السلام عليكم ورحمة الله وبركاته ،،
الاخوات "الانوار" "جودينا" "ام فرفورة" مشكورييييييين جدا على الدعوات الحلوة والله يشفي كل من عنده مريض يااااااااااااارب .
والشكر موصول لجميع الاخوة الي شاركو والي ردوا ، بارك الله في الجميع .
الاخت "ام فرفورة" ، ردا على تسائلك ، ابشرك ان المكان هناك هادي وآمن ومايخوف بس لزوم يكون معك رجل ، اماكن التمشية في على البحر مقاهي مفتوحة وحاطين كراسي وطاولات على البحر وبوفيهات مشروبات وفي مطاعم بس يعني المطاعم مو زي المدينة ، وفي حديقة كبيرة برضو قريبة من البحر عند شي يسمونه "الممشى" يعني شارع يتمشون فيه ويجلسون فيه ويسهرون للفجر ، القعدات في المقاهي حلوة وعائلات وشفت كثير عوائل خليجية هناك وجالسين عادي بعضهم بالحجاب وبعضهم بالنقاب ، بالنسبة للسكن ، انا سكنت في شقة ارضية مفصولة ومدخل بالحلها (غرفتين ومطبخ وصالة وغرفة سفرة) ونظيفة حيل ، كان مشكلتها الموية وكلمت صاحب البيت قبل لاجي القاهرة وقالي بترجع من القاهرة بتحصل خزان ثاني راكب ، عموما الجيران قالولي ان هذي الشقة حدها 2000جنية وانهم زودو السعر علي قلت مايخالف اول مرة محد يتعلم بلاش ، مكان الشقة بحي اسمه المساكن واقرب علامة له هو (مركز شباب سفاجة) هذا المركز مثل بيوت الشباب عندنا بالسعودية ، اذا جيتي من الغردقة ودخلتي سفاجة خليك على طول لاتروحي لا يمين ولا يسار بعد حوالي 500 متر بيصير مركز شباب سفاجة على يسارك ، حي المساكن هو البلوك الي بعد مركز الشباب ، البيوت فيها صغيرة بعضها دور واحد وبعضها دورين والشقة هي عبارة عن نص دور وكل دور له مدخلين منفصلين ، بعد مركز الشباب في شارع صحراوي وصيدلية على الزاوية اذا دخلتي يساب بعد المكز بتصير الصيدلية يمينك انا سكنت في نفس هذا الشارع ، عموما في بعد الصيدلية مغسلة على نفس خط المركز ثم بعدها يجي محل تصليح مكيفات ثم بعدها اول بقالة ، يعني لو ماندليتي على احد بتحصلي راعي البقالة يداوم بالنهار وزوجته تداوم في الليل اطلبي زوجته وطلبي منها تشوفلك شقة وقوليلها من الف الى الف وخمسمية زوجته محترمة وكانت ساكنة في السعودية وتقدري تعاملي معها ، بس برضو نصيحة لاتسكني من اول بيت تشوفيه ، انا ودي اعطيك ارقام تليفونات اصحاب الشقق هناك وبعض الي يسمونهم دليل سياحي والناس الي يساعدونك وتقدري تنسقي معهم قبل السفر تكوني مستأجرة وجاهزة بس مادري اذا اصحاب الموقع يسمحولي بكتبلك كل ارقام والي تبين (اتمنى من اصحاب الموقع يردوا علي) فهذا عمل خير .
الاخ "صابر وحامد" ، تسأل تقول وش يميز بحر سفاجة عن غيره ؟ والله ياخي انا ماعندي معلومات بالتركيبات لكن انا قريت عنها ان اشعة الشمس فوق البنفسجية اضعاف اي بحر ثاني والسبب ان المنطقة جبلية والجبال مسوية كأنها مصد للعواصف ولأتربة الي في الجو والي تسبب انكسار لأشعة الشمس اذا كانت الاتربة في الجو ، اما عن الموية بصراحة حسب تجربتي ، انا قريت ان ملحها كثييير ، لكن انا ساكن في الدمام وروح بحر الدمام بستمرار وبصراحة بحرنا اشد ملوحة بمراحل كثييييرة ، يعني اول مانزلت بحر سفاجة وذقت ملوحته مرررة عادية وحتى لما تدخل الموية لخشمك ابد مايصيرلك شي مو مثل عندنا تحس كن خشمك بينفقع من الملح ، لكن سبحان الله مويتهم تعالج اسرع ، بحر سفاجة صاااافي حيييييل ولا فيه اي تلوث في اماكن بتحصل فيها مرجان منتشر وبعضها رملية وكاثر الامكن بتحصل كنها مزروعة انجيل تحت الموية ، بس على فكرة انا فريت على الساحل من الغردقة لين سفاجة وكلهن نفس الطبيعة والشكل وكل القرى السياحية من الغردقة لين سفاجة تصلح للعلاج وهذا كلام اهل سفاجة ونت طالع من الغردقة بتحصل قرى سياحية كثيرة على يدك اليسار بس ترى سعرهم غالي مثل مينا فيل حول الخمسمية جنيه ، هذا الي اعرفه عن الموية اما تركيباتها مدري يبغالك مختبر ،
ونصيحة للي قرر يروح ياخذ معه (رواق) الرواق يعني قماش خيمة مركب عليه عصي خشب او عصي حديد وهذي نستخدمها في البحر عندنا تتثبت بالارض وتسوي ساتر كنها سور من ثلاث جهات وتصير الجهة لرابعة مفتوحة على البحر يعني بعد ماتطلع من البحر انسدح اخل الرواق وفصخ ملابسك مثل ماتبي وتقلب على كيفك ماحد حولك وخل ارتفاعه مناسب علشان بس ترتاح نفسيا ، وعادي تقدر تغلفه ببلاستيك او اصنعله شنطة قماش عند حقين الخيام وخل لها ممشك وحطها مع عفش الطيارة ، هذا اذا كان معك سيارة او نك سكنت قريب من البحر ، ولي مايقدر ياخذ روق يروح بعيد عن لمدينة بتجاه الغردقة في اماكن كثييير خالية مافيها احد .
بالنسبة للأكل صحيح في مطاعم بس يعني على مستوى قرية ، وبالنسبة للبقالات بصراحة اسعارهم اغلى من القاهرة وبعضهم يعتبرونك سايح ويعطوك اسعار سياحية ، المهم انا اخذت معي شنطة كبيرة مليانة اكل يكفينا من اسبوعين الى ثلاثة ، معلبات واشياء مثل كذا ولآلحين ماخلصت ، بالنسبة للحم كل محلات الجزارة يبيعون لحم بقر وعجل نااااادر تحصل خرفان ، حتى الدجاج يجيهم مبرد يحطونه في الفريزر ويثلجونه وسعر الدجاج اغلى من عندنا بالسعودية ، يعني الصحن فيه كيلو دجاد سعره من 20 - 25 جنيه ، انا اول مارحت سوق الخضار حصلت صعيدي معه تيوس وخرفان واسعارها حلوة ارخص من السعودية ، يبيعونها بالكيلو ، يعني يحط الخروف وهو حي على ميزان كبير وتدفع سعره بالكيلو ، سعر الكيلو للتيوس حول 25جنيه ، والخرفان 30 جنيه ، ابد انتعلك واحد وخله يذبحه ويقطعه حسب طلبك وحطه في الفريزر عندك بيكفيك شهر ، اما الاكلات الي تحبها خذها معك من السعودية او من اي بلد انت فيه ، والله انا اخذت كل شي حتى الرز والبهارات والشوربات ... الخ حتى جبن وزيتون اخذته معي ابد شنطتين كبار مواد غذائية وشنطتين ملابس ، والمرة الجاية باخذ معي رواق باذن الله .
ونصيحة مهمة الي ماعنده عزيمة وارادة لايروح ويتعب نفسه ، يعني الروحة للبحر مرتين في اليوم ومدة كل مرة حوالي 3 او اربع ساعات ثم رجعة للبيت واخذ حمام ودهان فازلين طبي ثم الصبح يتحمم مرة ثانية ويزيل الفازلين ويفركه بمنشفة لين يطلع ثم يروح البحر ..... الخ ، بصراحة مجهود كبييير وصعب ويهد الحيل ، يعني الي مافيه شدة على التعب يقعد في بيته اصرفله لأنه مارح يستفيد شي ويحاول يطبق هالشي في بلده او موية وملح في البيت بس اهم شي الشمس من غيرها بتكون النتايج ضعيفة حيييل .
عموما انا بعد 3 ايام برجع سفاجة وبكتب اسماء الشوارع واسماء المحلات الي هناك على ورقة وبكتبها لكم مرة ثانية للي ناوي يروح ،
واخر الكلام اتمنى من اصحاب الموقع يردوا علي بخصوص اني اكتب ارقام تليفونان الاماكن الي يقدروا يروحولها في سفاجة .
واتمنى لجميع الشفاء والسلامة ، وكل عام ونتوا بخير ورمضان كريم على الجميع بأذن الله .