[ايهاب العراقي]

هلا اختي الكريمة..والله الحبوب اللي قالت عليه الأخت انوار مادري عنها مامستعملها بس بسألك الأخ قيس عنها وبردلك خبر.
والله ياختي الكريمة انا الصدفية ظهرت عندي يوم كان عمري 6 سنة. .والتهاب المفاصل ظهر عندي قبل 11 سنة يوم كان عمري 16 سنة وظهرت عندي وقتها التهابات في الركب والمفصل اللي يقع بين عظم الفخذ والحوض والرسغ الأيسر..ووقتها كتبلي الدكتور حبوب الكيماوي الميثوتركسيت..واختفت الصدفية والتهاب المفاصل لعدة شهور فقط الرسغ الأيسر لم يستجب للعلاج وبدأ المفصل بالتلف (اي الغضروف)وماقام يأثر فيه العلاج وفي سنة 2006 سويت عملية ازالة المفصل التالف (الرسغ الأيسر)واخذوا قطعة عظم من الحوض وثبتوها بالمفصل وثبتوا المفصل بالبلاتين المثبت بأربعة براغي اي ان الرسغ اصبح مثبت بالعظم والبلاتين لاحركة فيه..وشلت البلاتين والبراغي قبل 7 شهور تقريبا...وايضا قبل سنتين التهبت عندي اصابع اليد اليسرى خمستهم وصار تلف فيهم ايضا وعقد في المفاصل..والحمد لله على كل حال..وايضا اصبعين من اصابع القدم اليسرى صار فيهم التهاب..
انا كنت استعمل الميثو تركسيت لكن مو بشكل مستمر استعمله شهور واتركه شهور وايضا النيوتيجاسون بنفس الطريقة ومو بشكل مستمر..وحاليا استعمل علاج مثبط للمناعة اسمه سايكلوسبورين يشتغل على الأثنين الصدفية والتهاب المفاصل الصدفي..ولمن اوقف العلاجات وتزاد الصدفية وتغطي الجسم بالكامل 100 %اتصير عندي التهابات بالمفاصل والعظام والأربطة وانسجة الجسم وألام قوية نحتسبها عند الله.
على كل اختي الكريمة اني حالتي قوية جدا وتختلف عن اللي عندكم وان شاء انتي ماراح توصلين لهل درجة لأن صدفيتك اخف وراح تتشافين بأذن الله بعد حصولك على محلول قطران الفحم الحجري.
وهاي العلاجات الكيماوية اللي ذكرتهم اتسوي اعراض جانبية ولازم اتسوين تحاليل كل فترة حتى اتشيكين على وظائف الكبد والكلى ..الخ..والمناعة راح تنخفض اى درجة معينة ..بس عادي تعيشين حياتك طبيعية ومن دون اي ألام ..وانا بالنسبة لي عندما استعمل هذي العلاجات اسوي حجامة بين فترة واخرى حتى يتخلص الجسم من هذي السموم واخفف العبئ عن الكبد بالاضافة الى ازالة السموم والشوائب وكريات الدم الحمراء الهرمة واللي تسبب مشاكل في الجسم كلها تطلع اثناء اداء عملية الحجامة على منطقة الكاهل وفي وقتها الصحيح في فصل الربيع
تحياتي وتمنياتي لك بالشفاء