مشـكلتي مع والـدتي ..

[عروب 99]

السلام عليكم ورحمة الله وبركاته ..


انا بنت عمري 19 سنه جــامعيه.. ترتيبي الثانيه بين اخواني..


علاقتي جدا قويــه بوالدتي .. يعني اكثر من ام وبنتها.. وماقد سار اي خلاف كبير بيني وبينها من قبل ..


بس الفتره الاخيره اتغيرت علاقتنـا جدا ببعض هيا اتغيرت وانا اتغيرت ..


هيا سارت جدا انانيه ماتحب الا نفسهـا .. ماتعاملني زي اول باهتمــام .. تعاملني جــدا بجـفــاء ((ومشكلتي اني جدا جدا حســاسه ))


قولتلها كم مره انو اسلوبها مايعجبني ولازم تحترمني انا مني صغيره لاكن مانفع معاها . تقولي انتي مره مدلعه ومره حساسه والمفروض ماتزعلي مني انا امك..


انا برضو اتغيرت كثير الفتره الاخيره سرت مااحب اي مخلوق على وجه الارض يعاملني بقلة احترام ..
حتى لو كان هذا الشخص امي او ابويا ..


ومن هنا نـشـأ الاختلاف بيني وبينهـا .. سرنا على اتفه الاسبــاب نتمشكل ..


احسهـــا تكرهني من جواتهــا .. وماتحترمـني ابداا..


ودايمـــا تحتقرني ..



بنات عيلتنا الا في نفس عمري جــدا تحترمهم وعلى طول تمدح في جمالهم وتصرفاتهم


وانا بنتهــا والله والله سرت مااسمع مــدح الا من الناس ..


بالرغم من اني افضل بكـــثير منـهـم في مستواي التعليمي والاخلاقي وفي الشكـل


بشـهـادة الكل ..






وكمـان انا جــدا متحفظـه مااحب اي خلاف يسير في بيتنـا يطلع برا


كل اهلي كمان فيهم هالطبع ..


بس الفتره الاخيره سارت امي كل كلمه تسيربيني وبينهـا في البيت ترفع السمـاعه وتنقلهـا لبرى وتقعد تتكلم بكل فضــاعه وكأنهـا تتـكلم عن احــد غريب مو بنتهـا !!


انا بــجــــد مصدووومه منهـا ومني مصدقه انو هذي امي ..


لدرجــــة انهـا خربت العلاقه بيني وبين خالتي .. لانو قبل شهرين حصل خلاف بيني وبينهـا ومن يومهـا انا مااكلمـهـا ولا سرت اقعد معاها في نفس المكـان ولا اكل معـها .. لانو بــجــد نفسيتي تعبـانه .. ومعد سرت اطيق تصرفاتهـا
قامت نقلت كل هالكلام لخـالتي لمن كانت زعلانه .. وخالتي طبعا ماعجبهـا اللي سمعتو ولا كلفت نفسهـا حتى تسأألني اش حصل بيني وبين امي بالرغم من انو علاقتي جدا قويه بخالتي سارت معد تكلمني ولا ترد على اتصاللاتي واذا شـافتني في محل كلمتـين وبس قمت انا اخذت موقف منهـا صراحـه لانهـا لو تحبني بجد كانت عرفت اش المشكله مو تتغير عليا بدون سبب بعدها رجعنا انا وامي نتكلم وماكأنو حصل شي ,, وانا وخالتي سار بيننـا حاجــــزلمن اليوم هذا ..



أحــس امي منافقه خاينـه .. تقعد معايا بوجـه ومن ورايا تنقل للناس كلام مبالغ فيه


بالرغم من انوكل الناس عندهم خلافات وعندهم مـشاكل بس مايقولها ويفضحوا بناتهم


لانو بالأخــير راح ننسى انا وامي خلافاتنا بس الناس ماينسوا يقعدوا شايليين عليا


وماخــــذين فكره سيئه ..



وربي سرت مااكلمـهـا بالشهر والشهرين لاني معد اقدر احسها خاينه ..


قاعدين في بيت واحــد كأننـا اغراب



اتعمــد اقعد في غرفتي طول الوقت بس عـشـان مااشوفهــأ او احتك فيهـا


طول الوقت وانا ابـكــي كل مانمت وكل ماصحيــت .. وربي سرت تعيسـه بسببهـا


حتى الناس قطعت عنهم ... معد سرت احب اخرج ولا محــل .. حاسـه اني مكبوته


مكتئبـه معد عندي ثقه في نفسي اصلا .. لانهـا تتعمد تشوه صورتي قدام الناس ..




ياليت ياليـــت تدوني حل معاها .. انا مني عــــاقة والدين.. بس غصبا عني سرت عاقه .. .. والله انا من يوم عرفت نفسي وانا ادعيلهـا بكل صلاه واسوي كل شي يرضيهـا واشيل همهـا دايمــا .. واحترمهـا جــدا ..وهيا تطلع المشاكل من تحت الارض .. تدور عليا الزله


ماادري مو عاجبهـا اني اكون باره فيهـا ولا اش المشكله ؟ ..