طلبتكم دشووو ..

[مناير الكويت]

السلام عليكم ورحمة الله وبركاته

انا مناير من الكويت طبعا مصابه بالصدفيه والان عمري 20 سنه والصدفيه بدت تطلع وانا عمري 6 سنين يعني سالفتي معاها طويله من 13 سنه فما اظن الحالة النفسيه لها شغل بحالتي
لاني كنت طفله لما اصبت فيها انا بقولكم علاجاتي طووول هال13 سنه اولا بدت تطلع 3 حبات بظهري بعدها انتشرت براسي كنت اروح مستوصف الحكومه يعطيني الدايفونكس وبعد كريمات ما اتذكرها قطره وشامبو بعدين فجأه انتشرررت بكل جسمي حتى على جفوني بقع بعدها رحت عياده خاصه قامت تعطيني الكريمات ما نفعت بعدها استخدمت الابر <ابر كورتيزون طبعا> تعالو شوفو شكلي شلون تغير صرت متينه ونفختني الابر وانا كنت صغيره وقتها بعدها تركت الابر ووداني ابوي الاردن كان فيه عشاب يعالج هناك ورحت له وعطاني ادويه غريبه وريحتها غريبه كان معاها خلطه عسل وخلطه ثوم احطهم على جسمي وطبعا مابي اقولكم عن الثوم شسوى فيني كنت لما احطه احس اني قاعده في نار واقعد ابكي من حرارته وكذالك ما نفع بعدها رحت عياده بحفر الباطن كل اسبوع عندي علاج ضوئي يمكن استمريت عليه لمده سنه ونص صج انه نفع وراحت الصدفيه وقتها بس لوني صار اسود وسمرت حيل ومانفع الحين رجعت مره ثانيه ولما رديت الكويت هم رحت تعالجت في مركز اسعد الحمد علاج ضوئي لمدة سنتين ومثل المره اللي طافت تشافيت ولما قطعت العلاج الضوئي عشان مخاطره ع الجلد رجعت الصدفيه مثل ما كانت وورررحت لشيووخ كثير ورقآه واستخدمت زيوت مقري فيها وماي مقري وامي جابت عشبه مادري منين والله ما اتذكر بس اتذكر ان ريحتها ما تنطاق اطحنتها وحطت عليها ماي وحطتها على جسمي ولما حطتها ما قدرت اتحمل حرارتها وريحتها .. وقبل 3 سنين رحت حق عطار بالصدفه وطلبت منه علاج للصدفيه وعطاني كريم يقول انه بدون كورتيزون وانه طبيعي جدا استخدمته على اول الصيف وعطا نتيجه فعاله حيل خفت الصدفيه وراحت من ايديني ورجولي بس لما جا الشتا والجو البارد الناشف ردت طلعت كالعاده بهالفصل بقووووه .. والحين اكتب لكم وانا خانقتني العبره الحين على الله وعلى الدبريزون والالفا كورت وقطرة الشعر والشامبو البني اذا تعرفونه .. انا بصراحه توني اشوف منتداكم واستانست حيل حيل لا تسالوني ليش بس مادري يمكن حسيت اني مو شاذه مثل ما احس دايم بين الناس لا البس مثل البنات ولا اكشخ لاني احس جسمي مشوه يعني حتى لو لبست الناس تطالع تقول هذي شفيها اكيد فيها مرض خطير ويتحاشوني .. تكفون آزروني انا احس اني بنتكم او اختكم في هالمنتدى لا تخلوني ابي احد يرفع معنوياتي انا راضيه باللي كاتبه ربي ومؤمنه فيه لدرجه عندي احساس في يوم اني اقعد من النوم ما القى فيني ولاااااا شي لاني اعاني من الصدفيه ومن اثار العلاج الضوئي على جسمي للحين والصدفيه يمكن ماثره على نفسيتي لاني حيل عصبيه ... وعندي كم استفسار ابيكم تجاوبوني عليه:

اول شي انا لما يطلع لي اي جرح صغير او اي حبه شباب او حبه ناموس او تنجرح ايدي بسكين لما يتشافى الجرح يصير مكانه صدفيه انتو مثلي ولا لا؟؟؟

وثاني شي ابي اعرف عن خلطه الدهيميه وين فيه واي مكان بالسعوديه تكفون ساعدوني *

وثالث شي ابي اعرف شلون اشرب خل التفاح يعني اخففه بماي ولا لا او كم المقدار اللي احطه مع الماي ؟

لاتنطشوني على قولة واحد من اخواننا فالمنتدى تجمعنا قاسم مشترك هو العروبه والصدفيه

انا املي فيكم وبربي كبير كبير الله يشفينا ان شالله شفاءاً لا يغادر سقما