مطوع بريدة
ســـــــــالفه
أبو صالح و أبو راشد قاعدين يطالعون الأخبار في بلدتهم بريدة في القصيم.
أبو راشد - وش قاعد تفكر فيه يا بو صالح؟
أبو صالح - أفكر بهالدين العظيم اللي انتشر من أقصى الأرض الى أقصاها. ناظر هالمسلمين الصينيين.
- و الله أنك صادز (صادق) يا أبو صالح. -
بس ترى هذول ما يعرفون من الدين الا القشور. طبايعهم زي الأجانب، بس يصلون. المسلمين الصدز هم العرب اللي يفهمون القرآن و الأحاديث.
- و الله أنك صادز يا أبو صالح. -
و بعد ترى موب كل العرب مسلمين صحيحين. عندك هالشوام و المصاريه و
المغاربه و الله حتى ما يصلون صلاة ربي. ان بغيت المسلمين الصدز تراهم أهل
الجزيرة و الخليج.
- و الله أنك صادز يا أبو صالح.. -
و موب بعد كل الخليج. ترى كل هالدول تسمح بالخمر و بالكنايس، الدين الصدز هو
ديننا حنا يا أهل السعودية.
- و الله أنك صادز يا أبو صالح.
- بس عندك بعد أهل الشرقية فيهم شيعة و حريمهم ما يغطون وجيهم، و أهل الغربية
حريمهم بعد ما يتغطون و يشيشون، و أهل الشمال حريمهم ما يتغطون عن رجالهم
و يجلسون معهم و يضيفوهم. و أهل الجنوب مثل ما انت خابر عندهم بدع واجد.
الدين الصدز هنيه عندنا في الوسطى الي هي نجد و القصيم .
- و الله أنك صادز يا أبو صالح.. -
بس ترى عندك هنا في بنجد الناس يتتنون (يدخنون) و يسمعون الاغاني و العياذ
بالله. الدين الصدز بذا ببريدة.
- و الله أنك صادز يا أبو صالح.. -
بس بعد في بريدة ماهو كل حارة زي الثانية، ترى أكثر أهل بريدة مركبين دشوش و
يشوفون القنوات الماجنة. ما فيه مثل شارعنا مافيها و لا دش واحد.
- و الله أنك صادز يا أبو صالح... -
بس الله يهديهم جيراننا موب دايم تشوف عيالهم في المسجد، و لا تشوفهم دايم في
صلاة الفجر. الصراحة يا بو راشد ما فيه في الحارة يصلون الفجر دايم في المسجد
الا أنا و انت.
- و الله أنك صادز يا أبو صالح..
-بس أشوفك يا بو راشد هالأيام ما تخشع زين في صلاة الفجر!!