موت جدي في المنام في ظروف غامضة و محيرة

[Em Omar]

فيه حلم محيرني لهلا مع اني حلمته تقريبا فشهر 5، كان جدي اياميتها قاعد معنا في البيت عشان جدتي كانت في اطاليا عند خالتي عشان ولدت، و قعد معنا 3 اشهر، طول هالمدة ما كنا بنغفل عليه و اي اشي بدو ياه بنعملهوله، و بالحلم شفت اني كنت بالمدرسة (اياميتها كنت لساتني بدرس بالثانوية) و انا بالصف بييجو بينادوني انه جدي بدو شي و لازم آجي و كنت بروح عشان اشيك عليه، و رحت العب رياضة و المفروض انا محبوبة لدى استاذ الرياضة بس اتنرفز لما اجو كمان مرة بيحكولي جدك طالبك في الغرفة اللي عاملين له في المدرسة (على اساس اني باخدو معي عالمدرسة عشان ما اتركه لحالو، و نسيت ما حكيت انه اهلي هم اللي تركوه لالي عشان راحو على ايطاليا عند خالتي) و في هالمرة لما رحت شيكت على جدي حكالي انه راح يموت و حاسس انه تعبان كتير، قعدت ببوس يده و راسه و بحكيله ان شاء الله بيطول عمرك لغاية ما تشوف ولاد ولادي (مع العلم انه بيعزني كتير) و دعى لي و حكى لي الله يرضى عنك، و بعدين اتحول الديكور لمكان زي الجنان، او حديقة كبيييييرة كتير و بلشت اسمع زقزقة العصافير، بعدين شفت ناس من العيلة جايين يعزوني في جدي، و انا مستغربة و مش فاهمة ليش هم بيعزوني واحد ورى التاني، و بالاخير اجت جدتي متنقبة كيف العادة و ضمتني و عزتني في جدي بس انا قلتلها : بس جدي ما مات ليش بتعزوني فيه، قالتلي مش فاضل كتير و سلم الروح لبارئها، و اشارت للمكان اللي كان قاعد فيه جدي، كان قاعد على عرش بس كانه صار شاب عنده 30 سنة، و لابس لباس مغربي حلو كتير و انا ما كنت شايفة انه فيه شي بيبين انه راح يموت، لانه كان في كامل صحته، رحت عنده و قلتلو: جدي؟ مالك؟ شو حاسس؟ قالي : وصل الاجل و لازم اسلم الروح الى ربنا، الحمد الله عشنا الى هادا العمر، و انا متشوق عشان اشوف وجه الله، بعدين اتنهد تنهيدة فيها الم شوية، خفت عليه و سالته شو حاسس؟ قاللي: بس صعوبة في التنفس، بستللو يده و انا بعيط بعدين لقيت حالي قاعدة قدامه بس بعيط و انا بغطية وجهي بيدي، و في واحد بيصبرني بس مش عارفة مين هو، و فجاة سمعت الناس اللي عزوني بيحكو لا اله الا الله، الله يرحمو و يبيض وجهه قدام ربنا، عرفت انه مات، بعدين كتشفت انه هالحديقة هي غرفة كبيرة، طلعنا منها، و لما طلعت معهم شفت 10 لابسين ابيض في ابيض (كيف عرفت انهم عشرة؟ : كل واحد مكتوب عليه رقم ورى ظهره من واحد لعشرة) وبعدين لما طلعنا احنا دخلو هم و بعدين صحيت.
انا مخطوبة هلا و عمري 18 سنة، بس اياميتها كنت لسة بدرس و لسه عازبة و كان عمري 17 سنة، مش متدينة كتير و ربنا يهديني، و جدي عمرو اكتر من 82 سنة و متدين كتير و الحمد لله؛ مؤمن بربنا و باليوم الاخر و دايما بيحكي على الموت و مابعرف اذا كان لهالسبب انا حلمت هالحلم وللا الو معنى و تفسير تاني، انا آسفة اني طولت عليك و بترجاك يا شيخ انك تفسرلي هالحلم ف اسرع وقت