الله اكبر / شعر : عبدالله صالح العمري

[عبدالله صالح العمر]

اللهُ أكبر

(دفاعاً عن عرض نبينا محمد صلى الله عليه وسلم وعرض أمنا عائشة رضي الله عنها ) قصيدة نبطية

أللهُ أكـبــر ثـــم اللهُ أكـبــر== أللهُ أكـبـر بالعـلـن والسـريـره

واللهُ أكبر .. من حناجرهـم أظهـر== حقـد القلـوب المرجفـات الحقيـره

الطاعنين بِعرض .. ( طه ) المطهّر== أطهر بشر ما في الخلايـق نظيـره

الله رفـع ذكـره وصانـه وقــدّر== بانـه نـذيـره للعـبـاد وبشـيـره

وإنه شفيع الخلق فـي يـوم تُحشـر== كل الخلايق .. والمواقـف عسيـره

واللهُ أكـبـر ثـــم اللهُ أكـبــر == اللي جعل رمـي المحاصـن كبيـره

كيـف الـذي زوّر ونافـق وكـفّـر== زوج الرسـول بدنيتـه والاخـيـره

وهي الحصينـه والـرزان الموقّـر== علاّمـة الاسـلام غــرّا منـيـره

وهي الكريمه فضلهـا الزايـد أكثـر== على النسا مثـل السحـاب المطيـره

ونِعم بهـا.. بنـت الكريـم المظفّـر== ابو بكـر خِـلّ الرسـول وصهيـره

الله ازكّـاهـا بـذكـرٍ مـطـهّـر== قـرآن يُتلـى بالعشـي والبكـيـره

معْ ذكرهـا كـل المسامـع تعطّـر== وتفـوح بالدنيـا أطايـب عبـيـره

إلاّ الـذي قلبـه بظلـمـه تحـجّـر== والران غطّـى مسمعـه والبصيـره

اللـي يقـول بعائشـه قـول منكـر== وانكـر براءتهـا جهنـم مصـيـره

حـق للسمـا ممّـا يقولـوا تفطّـر== وحـق للجبـال تخـر لديـن غيـره

وحـقٍ لنـا فيهـا نمـاري ونفخـر== أمٍ لمـن آمـن وطـهّـر ظمـيـره

يا كـلّ مـن يسمـع بعقلـك تفكّـر== كانِك تريد الحـق صـفّ السريـره

واقـرا كتـاب الله وخشـع .. تدبّـر== من هُم في الجنه ومن فـي السعيـره

فالله أرسل للرّسـل وحـي واخبـر== يُحبط عمل .. من يشرك معاه غيـره

كيف الـذي حـرّف كتابـه وشهّـر== في عِرض سيد الخلق من ذا يجيره ؟!

معلوم بعـد الكفـر لا ذنـب أكبـر== لكـن هـذا الإفك .. فتنـه كبيـره

الصمت عنها نار في الجوف تسعـر== والخوض فيها له عواقـب خطيـره

والصمت يا اهل العلم أنكـا واخطـر== والصمت يا حكـام كسـر الجبيـره

إن تخمدوهـا .. والمنافـق يـعـزّر== أو تتركوها تشتعـل فـي الخضيـره

فالطعن في عِرض النبي شر ينخـر== في كل مـا هـو للموحـد شعيـره

وحنّـا هَـل التوحيـد كـم بانصبّـر== إن صارت الاعراض والدين عيـره

أنذرت يا قومي ومـن أنـذر أعـذر== مـن فـرّط بدينـه يفـرّط بغـيـره

واللهُ أكـبـر ثـــم اللهُ اكـبــر== هو حسبنـا فـي الأوّلـه والخيـره

شعر / عبدالله صالح العمري