بعد حيرة وقلق طويلين.. قررت كتابة هذا الموضوع..

[أنـــا]

بسم الله الرحمن الرحيم

أول شي كل عام وانتو بخير يا أحلى أعضاء في أغلى منتدى.. بمناسبة قدوم شهر رمضان الكريم..

جعلنا الله ممن يُحسن صيامه وقيامه.. وأن يعيننا على ذلك..

(حثقل عليكم بدا الموضوع.. فاستحملو هرجي.. توسلاً لا أمراً)

بداية الهرجة الله يسلمكم انو انا مريضة صدفية لمدة سبع سنوات تقريباً<<< عشرة عمر معاها..

وطبعاً زرت مستشفيات كتير.. وعيادات أكتر.. لدرجة اني ماصرت اثق في علاجاتهم أبداً..

وكنت استخدم مراهم كرتزونية من غير ماأدري ايش هوا الكرتيزون أصلاً..!

إلين مرة من المرارير ربي هداني لهذا المنتدى وعرفت الكرتيزون وأضراره.. قبل سنتين تقريباً..

وبعدها بطلت الكرتيزون وصرت استخدم أشياء طبيعية أو مراهم غير كرتزونية.. بس ماوصلت لنتائج مرضية..

وقبل شهر (بابا) قلي عن صاحبو انو كان يعاني شي في رجلو والدكاترة قالولو نشتبه انها صدفية.. وقعد يستخدم مراهم إلين طفش.. يعني من مرهم لمرهم ياقلبي لاتحزن..

وللأسف ماشفي نهائيا.. الين مرة راح عند طبيب عام واعطالو علاج ممتاز.. ويقول انو اتشافى بعدها..

فابويا الله يعطيه الصحة والعافية قلي خلينا نروح عند نفس الدكتور يمكن يكون شفاءكـ على يدو..

في البداية انا رحت للدكتور وانا فاقدة الأمل في الشفاء.. وانا في الطريق كنت اقول في نفسي (أكيد حيعطيني مراهم كرتزونية) بس عشان خاطر أبويا بروح..

والمهم ياجماعة الخير.. رحت للدكتور وبعد ماكشف عليا وشاف صدفياتي الله يدحرها<<< جاتها العدوى من عمو هجهوج..

جاب الدكتور ابرة.. عاد انا خفت وقلت للدكتور مابغا ابر كرتزون ولا مثبطة للمناعة.. فقال هادي الابرة ولا وحدة منها.. هادي ابرة زيلوكين مخلوطة مع افيل.. واعطاني هيا في العضل.. ووصفلي حبوب حقت الحساسية زيرتيك.. ومرهم ديبروسليك.. قلتلو مابغا مرهم فيه كرتزون.. قلي حطي منو مسحة بس على الصدفيات.. مايضر.. ومراجعة بعد اسبوعين..

المهم لما رجعت البيت على طول فتحت النت أدور على (زيلوكين وأفيل) طلعت للحساسية والحكة..

واستخدمت الحبوب.. أما المرهم قلت باستخدمو مرة وحدة في اليوم لمدة أسبوع وبعدين اقطعو بالتدريج بنفس الطريقة اللي ذكرتها خالة ريم في أحد المواضيع.. الله يحفظها.. ويخليها.. ياآارب..

<<< يــتــبــع >>>