والله لولا الخوف من ربي وكرهي للذنوب
بالحرام إن التراب ابعد عليك من النجوم
يا إلهي تطمئن بذكرك أرواح وقلوب
لا إله إلا أنت نسجد له ولا غيرك يدوم
وجهك الباقي وعبدك ينتظر منك المكتوب
ما له إلا ما كتبت وما يطول إلا المقسوم
يا العظيم اللي في علمك جنة ونار وغيوب
تنجي أمي من عذاب النار والقبر الكتوم
يمه الله اللي يعلم يوم أودعك مغصوب
يوم أحطك في القبر ما ادري أقوم أو ما أقوم
ما هقيت امشي ولا خطوة ولا الحق غروب
من عرفت إن الفراق اليوم صار أمر محسوم
صارت الدنيا تدور ولا عرفت الدرب نوب
مثل الأعمى صرت يما ما علي شرهة ولوم
أل ويكاد إني غديت في صوب والدنيا بصوب
والحياة الله يجيرك صارت أقسى من اللزوم
كل ما أذكرك يما ينحرق شمع ويذوب
يختنق صدر المفارق كثر ما صار محروق
أذكرك وأنت هنا وهناك يا صعب الهروب
وين ما أناظر أشوفك في عيوني كل يوم
أتخيل طلتك ومشيتك في ها الدروب
حتى صوتك أسمعة نفس السوالف يا رحوم
صار بيتي في عيوني موحش وكله عيوب
من رحلت لا خبر ولا علم ولا عين تنوم
ما بقى للبيت نور وما بقى للجرح ثوب
ولا بقى إلا ذكريات بيني وبينك تدوم
يما الله لا يعاقبني ولكني أتوب
ليت ربي ما خلق فرقا ولا موت وهموم
ادري الجنة تحت رجليك ولله الوجوب
اسأل الله الرضا والفوز يا الحي القيوم