اهدي لكم هذه المره من اروع ما قيل في الوطن ( اريد الكل يقراها)

ابو الفاروق · #1 12-03-2007, 02:50 PM

إللي إمضيٌع ذهب
بسوگ الذهب يلگاه
بالغربه شِفتْ التَعب وإتعلّمت معناه
وإتعلٌمت عالسهر .. والسكته .. والصفناه
ذليت ذلْ النهر من ينگطع مجراه
وإعرفت كل شي إعرفت ...
حتى النخل ينحني، لريح السفر من يجي و جايب غريب إوياه
ألله !! يا هالوطن شمسوي بيّه ألله
نيرانه مثل الثلج
كلما تدگ عالضلع
أبرد و أگول إشاه
إللّي إمضيّع ذهب!!بسوگ الذهب يلگــــــاه
وإللي مفارگ محب ...يمكن سنه وينســــــاه.
والطاح منّه الگلب ، گلب إصطناعي انلگه و يشكلونه إهنـــاه..؟ ؟ ؟
بس إلمضيٌع وطــــــــــــــن
وين الوطن يلكَـــــــاه ؟ ؟ ؟
******
آه ياوطن ، يا خبز ، يالشارتك تكتل!!
آه يا وطن ، يا طفل ..
هِنياله منْ صاغ إلك نبض الگلب جنجل !!
يا وطن .. زَفة گمر يا عراگ زَفة گمر
ونجوم إله إتهلهلْ !!
عذّني ما عذبٌك ..إكتلني ما أكتلك ..
طبع اليحب ينكتل موش اليحب يكتل
آه يا وطن يا جَذِر !!
والجذر هم بيه طبع ..
لو مات من العطش للوادي ما ينزل !!
علمني الفراگ ، اعزف لحن غربتي إبقيثارة ألشوگ
أسهر و أحن وأنفعل وأتمنى واشتاگ
مامش مثل ديرتي
لو نمشي طول العمر !!!مانلگه مثل إعراگنا إعراگ

الشاعر الكبير: كاظم اسماعيل الگاطع

الذين يشاهدون محتوى الموضوع الآن : 1 ( الأعضاء 0 والزوار 1)

🤍 قناة "وَشِفَاءٌ لِّمَا فِي الصُّدُورِ" 🤍