مع الصدفيه 27 عاماً علاجاً ودواءاً

[احلى الفصول]

مرحبا "ام فرفورة" وكل عام ونتي بخير والجميع بخير ،،،،،

انا لي في مصر حول 22 يوم تقريبا ، اول 5 ايام كانت الاوضاع مخربطة وراحت مابين الغردقة وسفاجة والبحث عن منزل للإقامة فيه ثم استقريت ونزلت البحر حول 10 ايام متتابعة لكن اول ثلاث ايام التزمت في الجدول انزل مرتين في الصباح والمسا ، لكن بعد كذا تعبت وماقدرت التزم وصرت اروح مرة وحدة في العصر بس ، ثم رحت القاهرة حول اسبوع ثم رجعت اليوم سفاجة وطبعا رمضان لكن رحت اليوم الصبح وجلست ساعتين في البحر ، الوضع مشجع لكن لأني اول مرة اجي مصر ولا اعرف احد فيها وكانت جيتي بمثابة مغامرة لأني مانسقت مع احد ولا ادل فيها وضاعت الايام علي ، كنت كل يوم انزل فيه البحر احس في تحسن عن اليوم الي قبله والصدفية الي في الوجه راحت بفضل الله ، وفي اماكن في الرجلين واليدين راحت مررة ، لكن الي يبي يتعالج لااااااااازم يلتزم بجدول الطبيب شهر كاااامل مرتين في اليوم ، انا متأكد لو اني التزمت في جدول الطبيب بس عشرين يوم كان راحت كلها لكن الظروف ماسمحت ، وانشاء الله الصيف الجاي بجي مرة ثانية ان الله احيانا بس بجي في اول الصيف قبل لاتصير الايجارات غالية ،

التكلفة والله ماحسبتها زين لكن اعتقد اني صرفت لغاية اليوم حول عشر الاف ريال يعني 15000 جنية ، 70% منها صرفتها في القاهرة تقريبا فنادق وتمشيات وفرفرة في الامكن السياحة وتكااااااااااسي واكل وشرب ... الخ ، لكن بقولك شي :

الايجارات في سفاجة في عز الموسم تتراوح مابين الف جنية الى ثلاث الاف جنية للشقة غرفتين ومطبخ يعن حسب نظافتها وبعدها عن البحر ، الي معه سيارة مايفرق معه المكان ، لكن الي مامعه سيارة الافضل انه يسكن قريب من البحر ، وفيه هناك فنادق كثيرة منها داخل البلد ومنها على الشط ، الي على الشط حول 4 فنادق واسعارها متقاربة ، في المواسم غرفة سرير واحد حول 200 جنيه وغرفتين بأربع اسرة سعرها من 500 الى 600 جنيه في الليلة ، في فندق وسط البلد اسمه الؤلؤة فيه شقه غرفتين وصالة وحمام وحليلة بــ170جنيه بالليلة . طبعا في فنادق كثيرة لكن هذي الي مريت عليها ،

بالنسبة للأكل الي ناوي يقعد شهر الافضل يسكن في شقة ارخصله اذا كانو عايلة والاكل يعني يكلف حول 500جنية كل اسبوع ، كل اسبوع تروح البقالة تاخذ مقاضي اسبوع مرح تزيد عن خمسمية جنيه ، وفي سوق كبير يبعد حول اربعين كيلو عن سفاجة قريب من الغردقة اسمه (سنزو مول) هذا مثل كارفور عندنا او هايبر بندة لكن اكبر كثييير من الي عندنا واسعاره ارخص من اسعارسفاجة والغردقة ، ويقدر اي احد يروحه بسيارته كل اسبوع وياخذ منه الي يبي والي مامعه سيارة يروح مواقف التكاسي في سفاجة وياخذ سيارة خاصة توديه وتجيبه بسعر سبعين جنيه وسعر الانتظارساعتين في السوق عشرين جنيه يعني روحة وانتظار ورجعة تكلف تسعين جنيه . وهذا السوق فيه كل شي يخطر على بالك اكل وملابس وكل شي يحتاجه الواحد وبأسعار مناسبة . وفي جنبه ملاهي كبيرة يعني مثل الحكير عندنا يعني الي معه اولاد ومبتلش فيهم ومتوهق بجيتهم معه يقدر يغير جو وينسيهم اللطعة في البيت خخخخ .

عموما انا قاعد اجمع ارقام وعناوين بعض الفنادق وبعض الاشخاص الي ممكن تقدرو تنسقو معهم قبل لاتسافرو وانشاء الله بكتبها هنا في الموقع بتسهل عليكم كثير بإذن الله .

انا بعد ثلاث ايام برجع الدمام ان شاء الله ، وتمنياتي للجميع بالشفاء .