[Algannabird]

دنيا الغابة


والله يادنيا دا احنا غلابة من غير ذنب فى دنيا الغابة
أيوه دى غابة متستغربش غابة كبيرة وفيها ديابـــــة
فيها تعالب فيها وحوش بس وحوش أقلام و كتابـة
لابسين وش ال بنى آدمين عاملين فيها على و شحاتة
كله بياكل لحم أخوه حتى الديب ما ياكلش ديابــــــــة
****** ******* *******
هى الدنيا جرى فيها آه وآه اللى فاضل لنا نبكى عليه
ذل وخنقة وتكتيفة غبرة واللا روتين فوت بكره يا بيه
واللا رغيف العيش محلاه سعره يا ناس بقى ربع جنيه
واللا السكر واللا الزيت واللا اللحمة طب ناكل ايه؟!
أما حديدنا يا عينى عليه عزه خلاص بقى عبـأ عليـه
****** ******* *********
قالوا تعليم روحنا اتعلمنا وسنين قضناها فى مكاتبــــنا
وبعد دا كلّه بنسأل فينه التعيين قالوا مالكوا ومالـــنا
روح معهد أو روح كلية وبعد ما تخلص روح هويــنا
بحلم نرجع بنى آدميين بحلم يرجع مجد ماضيـــــــنا
تبقى الغابة دنيا جميلة وتبقى الآخرة جنة يا اخيــنا


مع تحياتى /
حسام عفيفى