[وســـــــــام*]

فى إحدى الليالى الرمضانية .. كنت فى زيارة أقاربى وألتقيت
بكريم .. يعرف الكل شقاوته الطفولية فهو كثير الحركة والشغب ويثير المشاكل اللطيفة مع من حوله

دخلت فى حجرة واتبعنى ، استغليت فرصة خلوتى معه بدون وجود الكبار ، ودار بيننا هذا الحديث

(اعتذر أن الحديث سيكون بالعامية ، لكن أحببت أن تعيشوا معى الموقف كما كان )

– هتعمل فى رمضان ؟
– هصوم
– وايه كمان
– وهصلى
– ما شاء الله ، وايه كمان هتقرأ قرآن
– ليه ؟
– لأن شهر رمضان هو الشهر اللى نزل فيه القرآن
– طيب بس ماما مش بتعقد معاى ( لا أساله لماذا؟ لإنى اعلم أن والدته تعمل)
– طيب ، ما تقرأ أنت
– أصل أنا ما بعرفش ، فى حاجات مابعرفش اقرئها
– ليه يا حبيبى ؟ هات المصحف اللى هناك ده . (جاء ليجلس بالقرب منى وفتحت معه أول صفحة)
– ديه سورة الفاتحة ، تعالى نقرأها مع بعض
– آه آه أنا حافظها
– جميل يا كريم
– وايه كمان (سرد بعض السور القصار) قلت له ما شاء الله طيب ما تسمعنى حاجة (فقرأ)
– ما أنا بروح للشيخ فى الجامع ، بس عايز حد يقعد معى
– طيب ، ابقى قول لماما وهى فاضية تعالى نقرأ شوية قرآن مع بعض
– طيب ( وضع كريم يده على سورة البقرة )
– ايه ديه
– ديه سورة البقرة بس أطول شوية من الفاتحة
– ياه بس ديه طويلة أوى
– أيوة بس جميلة أوى لو قعدت كل يوم تقرأ شوية منها هتحبيها وممكن تحفظها .
– طيب يا كريم لازم أمشى دلوقتى اشوفك قريب بقى ادينى بوسة وحضن كبير علشان لازم امشى (أعطانى إياهم بدفء طفولى ) لم أكن اتخيل أن هذا الطفل الفركوكة الشقى بهذة الروح الجميلة -حفظه الله لوالديه -

بعد هذا الحوار ، فكرت فى كثير من الأطفال الذين لا يجدون وقتاً لدى أهلهم فى الجلوس معهم ومسامراتهم.

فى اعتقادى أنه ليس كافياً أن نذهب بأطفالنا إلى المساجد ونعتمد على الشيوخ - حفظهم الله - كلياً

فلما لا نعطى لهم جزء من أوقاتنا ولو بالأجازة لمتابعتهم ونعرف إلى أين وصلوا بالمسجد ومعرفة ما يشغل بالهم ، فهم لهم حقوق علينا

ما أثمن اللحظات ونحن بالقرب من فلذات أكبادنا فهى دقائق لن تعوض فاغتنموها

ما أجمل أن يشعر أولادنا بأننا بالقرب منهم فى كل وقت نكون تحت أمرهم إن أرادوا شيئاً
فالحياة ليست مال وعمل فقط
بل حضن أبوى وحب متبادل منا لأطفالنا فهم أغلى من كنوز الدنيا

أعانكم الله على تربية أولادكم وتلبية طلباتهم المادية والمعنوية