تفسير حلم

[غرنوقة العين]

السلام عليكم ورحمة الله وبركاته
كيف حالك يا شيخ في البدايه احب اشكرك على جهودك في تفسير احلام الاعضاء والله يعطيك الصحه والعافية والتوفيق والله يرزقك ويرزقنا ويرزق جميع المسلمين والمسلمات والمؤمنين والمؤمنات الاحياء منهم والاموات الجنه ان شاء الله

عندي كذا حلم واريد تفسيرهم
الاول :
حلمت ان ابوي ياي يشلني من مكان كنت فيه ويريد يوديني البيت اول ما ركبت شفت ولد عمره تقريبا 13 سنه ومتين كان قاعد ورى استغربت منه لاني ما اعرفه بس عقب طنشته وقعدت اشوف الدرب . الطريق الي مشاني فيه ابوي كان طويل مع انه الدرب للبيت قريب ونحن نمشي بالسياره كنت قاعده بقرب الدريشه اشوف المناظر اول شي مرينا على على بيت بدون سور كنت اشوف كل شي فيه كان لونه عيناوي ووردي كنت اشوف الصاله وغرفه النوم وكنت مستغربه ان البيت مكشوف والابواب مفتوحه لان الكل يقدر يشوف الي داخل ومافيه اي ستر وعقب مرينا على مزرعة كان فيها ريال طايح بالارض بدون راس بس طالع مثل البيب من رقبته ويطلع منه ماذكر دم او ماي شي سائل وبعدها مرينا ع بيت كان جدامه ريال وفيه سياره اسعاف يحاولون يسعفونه بس كانوا يسعفونه من ظهره وكنت مستغربه منهم اقول الريال مب قادر يتنفس لازم يسعفونه عن طريق الفم والانف ويحطوله الاوكسجين وعقب كملنا الدرب لين ما وصلنا البيت الي لقينا كل العايله مجتمعه فيه.


الحلم الثاني:
حلمت اني طالعة من الباب الي يطل على الشارع فشفت من الجهه اليسرى بيت ثاني بنفس الحوش شيخ من شيوخ الدولة والناس قاعدة تسلم عليه كانوا واقفين طابور ويدخلون من الباب الخاص للبيت الثاني فقلت بسير اسلم على الشيخ بس فيه واحد منعني وقال لازم تروحين نفس المكان الي الناس يايه منه وعقب تعالي وبدخلج بسرعه عشان تسلمين على الشيخ فظهرت برع في الشارع عشان اسير نفس المكان الي الناس تجي منه فلقيت نفسي بالسياره مع امي وابوي وياهل صغير ما اذكر من هو وكنا نطلع الجبل بكل سهوله ويسر مع ان الدرب كان خاص للشخص الواحد ولازم يكون هو ماشي وبعدها ابوي نزلنا وقال لازم تمشون فيوم نزلنا كنا وافقين على ارض فيها زرع ومرويه بالماي وفيهاسماد اي الماده العضوية التي توضع للنبات ومشينا عليها للاخر وعقب طلعنا وقعدنا ننتظر ابوي لما حضر نشيت..ملاحظه دايما احلم بشيخ من الشيوخ يوم اقرر اسلم عليه امر بجبل وزرع ليش؟


الحلم الثالث:
حلمت ان البلغم بشكل سائل يخرج مني وبكميات كبيره جدا وكذالك اعطيت عقدا جميلا عبارة عن خرز وياقوت ملون وكانوا اهلي يمنعوني من ايقاف خروج البلغم فماهو التفسير؟


انافتاه عمري 25 سنه غير متزوجه ولا اعمل خلال هذا الشهر سوف اتخرج من الجامعه ان شاء الله

ولكم مني جزيل الشكر