[راغبة في رضا الله]

السلام عليكم ورحمة الله وبركاته
بداية اريد ان اقول للغالية ورد انا قلت احب الطبخ ولم اقل اني ماهرة فيه يعني يمكن القول لا بأس بي
وللغالية أمة الله شكراً على حدسك
وها أنا ألبي الدعوة كما وعدتكم وسأقدم اجاباتي وأكلاتي س1..عرفينا عن نفسك وخاصه في الطبخ ؟
لدي مقومات النجاح ولكن تنقصني الخبرة والممارسة الدائمة فعلى هذا يمكني ان اعتبر نفسي في وسط سلم المهارة في الطبخ
آه ونسيت أقول لكم انه لدي شهادة عالية بدرجة امتياز مع مرتبة الشرف بحرق البيتزا واللحمة
س2..وجبتك المفضله؟
صراحة أنا أحب الأكل كثيرا ولكن ليس معنى هذا أني آكله بكميات كبيرة وانما عنيت اني احب تذوق الاصناف المختلفة من الطعام ومن هذه الأكلات
السمك -المحاشي واليالنجي-الملوخية الخضراء(ولا احب المجففة)-الكبة -البيتزا ..
سوف اكتفي بهذا القدر لأنه شكلي رح ضل عد للصبح
س3..طبق تحبين تحضريه كثير؟
البيتزا لازم على الاقل حضرها مرة بالاسبوع
بس كنت كل مرتين لازم احرقها مرة ولما يجي زوجي من الشغل كان يسألني
شو غدانا
جاوبه بيتزا
يجاوبني بيتزا محروقة ولا عادية؟
بس مو الحق علي الحق على ماسة ولين لأنه قصة حرق الاكل مابلشت معي الا بعد ماولدت ماسة ولين (لقيتلي حجة يعني )
س4..متى تعلمتي الطبخ؟
مو من زمان كتير من حوالي 3 سنوات يعني بعد ماتزوجت لأنه شغلي بالعيادة قبل هيك ماكان يخليلي وقت للطبخ غير يوم الجمعة

س5..موقف ظريف صار معاك في المطبخ ؟
طيب هلأ رح احكيلكن هالموقف بس هو مابيخص الاكل
بعد ما أنجبت بناتي التوأم ولسا ام جديدة فكانوا طول الوقت يبكوا وانا مو عارفة راسي من رجليني ,فشو مرة كنت عم عقم ببرونات (زجاجات) الحليب وحطيتهن عالغاز ليغلوا
طبعا وقتها انا كنت ببيت أهلي وهو بيت عربي تقريبا يعني المطبخ خارج الغرف منعزل وكانت الدنيا شتا فمتل ماقلتلكن حطيت الببرونات عالنار وفتت وسكرت الباب وانشغلت مع حبايب قلبي وهن واق ويق والا بعد شي ساعة و بنسمع جرس الباب عم يدق وخبط على باب البيت وكأنه زلزال لا ونسيت خبركن قبل مايدق الباب بشوي سألت اهلي كأني شامة ريحة حرق معقول من برا ,اي بقى لما سمعت الباب عم يدق هيك تذكرت ساعتها وقلت
يييييييييي الببرونات ولما طلعنا عينكن ماتشوف الدخنة معبية الحارة والجيران كلن صاروا قدام بيتنا
وأنا وشي صار لونه بنفسجي
الحمدلله ما كان فيه اضرار غير الببرونات
بس قعدت نص ساعة وانا قول للجيران معلش امانة لاتواخزوني لسا ام جديدة وهن يضحكوا علي
ايه فكان كتير موقف حلو وعطاني علامة عالية باختصاص الحرق
س6..يعتمد عليك في الطبخ او لا؟
والله اذا ماكنت مشغولة بشي تاني ايه يعتمد علي ونص وببيض الوجه بس لازم كون متفرغة بس للطبخ بس اذا ماسة ولين جنبي بدا تحترق الطبخة اجباري
س7..نصحيه توجهينها لطباخات الشفاء الاسلامي ؟
الحقيقة مجموعة نصايح عالسريع ان شاء الله تكون نافعة
1-عجبني كتيرنصيحة كتير من الاخوات انه لازم نسمي قبل الطبخ
2- لكل أكلة سر لازم تعرفي شو سر النكهة لحتى تطلع معك الاكلة طيبة
3-دائما ضيفي نكهتك الخاصة اللي بتتميزي فيها عن غيرك بحيث اذا زوجك او اهل بيتك اكلوا بمكان تاني دايما يلاقوا اكلك اطيب او على الاقل بسبب تعودهن عليه
واخترعي انا كتير بحب الاختراعات بالطبخ وبضيف مواد مو من اصل الطبخة
4- تذكري دايما ان المبذرين هم اخوان الشياطين واطبخي على قد مابتاكلوا لحتى ماتكبي شي
س8.ماهي الأكلة التي تحبها عائلتك وأنتي لا تحبيها ؟
كل شي فيه مرقة حمرا ما بحبه لأنه بيتعبلي معدتي ماعدا الكوسا والبيتنجان المحشي بحبه كتير

س9.. اول طبخه طبختيها ؟؟
معكرونة لهيك بتطلع معي كتيرطيبة
س10..كم مره احترقت الطبخه معاك ؟؟
أنا نصبت نفسي ملكة حرق الطبخات بالعالم العربي
س 11.. اول كتاب طبخ اعتمدتي عليه ؟؟
الشيف رمزي
س12..مين قدوتك بالمطبخ ؟؟
أكيد متل ماجاوب الكل ست الحبايب في غيرها يعني
س13.. تحبي احد يساعدك بالطبخه ؟؟
والله مابقول شي اذا حدا قطعلي البصل وقشر التوم وفرم البندورة يعني هيك أمور يعني جهزلي كل شي وأنا بس طبق الطبخة

س14.. اذا خربت عليك الطبخه ماذا تفعلين ؟؟ ترميها ولا تضطري تاكليها؟؟
أكيد بحاول قدر المستطاع ما ارمي شي لأني مابحب الاسراف وبلاقي دايما طريقة للإصلاح
أما اذا خربت لدرجة لايمكن تنأكل ببعتها لجيراننا اللي بيربوا حيونات من شان يطعموهن ياها
قدر امكاني مابحب كب نعمة ربنا
س 15.. ما رأيك بــ الفكرة لقاء وحـــوار مــع ضيفة مطبخ الشفاء الاسلامي ؟
فكرة ظريفة كتير وان شاء الله تكون نافعة
س16 مـــيـــن ترشحى بعدك او ممكن تختاري اللي بعدك ..
حبيبة قلبي الفراشة المتألقة واذا كان ضيف الأخ الكريم أبو الوليد
س 17 من اي دوله انتي ؟؟
قسمتنا يد الاستعمار الطاغية القوية..
فبتنا نسأل بعضنا عن الأصل والهوية..
سوريّةٌ ذلك ماكُتب في بطاقتي الشخصية
وهي بلدي أفديها بقلبي وعينيَّ ..
وأحبّ شعبها فهم أهلي الكرام وأُناسيَّ
ولكنني مسلمةٌ من أصولٍ عربية ..
وبلدي هو كل بقاع الأمة الإسلامية ..
بقلم راغبة في رضا الله
ان شاء الله تقرؤون تتمة القصيدة في قسم الشعر

س 18 وماهي الاطباق الشعبيه المشهوره في بلدك ؟؟؟
محافظتي دير الزور مشهورين بالبامية وغالبا يعملونها (ثرود ) وسأروي لكم طرفة عن ذلك
اذا سئل سكان دير الزور ماذا تطبخون اليوم على الغداء
أجاب 90 % منهم نطبخ بامية
و ال10 % الباقون لديهم بامية بايتة من مبارح
س 19وماهو الطبق الشعبي الذي ما زلت تطبخينه وتحبينه ؟؟؟
الملوخية الخضرا والبيتزا
س 20 اكتبى لنا طبق مفضل من اختيارك ... او من مواضيعك ؟
سأكتب لكم مجموعة أكلات سريعة وسهلة ولذيذة ان شاء الله تستفيد منها المرأة العاملة


وعدتكم بكتابة بعض الأكلات البسيطة واللذيذة ولكن اعذروني انه مارح أضع صور, ان شاء الله كل ما طبخت وحدة من هالاكلات بصورها وبفرجيكم ياها
والاكلات هن
سمك مشوي بالفرن
بطاطا مسلوقة مع لحمة بالفرن
مامونية بالجبنة والحليب
ان شاء الله ينالو اعجابكم
1- سمك مشوي بالفرن :
المكونات : سمكة كبيرة مفتوحة من الظهر -بصل -ثوم مهروس-فليفلة خضرا -ليمون-حبة بندورة-دبس رمان-معلقتين زيت زيتون-ملح
أول شي بحب قول انه انا مابحب البهارات بالطبخ وخاصة مع السمك لأنه بحسها بتخفي وبتغير طعمة السمك اللذيذة واذا كان السمك مقلي ما بضيفله شي غير الملح وبعدين بحطه بخلطة البيض وبعدين الطحين والبقسماط
وطبعا فينا نحط خلطة بجنبه بعد الاستواء بتتكون من الثوم وليمون وزيت زيتون وخردل حسب كل واحد شو بيحب خلطة أما كترة الحمض فكمان بحسها بتروح طعم السمك وانا بعرف انه كتير من الشيفات الكبار ما بيضيفوا للسمك المقلي والمشوي الا الملح
طيب هلأ بنرجع لطريقة تحضير السمك المشوي
بنجيب صينية الفرن وبندهنها بشوية زبدة وبعدين بنحط فيها السمكة المملحة قبل بوقت والمفتوحة على الظهر وبندهن السمكة بدبس الرمان اللي انا بشوفه بيعطيها نكهة كتير طيبة وفي ناس مابيحطوه الا قبل الاستواء بشوي
بعدين بنحط فوق السمكة شرايح البصل والليمون (بعد مانقشره ) والفليفلة والبندورة وزيت الزيتون والثوم يعني باختصار كل المكونات اللي ذكرناها وآخر شي بنحط بأرض الصينية كاسة ماء صغيرة وبنغلف الصينية بالقصدير وبنحطها بالفرن لحتى تستوي
وصحة وعافية


2- بطاطا مع لحمة بالفرن
المكونات بطاطا مسلوقة ومستوية كتير -لحمة مفرومة ناعمة -بصل مفروم ناعم-بقدونس حسب الرغبة -ملح -زيت أبيض العافية أو زيت زيتون-جبنة بقرية عربية حلوة واذا كان اشتريتيها مالحة من السوبرماركت فيكي تحطيها قبل بيوم بالماء منشان تروح ملوحتها
طريقة التحضير :بنهرس البطاطا المسلوقة كتير منيح وممكن نضيفلها معلقتين زيت زيتون او زيت العافية لحتى تطرا اكتر وتنمد معنا بالصينية
وممكن نخلطها بالخلاط مع الثوم المهروس
بنحضر الحشوة بالطريقة المعروفة للحمة الناعمة وهي بانه نحط اللحمة عالنارمع شوية زيت عافية وبعد ماتستوي بنضيفلها حبة بصل صغييرة مفرومة ناعمة وبنحرك لحتى تستوي اللحمة والبصل وآخر شي قبل مانطفي النار بتكة صغيرة بنحط البقدونس المفروم وهو مو اساسي وممكن نحط معلقة فلفل صغيرة ومعلقة دبس فليفلة كتير صغيرة مع اني انا شخصيا متل ما قلتلكم مابحب البهارات وهيك الحشوة بتكون جاهزة
بنجيب صينية الفرن وبندهنها بمعلقة طحينة لحتى ماتلزق البطاطا وبعدين بنحط طبقة رقيقة من البطاطا المهروسة بعدين فوقها بنحط الحشوة وبعدين طبقة تانية من البطاطا
وبنخلها الفرن لفترة قصيرة وممكن ندهن سطح البطاطا بشوي بيض لحتى تاخد وجه
طبعا المكونات كلها مستوية لذلك نحنا بنحطها بس لحتى تشقر البطاطا وتتحد المكونات مع بعض وبنطلعها لحتى تكون جاهزة وهي هي الطريقة
بس لحظة نسينا شغلة
انا بحب الجبنة كتير لهيك بحشرها بأغلب طبخاتي وهون انا بضيفها بس بعد ما اتأكد انها خالية من الماء وببشرها بالبشارة فوق سطح البطاطا وبرجع دخل الصينية من جديد عالفرن لدقيقتين بس لبين ماتسيح الجبنة
بتمنى الكل يجرب هالاكلة لانها كتير طيبة
3- مامونية بالجبنة والحليب
المكونات كاستين سميد -كوبين حليب-جبنة حلوة بيضامتل اللي حكيتلكن عنها قبل شوي بس ضروري تكون الجبنة حلوة مافيها ملح ابدا
سمنة بلدي او زبدة بقري -جوز هند حسب الرغبة -ماء
طريقة التحضير :اول شي انا عادة بالمطبخ مابستخدم مقادير وبقدر بالنظر
نضع معلقتين سمنة بلدي بالطنجرة عالنار ونضع السميدوبعده السكر حسب الرغبة وبنحركهن لحتى يتحمصوا منيح -بس ماينحرقوا-وبعدين بنحط فوق السميد 3 كاسات مي وبنحرك وبس نشوف السميد بلش يتخن ويستوي بنضيف الحليب وبنحرك ( وماتنسوا اهم شي بالعملية هو التحريك المستمر يعني مانترك السميد لوحه عالنار ابدا) وبس يقارب على الاستواء بنضيف الجبنة بانه نبشرها او نقطعها قطع صغيرة لانه هي اصلا رح تسيح دغري وبنحرك شوي وخلص نرفعها من النار ونصبها بأطباق التقديم وممكن نحط على الوجه رشة جوز هند
وصحة وهنا
كمان بنصحكن كتير تجربوا هالاكلة لانها كتيرطيبة وسهلة وسريعة
وهيك بكون خلصت ضيافتي بالمطبخ بتمنى تكونوا استفدتوا وماكون ضيفة تقيلة عليكن
والسلام عليكم ورحمة الله وبركاته