القاهرة في منتصف الليل.... رووووعة

[بسمة شهيد]

السلام عليكم ورحمة الله وبركاته

بعتقد إني هكتب الموضوع وأغلب أهل المنتدى في سابع نومة

كنت من يومين في إحدى المهمات العسكرية المكلفة من قبل والدتي

والوقت قد شارف على منتصف الليل

يصحبني فريق العمل (أخي الله يهديه )

وما ان انطلقنا بالسيارة وفي محاولة مني لتفادي التركيز في سرعته الجنونية ...لجأت للتامل من شباك السيارة الى القاهرة وجمالها النائم

بعتقد انه اللي يشوف القاهرة (قلب مصر ) يحس انه يمكن يوم الحشر هيبتدي من عندنا ...ايه التكتلات البشرية الموجودة دي لدرجة اني فكرت مرارا في طلب حق اللجوء الصحراوي

مش ده المهم

وإليكم بعض النماذج البشرية اللي لمعت في هدوء الليل ويمكن تعدي علينا في الصباح دون انتباه

1: اتنين كانوا يعدوا الشارع والابتسامة على حسب ما قيستها

(من الودن للودن ) يا بختهم ماشاء الله لسه حد بيبتسم اليومين دول

لكن مع مشيتهم المتعثرة شكيت بالامر ...يمكن سبحان الله يكونوا مخمورين (سامحني الله)

وبعد الفحص والتدبر (ما انا بقى في مهمة ) اسعدني ان سمعت كل واحد منهم بيعرض على التاني خدماته في مساعدته لعبور الشارع

بس تعرفوا ايه المفاجأة

انه الاتنين

فاقدين البصر

ومازلت الابتسامة ترفرف

/
/
/

2: بطلوعنا على كورنيش النيل (ربنا يستر وراجية الشهادة ما تقراش الجملة دي والا هتقيم عليه الحد )

يا سلام على عزف القمر على سطح النيل وبرودة الجو فما احلاه من شعور

بالمناسبة اللي عايز دعوة على قصر النيل هي مجانا وانا هرافقكم

بس خدوا تصريح من راجية الشهادة الاول لانه ليها جواسيس هناك
/
/
/

3: وبما اني اخدت القاهرة بمختلف انحاؤها فمرينا على اممممم( قصر .....الرياسة )

طبعا ما دخلناش.... اصل ما حدش عزمنا

بس هناك الناس متعودة تتريض وقت العصر

لكن ما شاء الله لقيت جموع من الشباب مبسوطين بالتنزه وقد شارفنا على آذان الفجر

اهو ده النشاط ولا بلاش

4: وختامه مسك.... مشهد من اجتماع المستقبل بالماضي

او بمعنى اخر صورة لبداية تكوين الانسان في مراحله الاولى واخري في نهاياته

رجل عجوز يستند على طفل يمكن ( بوصتين من الارض) بيحاولوا يعبروا الشارع

والاتنين في قمة همتهم ...سبحان الله في اقصى سرعة للعبور

تتماثل خطوة العجوز بالطفل....

ما حدش احسن من حد
"
"
"

لولا انه الوقت إتأخر كنت أتمنى أركز مع الناس أكتر وأكتب لكم أكتر

بس السيارة خلاص وصلت للمنزل زي ما انا دلوقتي حان (bed time )

اااااه

نسيت اقولكم

نتيجة السرعة الجنونية

إتسحبت رخصة اخي للمرة التانية على التوالي مع فارق نقطتين قصدي اسبوعين لصالح (المرور )

يستاهل

الاهم ...اني استمتعت

تصبحوا على كل الخير