شهر و سنة عم تمرق الأيام
و الليل باكي فوق خيمتنا
و أطفال تحت البرد عم تنام
خيي و ريح الظلم عصفتنا
وجدي مريض بتاكله الأسقام
أختي و أنا منلوك دمعتنا
أمي حزينة دموعها أرقام
أرقام تحكي بُعد نكبتنا
تحكي عن المعراج يا إسلام
عن مهد عيسى و عن كنيستنا
و تحكي على جور خوالنا و عمام
و تسكب ملح على جرح طعنتنا
لوحات تعجز ريشة الرسام
بُعد و دِمى و دموع عيشتنا
نحن يا أمي بذل ما بنام
ورث الردى و الفدا عادتنا
لازم نفجر حمم من الخيام
و نسمع التاريخ صرختنا
و نحن يا أمي للوطن إعلام
من دمنا منكتب قضيتنا
يا أمي أنا دمعة من الأيتام
و نوح الحمامة فوق تينتنا
فية زيتون معبعبين كمام
و ريحة خبز طابون حارتنا
قوموا اسألوا العرقوب و الخيام
تبنين تتغنى برجولتنا
فينا الكرامة تزايدت اكرام
الأغوار عم تبكي على سيرتنا
اعتز المجد فينا و عملنا وسام
تيعلقه بصدر أمتنا
يا أمي كفانا نعيش بالأوهام
كذب و دجل و وعود حاجتنا
حاجتنا نشكي الظلم للظلام
و نبوس إيد اللي دبحتنا
يا أمي كفانا نعيش بالأحلام
ما عاد بدها شرح حالتنا
بدها بارودة رصاصها الأقلام
و القنبلة توقع شكايتنا
بدها رجولة و تضحية و إقدام
بدها عروبة تصون ثورتنا
بدها عروبة تحطم الأصنام
و تشيل كل خاين من عروبتنا
و القاهرة ترجع لأرض الشام
تقول يا أحباب الوفا عودوا
بعزة و شرف يطيب عودتنا