مشكلتي صعبة وخايفة من نتائجها

[dina sayed]

بسم الله الرحمن الرحيم
اتمنى انكم تساعدوني في مشكلتي لاني والله مش عارفة انام ولا ارتاح ممكن تكون بالنسبة لاي حد مشكلة تافهة لكن اتمنى من الله اولا ومنكم ثانيا ان الاقي حل
احنا اسرة مكونة من 3 بنات وولد وحيد وابونا وامنا ربونا على الاخلاق والدين وقيمة العلم وكانت اهم حاجة في حياتنا هي العلم والدراسة وخصوصا امي كانت صعبة قوي معانا واحنا بنذاكر ولا تقبل فكرة الفشل نهائيا وكان كل املها تشوفنا في كليات قمة وشرط تكون علمية والحمدلله ربنا كرمنا ودخلنا كليات علمية ولكن حصلت مشكلة اني رسبت في اول سنة دراسية لي في الكلية لانها صعبة جدا فاضطريت اخبي عليهم وللاسف رسبت تاني وبكدة خرجت من الكلية وحولت كلية نظرية وكل دة من غير علم اهلي ولا اخوتي وانا طوول السنين دي عايشة في خووف ورهبة احسن حد يعرف من الورق اللي بذاكر فيه والحمدلله ربنا كرمني في الكلية دي ونجحت واستمريت بتفوق لكن من دون علمهم وكل ما افكر اصارحهم افتكر عصبية امي اللي ممكن توصل لحد الجنون وخراب البيت لان ليها مواقف كتيير كانت ممكن فيها تتهور لدرجة غير معقولة وصعب جدا انها تتقبل الفكرة
المشكلة ان في حد عاوز يتقدملي وانا لسة فاضلي سنتين واهلي فاكرين اني اتخرجت والولد دة شايف اني لازم اقولهم بس انا خايفة من النتائج ومش عارفة احتوي الغضب دة ازاي مع العلم ان ابويا وامي عندهم سكر وضغط دم مرتفع انا خايفة عليهم وعلى البيت ومش عارفة الصح فين ارجوكم انصحوني انا محتاجة لاي نصيحة عشان ارتاح من اللي انا فيه وانا اسفة لو طولت