تجربه غسيل القولون

mojazaf · #1 11-07-2009, 10:19 PM

كنت ابحث عن مواضيع تتعلق بغسيل القولون
واستوقفتني هذه التجربه للعضوه منوله كويتيه في منتديات كويتيات النسائية
واحببت ان نقلها لكم على هذا الرابط

نص المشاركه
صباحكم ورد بنات

بااااااااركولي اخيرا وبعد بحث طويل غسلت قولوني

واعذروني طولت عليكم بالتفاصيل قلت عشان اراقب نفسي واشوف الفرق واشرح لكم بأمانه

يامحفوظات السلامه .. توكلت على الله ورحت موعدي مع الدكتوره وفاء الحشاش ووصلت قبل موعدي بربع ساعه ،، دخلت عيادتها وانشرح قلبي من كثر ماالعياده راقية ومريحه نفسيا ماشاء الله والله يتمم عليها

السكرتيره كانت وايد بشوشه وحبوبه وعطتني ورقتين فيهم اسئله جاوبتهم وفتحت لي ملف ودخلت الاوراق على الدكتوره

وبعدها بشوي طلعت لي الدكتوره ورحبت فيني وما أكفيها حقها مهما وصفت رقي أخلاقها وذوقها وسنعها وهدوئها اللي يريح بالج

بعدها دخلتني غرفة غسيل القولون المجهزة كأنها غرفة فندق 5 نجوم مااااااتحسين انج بعياده أبدا وهذا طبعا انعكس على نفسيتي ايجابيا ،، شرحت لي شلون اجهز حالي وقالتلي بعد ماتجهزين بتدخل لج السستر تجهزج

طبعا التجهيز كان كالتالي : نزعت ملابسي وعلقتها ودخلتها الكبت ولبست مريول خاص مفتوح من ورا ويتسكر بكباسين وتالي بنطلون يوصل تحت ركبتج من ماده معينه وفيه فتحة صغيره تكرمون صوب فتحة الشرج وهالشي ريحني وااااااااااااايد كوني بكون مغطية كلي والدكتوره نفسها أكدت على تعمدها لهالشي عشان تكسر حاجز الخجل عند المريض وطبعا التلفزيون شغال

خلصت لبس وناديت ياتني السستر وساعدتني انام على السرير وسوتلى مساج لدقايق صوب منطقة البطن يتراوالي عشان تساعد القولون يتحفز لطرد محتوياته

وعدلت موقع السرير عشان اكون بجانب جهاز الغسيل مجابلته

بعدها دخلت الدكتوره وفاء وابتدت معاي

وهذي سالفه بروحها ،، ماشاء الله عليها لها اسلوب هدي حلو تهيأ نفسيتي فيه وتخليني ريلاكس وفعلا كنت ريلاكس طول وقت الغسيل وظلت قاعده معاي طول الفتره وكانت 50 دقيقه لانها تتحكم بالبايب عشان يطرد البلاوي ( الله يعينها)

وظلينا نسولف وتشرحلي عن كل صغيره وكبيره وسألتها عن كل اللي بخاطري وكان صدرها وسيع وهاديه لدرجة فعلا فعلا ماحسيت انها دكتوره مجابلتني كأنها اختي قاعده معاي وطبعا كل خطوة تسويها تقولج قبلها بسوي جذي وبيصير جذي وطافت ال 50 دقيقه ماحسيت فيهم ولاتأذيت ابدا ابدا وكانت عمليه سهلة جدا بشكل ماتوقعته

طبعا طلعت بلاوي وبعد البلاوي طلعت فطريات شكثثثثثثثر وقالتلي ان هالفطريات تكون على جدار القولون وهي اللي تعطله وتكسله وتمنع تمثيل الأكل عدل واللي يضحك صج ان من أول الجلسة وانا اسمع تبقبق بالماي ولين نص الجلسه سألتها هذا التبقبق من ضخ الماي قالتلي لأ هاذي الغازات المحتبسه بأمعائج ولين آخر الجلسه والتبقبق مااااا سكت

،، تالي خلصت بالسلامه وقالتلي شبسوي ،، دخلت الحمام والسستر مجهزه لي فوطه معقمه مفتوحه من الكيس والروب ديشامبر فنزعت ثيابي وعزكم الله فرغت الباقي من الماي والفضلات ولاتحاتون الدكتوره تكون بالصوب الثاني من العياده يعني ماحد يسمعكم وبتاخذون راحتكم

وتالي غسلت ونظفت حالي وطلعت للغرفه مره ثانية لبست ملابسي وشيلتي وكانوا مجهزين لي كوب شاي اخضر

حسب ماقالتلي الدكتوره عشان يهدي القولون بعد عملية الغسيل ،، شربته وطلعت
بره دفعت الفلوس وكان : 10 دنانير فتح ملف و 75 دينار غسيل قولون وعطوني تقرير باللي سويته ونصحتني اسوي غسيل قولون بعد 3 اشهر لأن بعد انتهاء مدة الغسيل كان للحين في فطريات وغازات حسب كلام الدكتوره فطلبت منها اسويه بعد اسبوعين قالتلي دام ماعندي امساك مزمن ننطر 3 اشهر ،، يتراوالي ينعاد بعد اسبوعين لحالات الإمساك المزمن وطبعا طلعتلي الدكتوره واطمنت علي وطلبت منها تكتبلي الفحوصات الخاصه بالكبد والصفراء لأنها متخصصه فيهم بعد وقلت اسويهم بالحكومه واراجعها انشاء الله بالنتايج عشان اطمئن بالمرة على الكبد والصفراء

الحين بقولكم شلون وضعيتي بالعمليه :

اولا ماكو بنج لأن اساسا ماكو عوار ،، كل القصه لما الدكتوره بتدخل المبسم مال البايب في فتحة الشرج يعني اممممممممممممم تقريبا مثل دخلة الحقنة الشرجيه اللي يعطونا اياها قبل الولاده وتالي لما يتدفق الماي للأمعاء احس بعد ماتنترس الأمعاء بشعوري لما تكرمون اكون حصرانه ابي ادش الحمام فهمتوني طبعا فأقول للدكتوره تراني امتليت فتوقف ضخ الماي وتبدي تسحبه عن طريق الجهاز وقبل نهاية العمليه تحط محلولين مطهرين في الماي عشان يطهر القولون ويحفزه يبني بطانته من جديد

وبأول الغسيل اكون نايمه على جنبي اليسار لمدة خمس دقايق وايضا آخر خمس دقايق من الغسيل وبالوسط انقلب شوي شوي لين اصير نايمه على ظهري وارفع ريلي واجفسهم مثل وضعيتنا بالولاده وماكو ريحه نهااااااااااااااااااااااااااااااااائيا

وهااااااااااااااذي كل القصه مثل ماوعدتكم من طأطأ لسلام عليكم

الحين بقولكم شعوري بعد الغسيل

طلعت من العياده خفييييييييفه وطايره

ولليوم الحمد لله مافي انتفاخ ولا هالغازات اللي تفشل اللي كنت كل يوم والثاني آخذلي حبتين زيموجين عشان تريحني منهم بس هاليومين في شوي غازات ونفخه لأنه موعد الدوره الشهريه

والأهم الأهم اللي سويت الغسيل عشانه الخمووووووووووووول اللي كان مسيطر علي والنوم اللي مو طبيعي انام واحس ماشبعت ارد انام

وكانوا عيالي معانين مني لآأطلعهم مثل العالم والله العظيم ان يوم الجمعه والسبت اللي بعد الغسيل مباشره كنت نايمه الخميس الساعه 1 وصحيت 9 من غير منبه لأول مره من زمن طويل والجمعه بالليل نمت 3 الفجر وصحييت 9 من غير منبه بس اللي ضيق خلقي اني ماحسيت بمنبه صلاة الفجر من كثر ماكان نومي عميق ومريح لكن بعدها ضبطت نفسي

وهذا انا اقوم 6 الصبح ايام الدوام وماأنام الا 12 او 1 بالليل من غير مااحس بأي تعب طول اليوم والغريييييييييييييييييييييييب ان الظهر اغصب نفسي انام لأني متعوده على نومة الظهر مايكون فيني نوم

والأحلى من هذا كله اني انا والبنادول الأزرق كنا صحبه تخلص علبة اشتري غيرها بسبب الصداع اللي مو عارفتله سبب واذكر مره حاشني صداع بغيت اموووت وطرت عالهادي فالأفندي الدكتور قاللي هذا صداع نصفي وعطاني 3 ابر وحبوب وظل هالصداع يمسكني كل يومين ثلاثه ،، اللهم لك الحمد اللهم لك الحمد ماأخذت ولا حبة بندول من يوم الغسيل والله يتممها نعمه علي ويشفي كل مريض

وحسب كلام الدكتوره ان غسيل القولون له اكثر من 170 فايده اذا ماخانتني الذاكره بالعدد

المهم ،، بحجز لبنتي عمرها جريب ال 16 واسويلها عشان بشرتها تصفى من هالحبوب لأن لاحظت بهالكم يوم ان بشرتي هدت عن اول وصار في نظارة بويهي اللهم لك الحمد واظن ان مع الوقت امور صحتي بتتحسن اكثر واكثر

نصيحه لوجه الله تعالى بدال لاتقطون فلوسكم عالمطاعم وعيادات الأطباء جربوا غسلوا قولونكم عشان جسمكم ينظف من السموم وتالي بتشوفون ان مشاكل وااااااااااايد سببها التلوث اللي بأمعائنا ولعلمكم صحة البشره ونضارتها وصحة الشعر مرتبطة بنظافة امعائكم

طبعا للي مايعرف وين يلاقي غسيل القولون انا لقيته بالصايغ كلينك ب 50 دينار بس اللي يسويه مساعد دكتور يعني ممرض او سستر

ولقيته برويال كلينك ب50 دينار وهذول عندهم نصب مو طبيعي وسالفتي معاهم طويله ولما اتأكدت من نصبهم كنسلتهم

وقريت بالجرايد عن دكتوره وفاء الحشاش وهي رئيسة قسم الجهاز الهضمي بمستشفى الصباح وشهاداتها من امريكا وكندا ماشالله ماشالله تارسين الطوفه بتشوفونه اذا رحتوا علاوه على شهادة متخصصه بغسيل القولون معلقه بغرفة الغسيل يم الجهاز علاوه على اخلاقها الروعه طبعا انصحكم فيها من غير تردد

صج انها اغلى من الباجي لكن الغالي سعره فيه كفايه ماأحاتي قولوني لاينبط من ضخ الماي اذا اللي يسويه مو مؤهل وفهمان شغله

منقووووول

ساره2000 · #2 12-07-2009, 04:49 AM

مجازف مشكور على جهودك ونقلك بس ودنا نعرف هل فيه احد سوى تنظيف قولون وفيه صدفيه ودنا نشوف النتيجه

بنت العم · #3 12-07-2009, 11:45 AM

مشكوووووور اخوي مجازف ...بصراحه تحمست مره
بحجز في اقرب وقت في المستشفى وبروح اسوي غسيل
كلام هالكويتيه يونس ويطمن ويفرح بعد
اذا غسلت بنقل لكم تجربتي
انا اعرف وحده غسلت قولون وتقريبا نفس كلام الاخت بس لمى جيت اجرب قالوا لي الدكتورة راحت وجا دكتور ...قلت يالله عاد لمى ترجع بسوي ونسيت السالفه
ان شالله تكون ارجعت

بوسطن · #4 14-07-2009, 10:52 PM

الف شكر اخوى بارك الله فيك
فعلا موضوع شيق ومهم جداااا

فتى الخرج · #5 15-07-2009, 01:12 PM

الله يعطيك العافيه اخوي مجازف
والله الخجل اهو الي مخل الواحد مايسويه
وان شاء الله بحاول في نفسي علشان اسوي غسيل هلقولون الي معذبنا من البلاوي الي فيه
ودمتم بخير