`~'*¤!||!¤*'~`((كيف نحسن الظن بالله؟؟ ))`~'*¤!||!¤*'~`

[قرآنى جنتى]

كيف نحسن الظن بالله؟؟

كتير بنسمع و نقرأ وكمان بنتكلم عن حسن الظن بالله
و بنحس وقتها إنه الحمد لله كل مشاكلنا اتحلت
بس أول ما بتحصل مشكلة
يا ترى بنحسن الظن بالله؟؟؟
طيب ليه؟؟؟

و لو أحسنا الظن بالله

يوم اتنين تلاته

المشكلة زى ما هى

اسبوع اتنين

المشكلة بتزيد

بنعمل ايه وقتها؟؟؟

بنفضل محسنين الظن بالله؟؟؟

و لو واحده مشكلة زادت عليها اوى
وجيتى تكلميها عن حسن الظن بالله
تلاقيها بتقولك
يا بنتى ده ابتلاء
وكأن الابتلاء يعنى خلاص هو كده
نصبر بقى وامرنا لله
وطبعا دي هنا نسيت حسن الظن خااالص
طب هو فى تعارض؟؟؟

واحده بقى ما شاء الله كل ما تقع فى مشكلة تقول :
هتتحل هتتحل
أصل ربنا قال انا عند ظن عبدى بى
ولما ترتكب ذنب تقول :
ربنا هيغفرلى و هيدخلنى الجنه
أصل ربنا قال انا عند ظن عبدى بى
هل هو ده حسن الظن بالله؟؟؟

طيب ايه هو بقى حسن الظن بالله ؟؟؟
و الاهم ازاى نطبق حسن الظن بالله ؟؟؟

اولا :الاحاديث على حسن الظن بالله كتيره

منها:
يقول الله تعالى : أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملأ ذكرته في ملأ خير منهم ، وإن تقرب إلي شبرا تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة
الراوي: أبو هريرة المحدث: البخاري - المصدر: صحيح البخاري - الصفحة أو الرقم: 7405
خلاصة حكم المحدث: [صحيح]

إن الله يقول : أنا عند ظن عبدى بى و أنا معه إذا دعانى

الراوي: أبو هريرة المحدث: مسلم - المصدر: صحيح مسلم - الصفحة أو الرقم: 2675
خلاصة حكم المحدث: صحيح

قال الله عز وجل : أنا عند ظن عبدى بى وأنا معه حيث ذكرني .
والله ! لله أفرح بتوبة عبده من أحدكم يجد ضالته بالفلاة ومن تقرب إلي شبرا ، تقربت إليه ذراعا . ومن تقرب إلي ذراعا ، تقربت إليه باعا . وإذا أقبل إلي يمشي ، أقبلت إليه أهرول
الراوي: أبو هريرة المحدث: مسلم - المصدر: صحيح مسلم - الصفحة أو الرقم: 2675
خلاصة حكم المحدث: صحيح

ثانيا : حسن الظن بين اليأس و الغرور

معنى اليأس : ظنكِ أن الله لا يغفر لكِ، وأنه لن يدخلكِ الجنة و انه لن يقبل توبتكِ و لن يستجيب لكِ و لن يتقبل منكِ الاعمال الصالحه

معنى الغرور: إحسان الظن مع الإقدام على المعاصي، والإصرار عليها و عدم الاخذ بالاسباب فهذا غرور لا يجوز

و بين اليأس والغرور حسن الظن بالله

فحسن الظن بالله هو : ان تحسنى ظنك
بالله أنه جواد وأنه كريم, وأنه غفور رحيم- سبحانه و تعالى, وأنه يتوب على
عباده إذا تابوا إليه, وأن فضله عظيم،
تحسنى ظنك بالله مع الجد في العمل
الصالح
وتجتهدى في أسباب العفو: من الصدقة مع التوبه
والرحمة بالفقراء, وكثرة الاستغفار، التوبة والندم والإقلاع
كثرة الأعمال
الصالحات مع حسن الظن بالله، تحسنى ظنك أن الله يقبلها وأنه لا يردها سبحانه وتعالى

ثالثا :حسن الظن من حسن العمل

يعنى ايه؟؟
هقولك

مثال بسيط عشان نفهم
راجل ماشاء الله نحسبه على خير
افتتح شركه
و فتح باب التقديم
و احنا واثقين انه كويس
و بيدى الموقع للى يستحقه

واحد قال ما شاء الله ان شاء الله هيقبلنى
بس مرحش قدم ولا حاجه

واحد تانى قال نفس كلامه
بس راح و قدم ورقه و فضل يتابع الموضوع و يسأل
و يشوف ايه اللى مطلوب منه و عمله كله
و بعدها قال ان شاء الله هيقبلنى

واحد تالت
انا اصلا فااااااااااشل
عمر ما الشركه هتقبلنى
انا عارف نفسى

مين فى التلاته اللى هيقبل فى الشركه؟؟؟
اكيد التانى

لان الاول مغرور
قال هيقبلنى و معملش حاجه

و التالت يااائس
و مابيحاولش يغير من نفسه

لكن الاول راح و قدم و عمل اللى مطلوب منه
بعدها قال ان شاء الله هيقبلنى

و لله المثل الاعلى

ربنا سبحانه و تعالى قال انا عند ظن عبدى بى
يبقى لما تقعى فى ذنب
لو قلتى ان شاء الله ربنا هيغفرلى و هيقبل توبتى و انتى مصره على المعصيه
و مش بتتوبى ولا تندمى ولا تستغفرى يبقى ده ايه؟
(غرور)

اما لو قلتى انا زهقت من نفسى
انا عاصيه
ربنا مش هيقبلنى يبقى ده ايه؟
( يأس )

وكلاهما خطأ

اما بقى حسن الظن
انك تحسنى الظن بالله انه يقبل التوبه
و يغفر الذنب
فتقفى بين يدى الله
و تستغفرى و تتوبى و تعزمى على عدم العوده

و لو حصل لك ابتلاء
تحسنى الظن بالله انه قريب مجيب
يستجيب الدعاء و يرفع البلاء
فتقفى بين يديه و تدعى كثييييييييرا
و لو رفع البلاء اتأخر
اوعى تسيئي الظن بالله
و اوعى تيأسى من رحمة الله
بالعكس
انتي تزودى حسن ظنك بالله
بأنك تزودى الدعاء و الاستغفار
و انتى موقنه انه سيجيب دعائك و يقبل استغفارك
و يرفع هذا البلاء عنك
مش بأنك تقولى ان ظنك ان ربنا هيرفع البلاء و بس

و فى الاعمال الصالحه
اعملى العمل الصالح
و انتى عندك حسن ظن بالله
انه سيتقبل منكِ هذا العمل
و انه سيجازيكِ عليه
و إلا لو لم اعمل العمل كيف احسن الظن انه سيُقبل؟

الخلاصه: كيف احسن الظن بالله

عشان تحسنى الظن بالله
لازم تاخدى بالك من حاجتين مهمين اوى
اولا:تتجنبى اليأس و الغرور
ثانيا :حسن الظن بالله نصفه عمل
بمعنى انك تحسنى الظن بربك انه يقبل التوبه و يقبل الاعمال الصالحه و يستجيب الدعاء
فتتوبى و تعملى الاعمال الصالحه و تدعى