حلم ازعجني واتمنى سرعة الرد

[*حورالجنان*]

السلام عليكم ورحمة الله وبركاته
ارجوا منك ياشيخ ان تفسر هذا الحلم وهو لصديقتي تقول فيه :
كنت في بيت جدي(الله يرحمه) على البلكونة تحديدا (البرنده) .. وكان كإنه في أحد يلحقني نزلت من البرنده ع الأرض (الطابق السفلي)كإنه على حبل.. وبعدين دخلت البيت جوى وأنا خايفة .. كنت متروشة ودخلت أدور على منشفة أتغطى فيها ، القيت نظرة على غرفة من الغرف(وهي الغرفة اللي دايما نجلس فيها لما نبات عندهم) لقيت فيها خالي جالس على الأرض كإنه يعد فلوس أو منسجم بشي ما بعرف شو هو .. طليت ع السريع و طلعت ما خليته يلمحني .. لاني حسيت انه يعمل شي غلط ومتخبي فقلت بلاش اطلع على خصوصياته.

بعدها استمريت أدور على منشفة فجأة لقيت حالي لابسة المنشفة(او انا لقيت ولبستها) و لقيت امي بوجهي .. أظن كلمتني ليش مش لابسة ملابسك وايش هالمنظر ... وقلتلها اني كنت بدور على ملابس او منشفة وما كنت لاقية ..

بعدها دخلت على غرفة جدي وكان متمدد على السرير وشبه يحرك ثمه ولابس ثوبه المعتاد الثوب الأبيض ..وكان في شخص ثاني ناسيه مين هو كإنه قاعد يحتضر يكلمني وشبه قاعد يموت.. ودخلت حرمة ع الغرقة منظرها مفروض يكون منظر انسانة طبيعية ،شعرها قصير ومفرود ومغطي نص وجها فيه فكان شكلها يوحي بإنها من الأموات وتحركاتها كإنها طالعة من القبر، واحساسي وقتها مرعوبة كثير وطلعت من الغرفة هربت منهم وكنت اركض ، جاني واحد يضحك ويقولي البسي الجرابات (شرابات) وتزحلقي على الدرج عشان تهربي اسرع ، وانا اسمعت الكلام وفعلا كان التزحلق اسرع مع اني حسيت بمتعة التزحلق السريع .. المهم وصلت لين الباب وطلعت وفكرت حالي ارتحت .. لكن اتضحلي العكس لاني لقيت رجال عريض المنكبين جاي تجاهي .. دفشته بإيدي وقلتله" بعدين معكم ما حخلص منكم انا ؟ شو بدكم فيي ".. (والمكان هاد كان الشارع المطل على بيت دار جدي بالحقيقة) ..

مسكني هالرجال ومجموعة كمان وكان في فتحة بالجدار لونها اسود .. حطوا راسي فيها بالأول وكانت مثل القبر بالنسبة لي .. بعدين طلعوني وقالولي هالمرة جهزي حالك لتدخلي جسمك كله هالمرة مش بس راسك ..
انا ارتعبت وقعدت احاول اعمل مثل ما خبروني لأدخل جسمي بالفتحه الصغيرة والضيقة ..
دخلوني وكان كله عظام مكسرة ودم أما أول مره كان كلها صراصير ،وسكروا علي وانا وصرت أبكييييي ..
بعدها حسيت و كإني صحيت من حلم ،، لقيت حالي بمدرسة شفت فيها بعض صاحباتي .. وحده منهم صاحبتي متزوجة بالحقيقة وحامل .. وبالحلم كانت حامل كمان سلمت عليها وانبسطت بشوفتها بالرغم من الخنقة اللي بداخلي ولا جبت لها سيرة حلمي ولا شي ..

بعدها شفت صاحبتي الثانية وكلاهم معي بالجامعه .. قلت لصاحبتي الثانية خذي هالنشرة لازم تقرأيها مهمة كثيييييير ..(كان نفسي أقولها كلام أكثر اشجعها لتقرأ النشرة وانها حتلفت نظرك لأمور ما خطرت ع بالك بس ما بعرف شو اللي منعني أظن اني استحيت اتفلسف) قالتلي "مش فاضيه وراي اخوي ادرسه وشغل البيت" بما معنى الكلام ..

زعلت عليها وما زنيت عليها أكثر ( هالنشرة كانت عبارة عن الحلم اللي شفته واللي كان بيعنيلي أحداث القبر )

طلعت من المدرسة مع صاحبتي الأولى الحامل .. وركبت معها السيارة مروحين وكنا جالسين بالمعقد الخلفي وكإنه سواق اللي يسوق السياره .. كنت نايمة ع بطنها وأكلمها بارتياح وكانت بأشهرها الأخيره من الحمل ..(وهي بالحقيقة بأشهرها الأولى الآن من الحمل)
وخلص الحلم ...

معلومات عني قد تفيد : بيت جدي اللي تكلمت عنه ببلدة ثانية غير اللي أنا عايشة فيها الآن .. ننزل عليه بالعطلة الصيفية احيان .. بيت جدي في اربد بالاردن وانا فلسطينية واعيش بالرياض

جدي متوفي وجدتي عايشية لكنها مريضة .. خالي اللي بالحلم مسافر ليشتغل ووضعه الاقتصادي مش تمام .. ووضع دار جدي الاقتصادي بشكل عام سيئ كثير،حتى الميراث ما اتقسم بين خوالي لسا مع انه متوفي من زمان.