طريقة عمل الحواوشى

[ميلو مان]

السلام عليكم و رحمه الله و بركاته
انا الشيف ميلو و هقدملكم النهاردة طريقة عمل الحواوشى المصر في البيت بطريقة سهله جدا
و بيعتبر الحواوشي من اشهر الاكلات الشعبية اللي بتتقدم في مصر ، و هو بيتعمل بطريقة سهله جدا
و المكونات بتاعته مش غالية بالعكس رخيصة لو عملنا لحمة مفرومة قليلة و زودنا بصل و توابل هاتبقي اكلة موفرة انشالله ، بس في حاجات صغيرة لازم نخلي بالنا منها زي درجة حرارة الفرن و زي كمية البصل ، و زي ان العيش يكون طري ومش ناشف .
اولا المقادير :
لحمة مفرومة (الكمية علي حسب رغبتك)
بصل مفروم و ياريت يكون بكثرة
فلفل حامي و الكمية براحتك
شطه ناعمه
بهارات لحمة
ملح و فلفل اسود
عيش بلدي طري
بقدونس مفروم و ده وجوده حسب رغبتك بردو يعني ممكن تلغيه
زيت زيتون
طريقة عمل الحواوشي :
الاول نبشر البصل بالمبشرة و بعدن نحطه في طبق كبير
و نحط معاه اللحمة المفرومة و الملح و الفلفل الاسود و الشطه
نقطع الفلفل الحامي و نحطه بردو ، و نفس الكلام مع البقدونس نقطعه و نحطه علي باقي المكونات
و بايديكي بقي قلبي و اعجني كل المكونات دي مع بعضها لحد ما تبقي عجينه حلوة كدة و ماسكه نفسها
دلوقتي بقي هنفتح العيش البلدي و نفصل وشه عن ضهره
و نحط اللحمة المفرومة جوة الضهر و نوزعها كويس في كل الرغيف
و بعد كدة نقفل الرغيف بالوش بتاعه تاني و نقفله كويس
بعد ما نخلص كل ارفغة العيش و اللحمة تخلص
هانجيب شوية زيت زيتون و ندهن كل العيش من فوق و من تحت
دلوقتي هتولعي الفرن و تخليه يسخن ، و بعدن تحطي ارغفة الحواواشي علي شبكه الفرن
و تقليبه علش الوش التاني لما الوش الاولاني يحمر بس خلي بالك لحسن يتحرق
بعد كدة طلعيه و حطيه في طبق التقديم و قدمي معاه مخلل و طحينه و سلطة كمان
و في النهاية اتمني ان طريقة عمل الحواوشى المصري تكون عجبتكم و انتظار رايكم
و شكرا للمتابعة ،، الشيف ميلو