ملتقى الشفاء الإسلامي - نهفات الختايرة ع الماشي :

الأولى بدرعا .. شافت الجندي عم يبرم كوع بالدبابة وعم يخبط بالبيوت عن جنب وطرف وهي قاعدة عم تتفرج باندهاش ... وبعد ما نزل الجندي قالتو .. طيب يا خالتي ما بتعرف تسوق .. ليش عم تسوق دبابة!!

الثانية بحمص وقفوها قناة الدنيا سألوها : شو يا حجة انشالله ما اتضررتي . قالت لا والله البيت انسرق .. قالوا : مين ؟ ، قالت : العصابات الإرهابية المسلحة ، فرحوا كتير بالجواب وسألوها : لوي ن رايحة هلق يا حجة ؟ قالت رايحة جيب دهان .. ، ليش ؟ ، قالت : يخرب بيتهن هالعصابات مو تاركين محل بالبيت إلى وكاتبين عليه .. الأسد أو لا أحد !

التالتة بدير الزور ... حطو حاجز جنب بيتها .. طلعت لعند الجنود وأخدتلهن معاها غدا غير شكل وابريق مي وابريق عيران .. وبعد شوي جابتلهن التحلاية .. وبعدها الفواكه المشكلة .. وبعدها العصير والشاي
وآخر شي وبعد ما شكروها قالتلهن ... وهلأ يا خالتي .. ما بدكن تنشقو؟؟؟!!

الرابعة بدوما كان في ختيارة كل ماتشوف الأمن ماسك شب من شان ياخدو تجي وتخلعو كف وتئلو ولك يامو ما التلك لا تطلع من البيت وتمسكو من ايدو وتاخدو .

الخامسة بحرستا المكرو وقف على حاجز وفي ختيارة قاعدة اخر مقعد فتحت الشباك وسالت العسكري :"انتو يا ابني عصابات مسلحة؟" قلها لا حجة نحن الجيش قالتلو :اي اضربين !!

السادسة من بانياس ختيارة عملت صينية بيتزا وجابيتا عالحاجز أكلو العساكر لحتى شبعو ئالولا تسلم ايدك ئالتلون ولا يهمكم اسا بس يسقط النظام الكن أطيب منا

السابعة في وحدة ختيارة كل ما تمرق جنب الحاجز تقلهن شالوم ... انزعج منها الضابط .... قلها ما عيب يا حجي تقولي شالوم ... قالتله يه بتعرف تحكي عربي والله فكرت الجيش الاسرائيلي هوي اللي وصل لهون ...