[ايهاب العراقي]

المشاركة الأصلية كتبت بواسطة (hope)

السلام عليكم اخوي انا سجلت بالمنتدى بس لانه عندي معلومة مفيدة حابة انفعك فيها
انا سمعت عن ماي البحر مفيد وايد حق الصدفية (الاكزيما) مثل ما نسميها بالكويت بس صج شفت تجربة واقعية جدام عيني وحده من قرايبنا كانت معاها اكزيما ونصحوها انها تنقع بماي البحر لمدة ساعتين وداومة على هالطريقة اسبوعيا كل عطلة نهاية اسبوع تروح تسبح بالبحر والله اني قبل فترة شفتها وشفت جسمها اختفت البقع الحمراء اللي بجسمها + وحده مره كنت قاعدة اسمع برنامج في الراديو بالسيارة وكانت تقول حق المذيع ابي وقت شوي من البرنامج تبي تقول عن مشكلتها وعن الحل اللي فادها وشفاها منها وكانت الاكزيما ومن شدة فرحتها تبي تنفع كل اللي معاهم نفس المرض لانها عانت منه وتاذت وقالت انصحكم يا اخواني تاكلون كل يوم على الريج (تبدون يومكم) بملعقة عسل وحبة السودة او اللي تسمى بعد بحبة البركة
وانا بعد قريت عن فوايدهم وايد في علاج الامراض المختلفة واهم شي يا اخوي نفسيتك لازم يكون عندك ايمان بالله لانه اهو اللي بلاك بهالمرض واهو اللي بايده يشفيك وان كل ليل بعده نهار وان كل هم بعده فرج والله يشفيك ويشفي جميع مرضى المسلمين

اختي الكريمة هوب...الصدفية شي والأكزيما شي..هذا مرض وذاك مرض..صحيح يتشابهون بالشكل ..بس كل واحد مرض مختلف عن الثاني..يمكن انتي عبالج انهم نفس المرض..وشكر على المعلومة بالنسبة للبحر اي صحيح هو مفيد للصدفية اما العسل وحبة البركة فهذول يرفعون المناعة ممايؤدي الى زيادة المرض..لأن اغلب علاجات الصدفية تنزل المناعة مثل العلاجات الكيماوية والبايلوجية وغيرها وهناك مراهم ايضا مثل البروتوبك تعمل على نفس الشاكلة.
تحياتي ومشكورة على تسجيلج لغرض مساعدة اخوانج..الله محييج.