أنا محجبة ليه؟؟؟

[فاطمة الزهراء82]

أنا محجبة -بعد إيماني بأمر ربنا إن الحجاب فرض على كل مسلمة- علشان الأسباب التالية
*******
1 -

علشان انا حرة.. مش من حق حد يشوف مني اللي مش عاوزاه يشوفه إلا بإرادتي.. ومن حقي اختار مين اللي يشوف مني أجمل ما عندي.. واللي علشان يشوف ده ويبقى حقه وحلاله بلاله عن طيب خاطر.. لازم هو كمان يديني مشاعره واللي باقي من عمره عن طيب خاطر
*******
2 -

علشان أنا غالية.. مينفعش أقلل من قيمة نفسي واخليها عرضة لكل العيون.. ويبقى خروجي مكشوفة ضوء أخضر لكل من هب ودب يسرق مني ولو نظرة لأي جزء مش متغطي مني.. حتى لو مكنش ده قصدي.. بس مش حقدر امنعه.. كامل اعتذاري لغير المحجبات.. ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب . علشان ميطمعش الذي في قلبه مرض.. مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع.. ده يتضمن حتي الزبال اللي بيسوق عربية الزبالة في الشارع.. كل دول بقى من الممكن انهم يبصوا لي.. لأ ده كمان يمكن ماعجبهمش ويدوروا وشهم إعراضاً
*******
3 -

علشان أنا باحترم نفسي.. وشايفة نفسي كبيرة قدام نفسي.. ومينفعش أنزل سوق المنافسة في الأنوثة علشان أفوز في الآخر بنظرة شهوانية أو كلمة غزل رخيصة أو عرض صحوبية
*******
4 -

علشان انا جمالي مش خارجي وبس.. ومن حقي ان اللي ييجي يتجوزني.. واللي حاديله الباقي من عمري.. واللي حديله كل مشاعري.. واللي حاقاسمه أحلامي وأفكاري.. واللي حخلف منه ولادي.. وح اربيهم معاه.. مايختارنيش على مقاييس شكلية وبس.. أو تبقى هي دي العامل الأساسي في أختياره ليا.. علشان كدة مش ضروري يشوفني في كامل زينتي وجمالي قبل ما ي! تجوزني.. الأهم انه يحب روحي ويعجب بشخصيتي.. ويرتاح معايا نفسياً.. أصل في بنات بتأجل الحجاب لحد ما تتجوز.. على أساسا انها تكون شنكلت واحد وضمنته.. مع إن مفيش حاجة مضمونة في الزمن ده.. واللي اختارها علشان جمالها.. ممكن قوي يتجوز عليها واحدة أجمل منها.. لأنه أكيد في الأجمل منها يعني
*******
5 -

علشان أنا باخاف على أخويا في الله اللي بيشوفني في الشغل أو في الكلية أو في المواصلات أو في الشارع.. ويمكن يكون عاوز يقرب من ربنا.. وبيجاهد نفسه علشان يغض بصره.. فمرضاش لنفسي اني اكون سبب في اني افتنه
*******
6 -
علشان أنا باشيل هم أخويا في الله اللي نفسه يتجوز ومش قادر لضعف إمكانياته المادية.. فمش ضروري يعني ازود عليه همومه.. وأخيِلُه في الرايحة والجاية
*******
7 -
ده غير حاجة مهمة كمان.. الكفن بتاع النساء.. فيه حجاب.. فاللي مش ح تلبسه وهي حية بإرادتها طاعة الله.. ح تلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى التكليف.. ومحدش حيشوفنا تاني ولا حد حيطمع فينا.. يبقى مفيش معنى اننا نمشي مكشوفين لكل العيون واحنا أحياء نرزق.. يبقى الأولى اطيع ربنا بإرادتي وأقابله وهو راضي عني واخد أجري كامل.. ولاّ اني ملبسوش غير وانا جثة واقابل ربنا وهو غضبان عليا؟
*******

الأسباب اللي فوق دي.. هي اللي فهمتني ليه ربنا فرض علينا الحجاب.. مش تعسير ولا تضييق.. الحجاب فعلا عزة وكرامة.. ميعرفهاش غير اللي داق طعم الستر
ربنا يهدينا ويهدي بنات وشباب المسلمين

__,_._,___

[نهى.]

السلام عليكم ورحمه الله وبركاته
موضوعك جميل جدا
بارك الله فيكى اختى الكريمه

[فاطمة الزهراء82]

السلام عليكم ورحمة الله وبركاته
مرحبا بك أختي الكريمة معنا في ملتقى الشفاء الإسلامي
وبارك الله فيك على مرورك الطيب

[الطالبه سجى]

شكرا لكي اختي الكريمة موضوع في غاية الاهميه
وجزاكي الله خير الجزاء

[العدنيه]

السلام عليكم


ماشاء الله
موضوع رائع


بارك الله فيك اختي
وجزاك الله خيراً

[رحيق الجنان]

كلام جميل بل رائع لكن لدي ملاحظة صغيرة أرجو أن تقبليها مني عزيزتي وأختي في الله فاطمة الزهراء .......وددت لو يكون كلامك بالفصحى البسيطة أفضل من العامية لكي يستفاد ويفهم كلامك أكبر قدر ممكن من البنات والنساء وجزاك الله خير الجزاء على غيرتك وكلامك الجميل.

[ريحانة دار الشفاء]

السلام عليكم
جزاكِ الله خيرا حبيبتى
فاطمه الزهراء
على الموضوع القيم
جعله الله بميزان حسناتك
بالتوفيق غاليتى وننتظر كل جديك