ضيعت حبري والقلم والدفاتر
وحروف شعري تفتقر للجزاله
في وصف دمع العين وسط المحاجر
أو وصف واقع بين حلم وخياله
الوضع فينا تعتريه المخاطر
من كل حدب وصوب ينشر ضلاله
شفت الزمن دوّار والكل عابر
والظلم سيّّد في غياب العداله
الناس صارت كل ابوها عساكر
في حزب ((لا للصدق))كذب ونكاله
اللي يقول الحق سمّوه ( كافر )
واللّي يسايرهم يحيّون فاله
صار الحيا في عرفهم ( شي غابر )
يارب سترك .. وش بقى من جهاله
خلاص تبت .. ولازم إنّي احاذر
لأنّي شربت المرّ حتى الثماله
ودي عن العالم أغيب وأهاجر
وأرحل بعيد وأعلن الاستقاله
ماعاد فيني حيل أصبر وأكابر
والقلب ألهبني بكثرة سؤاله :
ليه الزمن مقلوب والوقت جاير
والصدق عند الناس صعب احتماله
وليه الرّدي شامخ بأعلى المنابر
والشهم يتناسون طيّب فعاله
وليه اختفت كل القيم والمآثر
وصارت بدلها تستبد ( الحثاله )
وياما وياااما اسئله في الخواطر
وتبقى الاجابه لليالي محاله
لاصار وضعي مثل هالناس عاثر
بدفن حروفي .. واعلن الاستقاله