع بكرة وطبعا البلد بقالها كام يوم عايشة استعدادات لا مثيل لها وشباب عائلتي يشاركوهم نفس الاحاسيس

ولما سالت اخي (طالب كلية الهندسة ) :

ايه رايك لو اتجمع السبعين ألف اللي هيكونوا في الاستاد بكرة

مع شوية اربعين مليون (يعني نص سكان مصر ) اللي هيشوفوا الماتش بالبيوت

مع بضع الآف من اللي هيقعدوا على القهاوي وحاولوا يوجدوا الحلول في حصار غزة وغيرها من القضايا في البلاد المحتلة تفتكر وقتها الدول المحترمة هتعير لنا اهتمام

أخي (هداه الله) :

يااااااااااااه هم حاصروا غزة من غير مايقولولي .....(بيتريق حضرته)

ما قلنا بلاش كلام في السياسة دي اللي مش هتجيب همها

أنا :

طب عندك حل غير الكلام وياتري هم شباب الجامعة ايه اللي شاغل بالهم غير الدراسة ...

ده ان كانت من اهتماماتهم اصلا

اخي (الله يوفقه ) :

نص الشباب كل اللي يشغلهم قنوات الاغاني واخبار السيارات والماتشات والذي منه

وربع منهم يعمل جديا بالدراسة ليكون ن الاوائل وغالبا عند التخرج ما بيحبطه اوضاع البلد وبيحس انه ضيع عمره هباء

والربع الاخير (المتدين منهم ) غالبا ما بيكون حاجز كارنيه في امن الدولة وبتعطل حياته الدراسية كتير بسبب كثرة الاعتقالات بسبب او من غيره

انا حاسس انه النهاية هتكون بغزونا احنا كمان وساعتها اكيد كلنا هنموت

انا :

وياتري هتعمل ايه

اخي (اصلح الله شأنه كله) :

اكيد هجاهد


انا :

طيب لحد ما تجاهد ناوي تعمل ايه

أخي (مازحا بنظرة حانية ) :

هروح استعد عشان اتفرج بكرة عالماتش وسط ضحكة صافية لشاب قارب على الواحد والعشرين ولا يدري الى اي حد وصلت مخاوف الامة

ومازلت اجمع الاحصائية بين شباب اليوم أيهما اهم

(ماتشات الكورة ..فتيات هذاا لعصر ...قنوات الاغاني واحدث الموضات والافلام )

أم

(ضياع أمة )

اللهم استرنا فوق الارض وتحت الارض ويوم العرض عليك