[nisreen1811]

حبيبتي عازمة
احنا والحمد لله بالف نعمة وفضل من الله وبنتمنى لكم الخير والسلامة
شكرا جزيلا لك على الافادة

طبعا ما في اي حجة ادافع عن حالي بخصوص سوء الطبخ لانه بعرف انه مليان وصفات وتشكيلة وصحية بس والله كنت مشغولة بمرض ابني الوسطاني زي ما بتعرفي من سنتين ولسا ما لحقت اصحى منه اجاني موضوع بنتي الكبيرة وكمان دوامي في الشغل طويل كتير واول مرة اطبخ كانت بعد ما تزوجت طول عمري اكره المطبخ واعمل مع امي مشاكل مشان ما بدي اتعلم

طبعا انا بحاول الحق حالي واصلح الوضع هلأ (انقاذ ما يمكن انقاذه) - دايما بحاول ما اكرر طبخات وادور على وصفات جديدة واسجلها واعمل جداول للتشكيلة - الله وكيلك - بس مع الغاء البيض والحليب والدجاج - والله صعبة - بس مش مشكلة - مؤقتا لغاية المراجعة - وبالنسبة لوصفاتك انا متاكدة اني راح اسالك عن شغلات كتيرة .

خرابيط الشيبس وشلته انا دايما لما تطلبها بقول الها هادي سموم يا ماما - ومستحيل اسممك بايدي - بعمل الها تفاح او جزر او خيار - حتى حبيبتي بتحب البندورة - بس طبعا هلا ما في بسبب الحساسية

بس والله بتاكل يوميا بسكوت او كيكة جاهزة + عصير المغشوش + شغلتين من المدرسة ما بتقبل تقول لي شو هم - والسندويشة دايما بترجع الا اذا كانت برغر او سكالوب او نقانق - وبالرجاء او بالغصب او العقاب ولا يمكن تاكلها - وممكن جدا ترميها بالزبالة
واحيانا شيء اضافي بالبيت بتاخده (خاوه)

وهادا الشي بدي سنين ليصير اكلي ازكى منه (والعمر للعايش) اذا صار - انا بحاول قد ما بقدر والله يهديها ويقدرني ارضيها يا رب

انا والله يا عازمة بديت اغير كتييييييييييير شغلات بحياتي من يوم ما مرضت بنتي وراح اضل اغير للاحسن طول ما الله اعطاني عمر واهم شيء الاكل الصحي والتقرب الى الله.

انا بالغلط كتبت زيت بذرة الكتان وانا فعلا قصدي بذرة الكتان نفسها لانه فيها اوميغا 3 - زي ما كتبوا ناس كتير تحسنوا معها بصراحة مفكرة فيها بس تخلص علبة الفيتامين اللي عندي لسا بدرس الموضوع

الله يشفي بنتي وابنك شفاء تام يا رب ويرحمهم برحمته الواسعة امين يا رب العالمين