علاج لصدفيه خلال 40 يوم بأذن الله مجرب

[الدلوعه السمري]

السلام عليكم ورحمة الله وبركاته



اشحالكم عساكم بخير ....



بخبركم قصتي ويا الصدفية وكيف تعالجه منها وراحت مني الحمد الله


إنا كانت فيني الصدفية يتني من سنة تقريبنا وكنت أتعالج طول السنة كنت أسوي أشعة بس ماشي فأيده بعدين عرفت عن منطقة في اليمن فيها مياه كبريتيه وتعالج الإمراض الجلدية وسألت وايد عنها وقالو روحي يمكن تلاقين العلاج جربي مابتخسرين شي، المهم رحت والحمد الله راحت مني الصدفية .


سافرت لليمن تقريبا في أول سبعه في 2009 وجلست هنالك أربعين يوم ورديت نص ثمانية وللحين الحمد الله ماشي أضرار ولا شي والحمد لله، الفضل يعود لله وفتكيت من الصدفية لاني وايد عانيت منها بس إلي بيروح هنالك لازم يتقيد بشروط استعمال العلاج ،


أول شي لازم تكمل الأربعين يوم هنالك.


ثاني شي لازم تشرب من الماي ويكون أكلك منها وتتسبح منها وما تستخدم الماي العادي لأنها ينقض العلاج.


المنطقة هاذي في اليمن في الجنوب قريبه من منطقه اسمها الديس الشرقية واسمها صويبر


وهاذي المنطقة كل إلي ايون فيها للعلاج أما يكون علاجهم من الإمراض الجلدية وبعضهم يتعالجون من الدود.



وأي استفسار أنا حاضره.

اختكم الدلوعه السمري

[فكرى دياب]

أبنتنا الفاضلة
أولاً نرحب بك بين أخوانك وأخواتك بمنتدانا
وياهلا فيك
أما عن موضوع علاجك .
نرجوا منك التكرم بشرح مطول منذ أصابتك بالصدفية والعلاجات التى كنت تستخدميها .
وحتى تجربتك ألأخيرة فى اليمن الشقيق
لأن الموضوع شيق جداً ونريد معرفة المزيد عنة
وعن قولك
ثاني شي لازم تشرب من الماي ويكون أكلك منها وتتسبح منها وما تستخدم الماي العادي لأنها ينقض العلاج
نشرب من المياه (الكبريتية)!
ونأكل منها؟ (ماذا ؟ )
نرجوا التوضيح حتى نتعرف على تجربتك ربما يكون منها ألأفادة لأحد من أخواتك بالمنتدى
شاكراً ومقدراً شعورك الطيب
وجزاك الله كل الخير

[بوسطن]

مبروك شفائك والحمد لله على السلامه
اتمنى توضحين نوع صدفيتك
ممكن نعرف طريقة العلاج والاكل والشرب
ممكن نعرف شنو فى هذى المنطقه او القريه
كم ساعه نجلس بالماء وماهى طلبات وشروط العلاج ولماذا 40 يوم بتحديد
كم تبعد عن العاصمة وكيفية الوصول وهل يوجد امان وكم تكلفه

[مقدام]

صويبر
آه آه آه آه

نعم هو صويبر من سنه وانا احاول
اجيب اسم المنطقة
اخبرني احد الاصدقاء
عن هذة المنطقة وانها مفيدة جدا
لكن لم نتأكد من الاسم تماما
اشكرك اختي
ما كان ينقصني هو الاسم الصحيح
للمنطقة

[سيد عبدالعال]

ابنتى الفاضله / الدلوعه السمرى
الف الف مبروك على الشفاء
تجربه جيده ان شاء الله يستفيد منها الجميع
بارك الله فيكى واهلا بك بين اخوانك واخواتك عضوه نشطه

[قاهر الصدفيه]

ننتظر افادتك لنا يا اخت

[الدلوعه السمري]

أشكرك اخوي فكري على الترحيب الحلو
وأتمنى إني أفيدكم من خلال تجربتي
وأنا بشرح لكم من بدايتي مع الصدفية لين ما سافرت لليمن

أنا بدأت الصدفية معايا تقريبا من سنة 2008 وأول شي ظهرت في بطني حبة وأنا كنت أظنها حبه عاديه بس بدت تكبر وبدت تظهر فيها مثل القشرة وبدت تنتشر في جسمي ورحت عند دكتور جلدية وقال احتمال تكون صدفية بس بسوي فحص ونتأكد وسوينا الفحص، الفحص كان عبارة عن اخذعينه من بعض القشرة وفحصها وتأكد أنها صدفية وقال نبدأ أول شي باستخدام الاشعه وبتكون عبارة عن 40 جلسة أول شي بنسوي 20 وإذا راحت الصدفية بكتفي بال20 لأنه عندي الصدفية بسيطة بس للأسف كملت ال20 جلسة وما خفت كانت تخف القشور وتبقى البقع الحمراء وبعد ستة شهور أو سبعة اشهر بدأت تظهر في راسي وانتشرت في الرأس كامل حتى ظهرت بقع علي جبهتي وكنت وايد مضايقه والأشعة ماكانت تفيدني وكنت أدور إي علاج انه يعالج الصدفية وكنت أدور في النت وأسال لين ماسمعت عن المياه الكبريتية في اليمن.

مرحلة علاجي في اليمن
في هالمنطقه غرفه لكل مريض يستأجرها وهي عبارة عن غرفه وفيها مساحه صغيره قدام الغرفة وهاذي الغرفة كنا نطبخ فيها ونام فيها أما عن الحمامات عزكم الله كانت مشتركه
الحين بخبركم شو كنت أسوي كل يوم وكيف كانت علاجي هناك طبعا كل الناس إلي موجودين هناك يتعالجون ونحن أول ما وصلنا ماكنا نعرف شي بس تعلمنا من جيرنا جزاهم الله خير وكلهم يساعدون بعض المهم
كنت أقوم الصبح بعد ما أتريق أحط الكبريت علي بقع الصدفية وحتي كنت أحطه في راسي واقعد ساعة وبعدين أروح أتسبح المكان إلي كنا نتسبح فيه عبارة عن غرف صغيره وكل غرفه فيها حفره نخلي هالحفره تتعبا بالماء إلي جاي من العين واقعد فيها ساعة أو أكثر كل ما قعدت أكثر كل ماكان أحسن
وبعد ما اخلص أرد للغرفة لين العصر، والعصر أسوي الكبريت مره ثانيه في جسمي وراسي أخلية ساعة وبعدين أروح أتسبح وقبل لا أنام كنت ادهن جسمي بزيت الزيتون حتى راسي
بعد أسبوع تقريبا زادت فيني الصدفية وانتشرت في جسمي أكثر وأنا خفت من هاشي بس قالولي بالعكس إذا انتشر المرض فيج وزاد يعني فيه دواج لأنه الماء يطلع كل الإمراض في الجسم وبعدين يعالجها وبالفعل بعد أسبوعين بدت تخف تدريجيا وتقريبا بعد ما كملت 35 يوم راحت مني الصدفية بس قالو كملي ال40 يوم وكملت ال40 يوم والحمد الله راحت مني الصدفية ولا صارت أي إضرار من المياه الكبريتية بالعكس هي تنقي الدم في الجسم

معلومة بسيطة المياه الكبريتية لما كنت أريد اشرب منها أو أريد ماء عشان الطبخ كنت أروح للعين واخذ معاية دبه وأعبي فيها الماء وأشرب منه وإذا الماء قعد أكثر من 3 ساعات راح مثل الماء العادي لا فيه غازات ولا فيه أي ريحه حتى الفائدة تروح سبحانه الله.

أتمنى إني قدرت أفيدكم بأي شي .

اختكم الدلوعة السمري

[الدلوعه السمري]

المشاركة الأصلية كتبت بواسطة بوسطن

مبروك شفائك والحمد لله على السلامه

الله يبارك فيك ويسلمك اخوي بوسطن

اتمنى توضحين نوع صدفيتك

اممم الصدفيه الي كانت فيني كانت عباره عن احمرار وفوقها قشور وقال الدكتور انها صدفيه خفيفه بس هالمياه تعالج جميع انواع الصدفيه لاني شفت حالتين اول حاله من الي سمعته انه منتشره في جسمه هالرجال كامل والصدفيه فيه من 14 سنه بس هو ماكان يستمر علي شرب المياه الكبريتيه وكان يسرب الماء العادي وهالشي ماكان يساعده في علاجه بسرعه، كان كل ما يشرب ماء عادي يبدا من اول وجديد.
اما الحاله الثانيه كانت حرمة كبيره في السن والصدفيه فيها من 10 سنين وكانت في رجلها ويدها لدرجة انها ما تقدر تفح يدها ولا تقدر تمشي على رجولها بس الحمدالله قبل لا ارد لبلادي شفتها وكانت تمشي ما باقي الا شي بصيت فيها من الصدفية.

ممكن نعرف طريقة العلاج والاكل والشرب

انا وضحت في ردي السابق عن طريقة العلاج اما بخصوص الاكل والشرب نحن كنا نطبخ وكان اكثراكلنا السمك الطازج لانه البحر قريب من منطقة صويبر، وفي مدينه تبعد عن صويبر ب15 كيلو تقريبا أسمها الديس فيها عياده وفيها السوق الي كنا نشتري منه مستلزماتنا مثل الخضره والفواكه والسمك والدجاج ومستلزمات الاكل.

ممكن نعرف شنو فى هذى المنطقه او القريه

هي عباره عن غرف يستأجرها المريض، ومسجد وفها بقاله صغيره ،والعين الي ينبع منها المياه الكبريتية.

كم ساعه نجلس بالماء وماهى طلبات وشروط العلاج ولماذا 40 يوم بتحديد

كم تبعد عن العاصمة وكيفية الوصول وهل يوجد امان وكم تكلفه

يفضل الجلوس بالماء اكثر من ساعه كنت اول الايام أجلس ساعتين الصبح ومرات ثلاث، والعصر لين ما يأذن المغرب بس بعدين مليت وصرت اجلس ساعه الصبح وساعة العصر، ويفضل الجلوس اكثر بس اقل شي ساعة.
من الشروط انه ما تسخدم الماء العادي ابدا خلال الاربعين يوم .
اممم انا ماعرف كم تبعد عن العصمه بس بسأل الوالد والجواب بيكون عندك بكره ان شاء الله.
اما عن الامان نعم موجود وكانت كل يوم سيارة الشرطة نشوفها
وما كنا نحس بالخوف ابدا.
اما عند التكلفة استأجار الغرفه كان 2500 ريال يمني يعني بخمسين درهم تقريبا واما بخصوص الاكل انتة تقدر تحدد كم بتاكل في ال40 يوم انا عن نفسي شوف انه كل شي كان رخصي عندهم.

اتمنى اني قدرت افيدك واي سؤال انا حاضره

[الدلوعه السمري]

المشاركة الأصلية كتبت بواسطة مقدام

صويبر

آه آه آه آه

نعم هو صويبر من سنه وانا احاول
اجيب اسم المنطقة
اخبرني احد الاصدقاء
عن هذة المنطقة وانها مفيدة جدا
لكن لم نتأكد من الاسم تماما
اشكرك اختي
ما كان ينقصني هو الاسم الصحيح
للمنطقة

العفو ياخوي
واي استفسار عن صويبر انا حاضره
اتمنى انك تستفيد منها تستحمل وتصبر لانه العلاج يحتاج لصبر.

[الدلوعه السمري]

المشاركة الأصلية كتبت بواسطة سيد عبدالعال

ابنتى الفاضله / الدلوعه السمرى

الف الف مبروك على الشفاء
تجربه جيده ان شاء الله يستفيد منها الجميع

بارك الله فيكى واهلا بك بين اخوانك واخواتك عضوه نشطه

الله يبارك فيك

وشكرا علي هالترحيب

وان شاء الله اقدر أفيد الجميع

والله يشفى جميع المرضى