ممكن نحكي بصراحة؟

[عاشقة فلسطين]

السلام عليكم ورحمة الله وبركاته..

الأخوة والأخوات اعضاء الشفاء ..والمهتمين بالأقصى الجريح واطياف المجد بشكل خاص..

اتمنى يكون الجميع بأحسن حال.

.بالنسبة للي بيعرفوا اطياف من الأول رح تستغربوا الموضوع يمكن.. بالنسبة للي ما بيعرفوا فرصة انكم تعرفوا..

اطياف المجد كفريق اول ما تأسس كنا مجموعة صبايا عنا اهتمام خاص بفلسطين وبقضايا محددة حابين نوعي الناس فيها..وكنا بنتعاون مع بعض بالمواضيع لحد ما قررنا نعمل مجموعة تشمل اعضاء اكتر من المنتدى وبنشاط اوسع..حددنا لجان معينة ولكل وحدة مهمة معينة..مثلا التحرير..تصميم..الخ.. وفتحنا للأعضاء حرية الاشتراك فيها..والأخ ابو آيه ما قصر ودعمنا متل العادة وفتحلنا هالقسم الفرعي..

الشغل صار وقتها عبارة عن حملات..بمعنى..عنا قضية الأسرى مثلا حابين نفعلها..فكنا نقسم الشغل انه مجموعة التحرير تكتب مقالات عن الموضوع..مجموعة التصميم تعمل شعار وتواقيع مثلا.. وهيك كنا ماشيين..لحد ما بوقت توفقنا بشكل كامل..وطلبت من الأخ ابو ايه يسكر القسم ..ورجعت بعد فترة اخت كريمة طلبت فتحه على امل احياءه وبعدين رجعنا توفقنا..

الأسباب وبصراحة شديدة كانت كالتالي:

اولا وعشان اكون منصفة..احنا كادارة ما كنا قادرين نلتزم بشكل كبير بمتابعة الأعمال لانشغالنا بدراستنا - معظمنا كانوا طالبات والبعض لازال- وحياتنا و..و..و..

وانا شخصيا كحدى صاحب فكرة وصلت لمرحلة من التعب وللأسف الاحباط الشديد فقدت روح المثابرة والقدرة على الاستمرار..

ثانيا.. عدد مش بسيط من الأعضاء اللي انضموا لنا ومنهم ناس من اللي لامونا بالبداية انه ما حكينالهم وما شاركناهم من البداية كانوا وكان الموضوع ما بينعنيهم..اما يغيبوا غياب تام وقت الشغل او يتواجدوا بكل اقسام المنتدى باستثناء اطياف..مع العلم الانضمام كان اختياري وبكل حرية..

ثالثا ..في الحالات اللي كنا كادارة اطياف نتواجد ونتابع والأعضاء يشتغلوا ويتعبوا وننشر ونجهز كل شي..التفاعل من الأعضاء كان محدود جدا جدا..

هلأ..لكل هالأسباب..احنا توفقنا وجربنا نرجع اكتر من مرة وحسب اعتقادي لهلأ ما حققنا المطلوب من اطياف او الفكرة الأساسية اللي اطياف كمجموعة انعملت عشانها..

ليش انا بحكي كل هادا هلأ؟

عشان حسيت انه صار وقت تغيير حقيقي..صار وقت نعالج المشاكل بدل ما نتركها وندير ظهرنا..وبعد الأحداث الأخيرة بالوطن العربي الكل شاف قديه النت وحتى الفيس بوك وسيلة مهمة للتوعية وللتغيير..

متل ما قلت جزء التقصير كان مني.. وعشان هيك فتحت الموضوع.. انا بتمنى انه لازم نرجع اقوى واحسن من قبل.. وفكرت انه اذا رجعنا لازم طبيعية الشغل تتغير و هيكلة اطياف ان صح التعبير تتغير كمان..

بدي هلأ من اي حدى يقرا الموضوع.. يجاوبني على هالكم سؤال بصرااااحة..

- هل بتعتقد/ي انه اطياف المجد لو رجعوا من جديد رح يقدروا يعملوا او يضيفوا شي؟؟
- هل انت/ي مستعد/ة لدعم اطياف والتعاون معهم ولو بنشر اعمالهم مثلا؟؟

وختاما يا جماعة الخير.. اذا حبيتوا الموضوع اهلا وسهلا.. واذا ما حبيتوا.. بردو اهلا وسهلا.. بس بالنسبة الي هالمرة مش حفقد الأمل.. وحشوف شو بقدر انا اعمل..وشو غيري بيقدر يعمل.. وربنا يوفقنا..

اهلا وسهلا فيكم وباقتراحاتكم واراءكم..