يوميات غزاوي ...

[المستمر]

شر البلية ما يضحك

هاد النص كتبو شب مدني من غزة بيوصف فيه حياتو اليومية ، يمكن مكتوب بصيغة مزح بس
بتضل حقيقة الحصار و الخوف و الموت بتطل من كل كلمة فيه

مكتوب بلهجة غزاوية بسيطة

في دليل على الصمود رغم كل شي


اقرؤو ... اضكحو شوي .. و ابكو شوي .. مو شر البلية ما يضحك ؟؟



وما تنسو أهل غزة من دعائكم




اليوم العشرين.. وليلة من قاع الكيلة..


واجا اليوم العشرين..

وكل يوم بنقول هادة أقوى يوم.. وأعنف يوم..
لا بس بجد.. اليوم أعنف وأقوى يوم شفناه..

كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي.. زي الألعاب النارية..

بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..

أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قا عدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..

مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..

ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..

وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..

وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..

والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..

اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..

لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..

مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..

طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..

شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..

الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..

بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..

دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..

بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..

كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واح د بقولك جيش الدفاع الاسرائيلي..

ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..

- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..


هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..

ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكت هم..
لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..


طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..


أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..

إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..

ولو ضل معكم وقت.. إدعولي أصير غني..



ونشوفكم على خير..

منقول من الايميل

[نور]

السلام عليكم و رحمة الله و بركاته
مشاركة أكثر من رائعة
لأنها مشاركة حقيقية من بطل فلسطيني
صحيح فيها كلمتين ثلاثة ما أوافق على التوجه فيهم
و لكنها كانت بعفوية التوجه ، و باللغة الفلسطينية
ومع أني فلسطينية ، بس الصراحة في كمان كام كلمة ما فهمتهم للأسف

المهم ، أنا قرأت النص بتمعن ، لأني شعرت أني أشعر بمن يكتب
فأنا و الحرب أصدقاء أيضا ، تعايشنا في لبنان الكثير من الحروب
و إن كانت أشدها الحرب الأخيرة في تموز 2006
و لكن ايضا متاكدة أن ما عانيناه في حرب لبنان 2006 ما هي إلا جزء يسير مما تعرض له أهلنا في غزة الصمود
فنحن كان لدينا إحتمالات كثيرة و المجال مفتوح
و لكن في غزة أرادوا أن يجعلوها سجن للجميع
و الحمدلله ، لم تسجن صورايخ أبطال غزة ، و كان النصر حليفكم

مجدداً أشكرك أخي المستمر على نقل هذا الرسالة من بطل من أبطال فلسطين
الموضوع ليس ترفيهياً أخي ، لذلك ينقل إلى قسم الأقصى الجريح
و يتم تثبيته لفترة ، لنتعرف جميعاً على يوميات أبطال فلسطين في خلال الحرب على الغزة الصامدة

في أمان الله وحفظه

[فتاة القسام]

السلام عليكم ورحمة الله

اخي المستمر مشاركة رائعة..شكراً لك وبارك الله في هذا الشاب الفلسطيني

الذي يطل علينا بابتسامته الجبارة رغم الالم....

المشاركة الأصلية كتبت بواسطة ملاك النور

ومع أني فلسطينية ، بس الصراحة في كمان كام كلمة ما فهمتهم للأسف

بسيطة هاي..انتي احكي شو هم الكلمات وبوصلك التفسير على طول:d


دمتم بحمى الرحمن

[المستمر]

مشكوره اختي على المرور والتعليق والنقل والتثبيت
واذا بتريدي ببعتلك قائمة المصطلحات

والله ينصرنا

[ابو كارم]

كبير يا حج .. كبير ومعلم وزقرد .
ولا سعد المليجي في قصص ألف ليلة وليلة .
مشكور أخي مستمر على اللطش والنقل والتوصيل

[! ابــو أيهــم !]

......................

الحمدلله
بوركت اخي الفاضل المستمر
لهذه اليوميات من احد ابطال غزة

[فرسان الاسلام]

من اروع ما قرات
يعطيك الف عافية اخي المستمر لنقل الموضوع الينا من ايميلك

ومشكورة الاخت ملاك النور لنقل وتثبيت الموضوع
واذا بتقراي الكلمات اللي مش عارفتيها منيح راح تعرفيها لانو فيها خطا املائي يمكن من تسرع البطل حتى يوصل القصة

[المستمر]

مشكورين جميعكم على تعليقاتكم الرائعه
وكما قلتم
من تحت الحصار نصنع بسمه

[ابن آل مغيرة]

جزاك الله خيراً

........................................

[فارس الليل الأسود]

السلام عليكم
أنا معكم من غزة
وأقول أن ما قاله هذا المواطن الغزاوي صحيح
والله نحن في غزة نعاني كثيرا ومحرومون من أقل الحاجات الأساسي
حتى الماء اثناء الحرب كنا نتيمم للصلاة لعدم وجوده
ويوميا كان حياتنا كما قال المواطن
والكهربا مقطوعة
والطبخ ( اذا وجد ) على الخشب أو الكاز
دعواتكم