[أنيس النفوس]

السلام عليكم حبيت اشارككم الموضوع مواقفي الصدفية على دفعات ..

اول موقف صادفي في الحلاق ... في البداية ما كنت اعرف ان عندي صدفية كنت اظن انها قشرة حادة وانا عادة ما اخفف من شعري الا شي بسيط والحلاق ما يشوف حالة فروة راسي بشكل واضح بسبب الشعر ومع هذا يسال كل ما اروح له: ايش في صديق؟ اجاوبه بانها قشرة وهو يرد يقول: قشرة كثير في راس مال انت (هو هندي) قدام الناس اللي تنطر دورها وانا اموت من الاحراج لان عينهم تتوجه علي اقول له شنو يسوي ياصديق ما يخلي طبيب مايروح بس مافي فايدة .. الله كريم وفي مرة من المرات سالني نفس السؤال عاد قلت بغير الجواب وقلت له هذا شوفان يطيح فوق راس مال انا ، اللي يقول:روح سو صفا اول بعدين سو حلاق !!!

لكن بعدها عصبت عليه وزجرته وقلته شغل ما انت يسوي حلاق وبس مافي قرقر(يعني هرج بالعربي) مني مناك

ولكن تخيلو حتى اني في مرة من المرات سألته: في علاج حق القشرة (ههههههه من كثر اليأس وقلت يمكن علاجي عند هالمقرود) يقولي خذ واحد زبادي وخلي معه زيت زيتون يجي راس مال انت كويس ، انا بعد ماجذبت خبر من طلعت من عنده مريت السوبر ماركت اللي يمه واخذت الوصفة العجيبة ودعستها في راسي لكن طلع خرطي ما منه فايدة

وطبعا انا مستقر على نفس الحلاق عشان اتحاشى اسئتله ولكن ماقدرت اتحاشى احراج الناس اللي متواجديتن في الحلاق

واذكر لكم موقف كان من اصعب المواقف في الحلاق كمان .. كنت ناوي احلق شعري كله(يعني صفر) عشان استخدم دوا جديد.. قعدت على كرسي الحلاق (وعشان ما انسى ظليت اروحه بالظهر فقط حزة الغدا .. تعرفون ليش) وقلت له شيل صفر وبدأت يشيل الشعر وكل ما شال شوي توقف المكينة من التعرجات وتتساقط القشووووووووووور وانا بموت من الاحراج وخايف حدي احد يدش ويشوف حالي ... الحلاق مستغرب وخايف يهرج لانه شاف وجهي شلون .. المهم وصلت على النهاية واللي خفت منه صار ان واحد دخل الحلاق اعرفه كمان وما مسكها في خاطره اللي يقول شنووووو هذا صابغ فروة راسك والا شنو ؟؟؟ وانا مو عارف شنو اجاوبه وظليت ساكت واصيح من داخلي وقررت انا ما احلق مرة ثانية صفر... المهم رحت على البيت وانا لبس قبعة عشان اغطي فروة راسي ودايركت على المراية اشوف واناظر حالة راسي وشفت وياليتني ماشفت نصف راسي لونه ابيض خالص والثاني لونه طبيعي اتخيلي اش صار فيني انا ماكنت مدرك مدى سوؤ حالة فروة راسي

هذا شي من لا شيء .. سأكتب لكم مواقف اخرى لاحقا

أنيس النفوس