لا ضاق صدرك

[*لمسة أمل*]

لآضاق صدرك عالي الصوت جره
لو كان قلبك ما يطاوعك مسرور

دنيـــــاك لو تسوى من الحِزن ذرّه
ما كان تاليها توابيت وقبــور

وما كـــــــان للكافر بعمره مسره
وما شفت في ملكه ملايين وقصور

العمر يمضي بين حـــــــلوه ومره
والموت حق وقابض الروح مأمور

دام الحيــــــــاه الفانية مستقره
ورزقك يجيك وبين الأجواد مستور

لاتنشغل بالــــــوقت برده وحره
واحذر تصير بقسمة الناس مقهور

وحكم القدر لاجـــاك خيره وشره
أشكر عظيم الشان والذنب مغفور

والمجلس اللي يزعجك لا تمره
خله تراك بشوفته منت مجبور
والرجل سقها في صحاصيح بره
ومد النظر مابين ريضان وزهور

لا صار وجه القاع ما فيه جره
والمشي حافي والثرى تو ممطور

ساعات صمتٍ ما وراها مضره
تسوى الكلام اللي به إذنوب وإشرور

أطلق خيالك وأترك النفس حره
وخل الطبيعه في حياتك لها دور
وبالليل لا بانت نجوم المجّره
أذكر بديع الخلق بـِ إحـساس وشعور

واسجد لرب الكُون مره ومره
وإحفظ لسانك وأترك الكذب والزور

وفروض ربك خلها مستمره
وطاعتك لا يدخل بها نقص وقصور