يا أنا بقى يا الصدفية بقى !!!

[moi]

السلام عليكم و رحمة الله تعالى و بركاته
جزاكم ربي كل خير و أنعم عليكم من فضله
أخي الكريم هنا القاهرة
و الأستاذ الذي مهما قلنا لن نوفي حقه
زادكم ربي من نعمه
أخي هنا القاهرة تابع برنامجك العلاجي بما أن البقع ذات حجم صغير فباذن الله ستزول
نسأل الله الشفاء لك و لنا و لجميع مرضى المسلمين ىمين

[هنا القاهرة]

بايكوتين ـ إن

يا سلام عليك يا كبيرنا .... أبوسك ؟

جبته الآن أول ما شفت تعليقك .... للأكزيما صح ؟ الكلمة دي بلاقيها كثير في نشرات المراهم بس ما حاولتش أعرف عنها الكتير ... يعني كنت فاكرها إسم بلد جنب زامبيا أو زمبابوي ولا إسم عزبة جنب طنطا كده ولا حاجة مش دي برضه قريبة الخواجة كوزيكا ؟؟؟؟ ... المهم

أيوه يا عمنا فكري هيه دي حالتي لكن في منطقة البطن والخصر أكثر شوية ولو أهملتها بتقشر وتعمل القشور المفضضة إللي بالي بالك بس بتحمر كده لما باسلخ أمها بالكريمات والمراهم ومشخصينها الدكاترة صدفية وماسكه في جلدي من سنة 1988 وفيه ملحوظة عايز أقولها لك كمان يمكن تفيدني :

هيه بتبدأ صغيرة ثم تتسع وتنقسم أربع أو خمس وحدات وتتباعد مشكلة ما يشبه الزهرة الحمراء أو قدم القط (حلو الشرح ده) وبتعمل الحركة دي خاصة في منطقة البطن والأفخاذ

كمان إللي بيضايقني أكثر شيء صدفية الأظافر وفروة الرأس

ولما بتظهر في الوجه ببقى هتجنن

... أما كلامك عن ترطيب الجلد أنا استعملت مرطبات كثيرة بدءاً من زيت جونسون للأطفال والبودي لوشن وكريمات دوف وغيرها كثير ودلوقتي باستخدم الجلسرين زي ما قلت لحضرتك .... إللي يعرف بقى أي مرطبات جلد أخرى يقول لنا عليها لأني بقيت باعتبر المنتدى ده مدرسة وكل إللي فيه بقوا همه أهلي وحبايبي ... با قول أيه يا كبيرنا ... ما تيجي نعمل واحد رباطية ( قصدي رابطة يعني ) زي إللي عملها أحمد زكي في البيه البواب بس ممنوع ضرب الكراسي .... عموماً النهارده أنا كنت محضر كلمتين عايز أقولهم مع إني لا باحب التحضير ولا التدريس ... نسمعهم بقى وخلاص

نقول :

بسم الله الرحمن الرحيم

أود أن أشكر الجميع على تفاعلهم بس عايز أقول حاجة للأخوة إللي بيدخلوا يواسونا وينصحونا (جزاهم الله ألف خير) .... كل الأخوة المصابين بالصدفية هنا عندهم خبرات واسعة في التعامل مع المرض ومروا بتجارب كتييير ومعظمهم مثقفين وفي وظائف مرموقة كمان .... ممكن أقول ألف حاجة عن علاجات ودهانات واجتهادات بالرغم من أني غير مقتنع بجدوى الكثير والكثير منها لذلك لم أجربها .... وخد عندك شيء من هذا القبيل : بعضهم يقول زيت بذر الكتان وغيره مر البطارخ وغيره وغيره ... طيب أقف كده قدام عطار مشهور شوية في مصر هتلاقي أكثر من 100 علاج عشبي ... بدءً من السرطان حتى نزلة البرد والسعال إللي يقول لك الصبر واللي يقول لك عين العفريت وأسماء كده غريبة (م الآخر الموضوع تجارة بحته) تماماً مثل نشرة وجدتها داخل أحد مغلفات زيت حبة البركة إللي أنا باستعمله الأيام دي زي ما قلت ..... شوف بنفسك بيقول أيه :

واخد بالك من كلمة فنجان .... يعني اشتري لك ثلاث أو أربع عبوات من عندنا علشان تعمل الخلطة !!! وعلى فكرة من خلال تنوع مصادر زيت حبة البركة إللي باستعملها أقدر أقول لك إن الزيت بتاعهم مضروب يعني شوية زيت دره على شوية زيت زيتون مع مقدار صغير من زيت حبة البركة وأقلب وبيع !!!!! .. وبصراحة هيه دي مصيبتنا هتلاقي في مصر من بين 1000 عبوة عسل نحل واحده بس هية إللي عسل طبيعي والباقي من تركيب الحاج برعي الجحش إللي قاعد تحت السلم يخلط شوية عصير ليمون على شوية سكر على مش عارف أيه ويعبي في برطمانات ويلزق لك عليها كمان الماركة والشعار وووووو ... ومش بعيد تلاقيه حاطت ختم كده زي حدوة الحصان وكاتب عليه (حاصلة على شهادة الأيزو العالمية 9001) !!!!! ومش مهم الزبون يجي له حموضة معدة وارتجاع الحمض في المريء وصدره يولع نار المهم برعي الجحش يكمل بناء البرج بتاع مصر الجديدة ... لذلك علينا أن نبحث عن الشيء الجيد دائماً ........... المهم ...... أطلت عليكم لكن معي شيء آخر الله أعلم إذا كان برضه يدخل في عملية التجارة والربح ولا ........ إنتوا شوفوا الموضوع واحكموا بنفسكم

دي صورة لأحد صفحات كتاب للعلاج بالقرآن .....

حد جرب زيت الكافور ؟؟؟؟؟ معلوماتي عنه إنه مهدئ جنسي !! يعني كانوا بيحطوه لنا في الفول إللي بنفطر بيه الصبح في المدينة الجامعية وفي معسكرات الشباب لما كنا بنروح رحلات صيفية وأيضاً أيام الجيش علشان محدش يفكر يهرب من الخدمة ويمشي يعاكس في الشوارع ويخبط في إللي رايحة وإللي جايه.... طيب الموضوع ده له علاقة بالصدفية ..... يمكن .... نجرب وزي ما قال أحد الأخوة في تعليق له في هذا المنتدى : الغريق لايخشى البلل .... والله نسأل الشفاء للجميع

شكراً على سعة صدركم وتصبحوا على خير

أخوكم ومحبكم/ هنا القاهرة

[فكرى دياب]

ألأخ .. هنا القاهرة ..
ياأخى العزيز . نرجوا منك وعلى الرغم من خفة الدم والظرافة الواضحة فى مشاركاتك . أن تضع فى فى ألأعتبار أن هناك أخوة لنا هنا من جنسيات مختلفة لن يستطيعو فهم الكلمات والقفشات المصرية الجميلة لك فى مشاركاتك .
نرجع أخى العزيز الى العمل الجاد شوية ..
هيه بتبدأ صغيرة ثم تتسع وتنقسم أربع أو خمس وحدات وتتباعد مشكلة ما يشبه الزهرة الحمراء أو قدم القط (حلو الشرح ده) وبتعمل الحركة دي خاصة في منطقة البطن والأفخاذ
أذا وصلت معك الحالة الى هذ ا الوضع فأستبشر خيرا بأن البقع هذة فى طريقها الى الزوال وأقسم لك على ذلك ان البقع كانت عندما تتفرق ويصبح هناك فراغ فى وسطها
وتصبح دائرية تظل تتصاغر الى ان تزول .
فأرجوا منك الأستمرار على هذا الوضع الى أن تنتهى البقع ولا تتركها حتى لا تعود وتكثر مرة أخرى . وهذة هى تجربتى الشخصية وليست ماسمعتة من أحد ..
بارك الله فيك ..

[هنا القاهرة]

المشاركة الأصلية كتبت بواسطة فكرى دياب

أذا وصلت معك الحالة الى هذ ا الوضع فأستبشر خيرا بأن البقع هذة فى طريقها الى الزوال وأقسم لك على ذلك ان البقع كانت عندما تتفرق ويصبح هناك فراغ فى وسطها

الله يبشرك بالخير
كنت قاعد منتظر تعليقك رغم انشغالاتي الكثيرة
هيه كده بتتفرق وبتترك فراغ زي انت ما قلت تماماً

وسأحاول أكون أكثر جدية في حديثي ... اتحملني شوية