في الأسطر التالية : سأنقل لكم الحوار الذي دار بيني وبين زميلي الذي كنت أتحدث معه البارحة بالتفصيل ( أسأل الله جلت قدرته أن يجعل فيه الشفاء لمرضى السمكية أو السماك ) :
بداية الموضوع كانت بعد أن شاهد أحد زملائي بوادر الصدفية في وجهي فبادرني بقوله : سلامات وأنا أخوك وش فيك ؟ وش اللي في وجهك ؟
أنا : والله أبد ما فيه الا سلامتك وانا اخوك هذي يسمونها الصدفية الله يبعدها عني وعنك وعن كل مسلم ومسلمة .
هو : صدفية !! وش يعني صدفية ؟
أنا : الصدفية يا طويل العمر قشور تطلع في بعض المناطق على الجلد .
هو : وش سببها ؟
أنا : والله ياخوك مدري وكل يوم نسمع لها سبب .
هو : معدية هي ؟
أنا : اللي سمعته انها مهيب معدية .
هو : سبحان الله عاد تصدق وأنا أخوك ( على طاري هالصدفية ) ذكرتني بسالفتي مع بنيتي .
أنا : سلامات عسى ماشر ؟
وش فيها بنيتك ؟ عسى ما فيها صدفية الضعيفة ؟
هو : .. بنيتي الله يعطيك طولة العمر أول ما انولدت وبعد مرور شهر من ولادتها سبحتها امها هاك اليوم بشمبو اطفال معروف ومشهور وبعده قام جلدها يتقشر سبحان الله العظيم ويطلع في راسها قشرة على شكل قطعة وحدة و في باقي جسمها يديها وافخاذها على شكل صورة الهلال او القوس مع خشونة في الجلد .
أنا : لاحوووول ولا قوة الا بالله عسى مهيب السمكية ؟
هو : تجيك السالفة ... المهم واطمر بها يم مستشفى خاص وقالوا لي ان اللي فيها زي ما قلت انت ( السمكية ) وعلاجها انكم تستخدمون للشعر شامبو معين معروف بالقضاء على القشرة الصعبة والجسم يستخدم له مرهم كرتوزوني .
أنا : يا قليبي قليبها
كرتوزون !!! وعمرها شهر !!!!
هو : اي والله كرتوزون ،،، المهم أقولك وتتأزم حالة البنت واطمر بها مرتن اخرى لم مستشفى خاص آخر .
أنا : اسلم ... هها وبعدين وش اللي صار ؟
هو : الله يسلمك من كل شر اللي صار يا طويل العمر إن الطبيب شاف البنية وشاف المرهم الكرتوزوني اللي ندهنها به والشامبو وانهبلللللل !!!! وقال : حرام عليكم ما يصير اللي تسوونه في البنية وقفوا وقفوا كل هالاشياء عنها ،،، ابصرف لكم هالحين مرطب زين ما فيه كيماويات ولا كرتوزونات .
أنا : والله اني داري ... اجل كرتزونات
ما تحملوها الكبار بتتحملها هي يا قليبي قليبها
!!!
هو : الشكوى على الله وش يدرينا ،، عاد اقول لك وقفنا عنها مرهم الكرتوزون واستمرينا على هالمرطب اللي وصفه الطبيب الثاني ... ولكن مع الاسف ما فيه شي جديد ،، وبقى الوضع على ما هو عليه .
أنا : يا قليبي قليبها ... طيب وش سويت خليتها على ما هي عليه ؟والا وشلون ؟
هو : تجيك السالفة ... المهم سبحان الله وعلى قولة القايل : ( رب صدفة خير من ألف ميعاد ) وأنا اتمشى و معي عيالي في أحد الاماكن العامة شاف بنيتي رجل من الاخوة المصرييين وسألني من متى وحالة بنتك كذا ؟ يوم علمته انها على هالحال من يوم عمرها شهر . سألني مرة ثانية ( واتضح لي انه طبيب ) : وش نوع الحليب اللي ترضعه الحين ؟ وعلمته وش نوع الحليب ، فقال لي : وقفوا عنها هالحليب اللي ترضعه وابوصف لك حليب آخر ( خالي من البروتين ) وخلها ترضعه بدال حليبها اللي ترضعه الحين .
أنا : اسلم ... وش دخل الحليب والبروتينات ؟
هو : والله علمي علمك .
أنا : طيب بشر ؟ وش صار بعدين ؟
هو : ( وهو مبتسم ) استعملنا الحليب الخالي من البروتين و سبحان الله صارت المفاجأة اللي ما تخيلتها لا أنا ولا أمها !!
أنا : وش صار تكفى ؟؟؟ !!!
هو : أبشرك بعد رضاعتها الحليب الخالي من البروتين رجع جلدها سليم معافى 100 % وبدون مبالغة .
أنا : سبحان الله العظيم ... 100% آمنت بالله ... يعني طابت مرررة ؟
هو : اي والله طابت مرررة لكن البنت بعد ما كبرت شوي الظاهر انها كلت شي فيه بروتين ثم جا فيها بقعتين وحده في يدها والثانية في رجلها . وان شاء الله بيعافيها الله .
أنا : سبحان الله العظيم ... البروتين يسوي كذا ؟
هو : والله هذا اللي صار مع بنيتي وانا اخوك ، وتعرف انت عاد البروتين وش مصادره ( لحم - فول ... الخ ) .
**********
هذا الحوار نقلته كما هو لإخواني المصابين بداء السمكية أسأل الله جل وعلا أن يجعل في طياته الشفاء التام لهم وان يتمم نعمته على ابنة صديقي و عليكم وعلي وعلى جميع مرضى المسلمين آمين يارب العالمين .