الله و يسلمك و يحفظك وزين انك ما تعرفين السالفه ولا كان الحين ( فلعتيني ) عموما حاولي تعلميني وش مسويه فيك الصدفيه بالضبط عشان الجميع يقدر يساعدك ومن ضمنهم شخصي الكريم .
شوفي الصدفيه لعبت فيني لعب راسي و وجهي واذني وحتى في الجفن والرموش و الاذاني وراحة الاقدام و الاظافر وكل مكان في جسمي واحس انواع الحساسية تجمعت فيني يوم وصلت استراليا زادت علي الصدفيه مره وطلعت اشياء ثانيه على سبيل المثال إذا تعرضت لأشعة الشمس أو كنت في مكان حار ولا فيه تهويه
أو بغيت أقوم بأي جهد عضلي أي كان أو فكرى أو إذا تعرضت
لموقف محرج أو كنت في أماكن مزدحمه أو شميت ريحة الدخان أو العطور أو حتى كربون السيارات جسمي كله من وجهي لين لين رجولي يصير فيه مثل الحبوب مثل الي في الصوره
طبعا هذي سببت لي غير الصدفيه قلق مو طبيعي لانها تجيني في اوقات الشخص الي قدامي مو فاهم وش قاعد يصير فيني وانا مو قادر اشرح له من التعب كل يوم تجيني في الجامعه لا صار عندي برزنتيشن و كذا مره جتني وانا اختبر او اسوي مقابله قسم بالله اني كنت اعرف الاجوبه لكن منها كنت اذب الورق ولا اترك المقابله واقوم او اقول للمدرس ما عرف شي عشان يقولي روح واطلع اغسل بماي بارد عشان تروح ولا اوقف عند المكيف لين تذلف وياليتها تتوقف ع الحبوب لا جت تجي معها حكه مو طبيعيه ولو ما غيرت المكان او غسلت بماي بارد تلتهب عيني و ولو استمريت ما غيرت مكاني ما عاد اقدر اتنفس ...
وبحثت عن هالحاله طلع شي اسمه الارتيكاريا ( الشري ) ونفس الصدفيه ما يدرون وش اسبابه ولا له علاج لكن ينصحون صاحبه بالجلوس في الاماكن البارده واجتناب الاماكن الحاره وقتها قلت وش هالحاله صدفيه و ارتيكاريا طبعا هي جتني قبل لا ابداء الأبر كان علاجي بس جلسات 3 ايام في الاسبوع على الاشعه وسحبت عليهم لاني كل ما ادخل الجهازحق الاشعه او المستشفى تجيني الحاله ولا اطيق نفسي وانحاش منهم وبعد سحبت على الجامعه وصارت حياتي بس ع السرير مقدر آكل ولا اقدر أطلع ولا اسوي شي لاني كل ما ابي اسوي شي تجيني وهي قسم بالله اوسخ من الصدفيه
المهم وهذا الاهم أول ما بديت الأبر قلت ما راح اترك خلطة الدريهميه ولا راح اترك حبوب بذرة الكتان خذت الأبره الأولى والحمدلله حسيت بتحسن كبير ورجع كل شي مثل ما كان بس بقت الحاله تجيني قلت يمكن الابره الثانيه تروح ولكن ما راحت وقتها لاحضت اني لا كليت حبوب بذرة الكتان تجيني واليوم الي ما اكل فيه الحبوب ما تجي . ذبيت حبوب الكتان وكل شي وقعدت ع الابر بس و الحمدلله بعدها ما عاد صارت تجيني مثل أول يمكن في الشهرين مره او مرتين وكل ما لي الاحظ انها انقلعت ولا عاد صارت تجيني والحمدلله بعد الابر اعراض الصدفيه كلها راحت مني واتمنى من الله ما ترجع لي يارب وآسف ع الإطاله بس فعلا كان لازم اذكر لك كل التفاصيل
الله يشفيك عاجلا قبل آجل ياحي يا قيوم يا من بيده كل شي اللهم شافها وعافها و اكتب لها شفاء لا يغادره سقم يا أرحم الراحمين