صينية فراخ البانيه ....طريقة جديدة جدااا للفراخ

شرف الاسلام · #1 13-02-2009, 06:11 PM

السلام عليكم
ازيكم يا جماعة ايه اخباركم واخبار مطبخكم؟
انهاردة جايبلكم اكلة تجنن
طبعا كلنا بنحب الفراخ البانيه
وبناكلها فى كل مكان
فى البيت او التيك اواى سواء فى الجامعة او النادى او وانت بتتمشى مع اصحابك ودخلت محل أكل
يعنى لا مفر

واكيد فى منكم اللى زهأ منها واتخنق لدرجة انه ممكن يحط ايده تحت المخدة وهو نايم يلاقى حتة فرخة
او يحس وهو فى السرير انه نايم فى طبق كبييييييييييير من البيض والبقسماط

عشان كدة جبتلكوا طريقة جديدة للفراخ البانيه مش مشوية ولا بالبيض والبقسماط ولا مسلوقة ولا محشية ولا شيش طاووق

اولا المكونات

1 كيلو فراخ بانيه متوسطة الحجم والسٌمك

3 حبات بطاطس و3 حبات جزر و2 حبة بصل و4 حبات فلفل
ربع كيلو زيتون اسود او اخضر

10 ملاعق جبنة موزريلا مبشورة
4 ملاعق جبنة رومى مبشورة

كوب صلصة متوسط مخفف بالماء

نصف كوب زيت

واخيرا التوابل

ثانيا الطريقة:

نحضر وعاء القلى ونملاءه بالزيت
نقوم بتحمير الفراخ بدون اى اضافات كما هى بدون دقيق او بيض او بقسماط
نقوم برفعها على ورق لامتصاص الزيت جيدا
نحضر صينية كبيرة ونضع نصف كوب الزيت ثم نضيف جميع الخضار بعد تقطيعه الى قطع صغيرة باستثناء الزيتون هانضيفه فى الاخر
نحمر الخضار فى الزيت لمدة تلت ساعة حتى نشعر انه اصبح طريا وقابل للمضغ
نقوم بوضع الفراخ المحمرة على وش الخضار بالترتيب حتى نملا الصينية نضيف الصلصة ونترك الضينية حتى تغلى لمدة 7 دقايق ثم نضيف اخيرا الجبنة الموزريلا والرومى والشيدر- حسب الرغبة ممكن اكتر من نوع جبنة -ثم نضيف الزيتون والملح والفلفل وندخلها الفرن لمدة تلت ساعة على درجة حرارة متوسطة

وطلعوها بقى وابقوا قابلونى لو الصينية اتغسلت من كتر ماهتتلحس

بجد ياجماعة انا بقالى اكتر من شهر والله مابكلش الفراخ البانية الا بالطريقة دى
وبقيت بعيد عنكم مدمن صوانى
بس ياريت حد يجربها ويرد عليا ويسبلى حتة

صقر الشفاء · #2 13-02-2009, 06:47 PM

تسلم على الاكل الى بيفتح النفس هههههههه

شرف الاسلام · #3 14-02-2009, 07:03 AM

بالهنا والشفا يا صقر الاسلام
ولما تخلص قوللى عشان اجبلك تانى :d

الذين يشاهدون محتوى الموضوع الآن : 1 ( الأعضاء 0 والزوار 1)