ملتقى الشفاء الإسلامي - مع الصدفيه 27 عاماً علاجاً ودواءاً

السلام عليكم ورحمة الله وبركاته ، وتحياتي للجميع ،
قريت بعض الاخوة والاخوات يستفسروا عن سفاجة ....؟

انا من الدمام ومصاب بالصدفية اكثر من 20 سنة ، ولما دخلت هذا المنتدا وقريت كلام السيد عبدالعال جزاه الله خير قررت اروح وحسم الموضوع ، لكن للأسف كان تخطيطي للسفر مو جيد ، لكن غامرت وخضت التجربة .

لي 10 ايام تقريبا في سفاجة وجيت انا والاهل كلهم بالطيران من الدمام- القاهرة - الغردقة ، ثم اخذنا تاكسي مخصوص (بيجو) من موقف التكاسي ورحنا سفاجة بعيدة عن الغردقة 60كيلو بـ60 جنيه ، وصلنا ودخنا بين هالعالم ، رحت قرية مينا فيل وكان السعر حول 1100 ريال لليوم الواحد علشان عايلة مكونة من 6 افراد يعني لازم غرفتين ، سعر الفرد الواحد لغير المصريين حول 400 ريال مع العلاج (العلاج يضيفون 20 جنيه لكل يوم) في طبيب مقيم يتابع حالتك كل يوم ، سعر الإقامة في مينا فيل للمصريين مع العلاج حوالي 190 جنيه ، حاولت فيهم يعطونا سعر المصريين بس ماطاعو وجبنا واسطات وبرضو مانفع ، عموما رحنا قرية العقبي وهي قريبة من البحر وهي عبارة عن مجمع سكني داخله وحدات سكنية صغيرة ، وكان سعر الوحدة غرفتين وصالة 1600جنيه بالشهر، لكن الغرف والصالة صغيرة حيل وماصلحت لنا ، قابلنا فيها ابن صاحب المجمع اسمه ابراهيم وكان صريح معنا وقال حنا مانعالج لكن كل الي يجونا عندهم صدفية ويجتمعون سوا ويروحون البحر سوا ونفسيتهم تكون حلوه وهم متجمعين مع بعض ويشجعون بعض ، عموما ماجازلنا المكان ورحنا سكنا في فندق الؤلؤة مؤقت ماشي حاله ونظيف ودورت شقق مفروشة ولقينا الاسعار تتراوح بين 800 جنيه الى 3000 جنيه بالشهر ، حسب بعدها عن البحر ونظافتها ، اخذنا شقة بـ3000جنيه بالشهر قريبة شوي من البحر ، لكن البحر القريب زحمه ولا تقدر تاخذ راحتك العالم زحمة في البحر وكنت اروح لمكان بعيد شوي مافيه احد على طريق (كيلو 8) بتجاه الغردقة في مبنى مهجور كان للجيش ونتقل وهذا المبنى قديم وماله سقف يعني مرة حلو للشمس تاخذ راحتك فيه على الآآآآآخر ، عموما في مواصلات اسمها (مكروباص) باصات صغيرة تدور في سفاجة من اولها لأخرها وسعر المشوار من ربع جنيه الى نص جنيه لأبعد مشوار يعني رخيص حيييل ،

ليي 10 ايام في سفاجة اول يومين اجتهدت ورحت البحر مرتين في الصباح والمساء وبعدها مافي شده ولا حيل صرت اروح مرة وحدة في اليوم ، طبعا قبل لا اروح البحر رت لـ مينا فيل وسويت كشف عند الطبيب المقيم وسعر الكشف 150جنيه ، واعطاني وش اسوي ، قالي كل يوم الصباح من الساعة 6 صباحا الى الساعة 7 في البحر ، ومن الساعة 7 الى الساعة 8 في الشمس ، والفترة الثانية من الساعة 4 عصرا الى الساعة 5 في البحر ، ومن الساعة 5 الى الساعة 6 في الشمس ، وقالي حالتك ماتحتاج اي تركيبات او خلطات فقط فازلين طبي ادهنه قبل النوم ثم الصباح اتروش وشيله وهذا كل شي .

عموما خلال العشر ايام مع اني مالتزمت في جدول الدكتور بس في اماكن راحت نهائي وفي اماكن خفت كثير وبعض الاماكن يادوب شوي تحسنت ، عموما انا اقتنعت ان بحر سفاجة مفيد للصدفية بس يبغاله واحد يلتزم .

توقيت الزيارة عندي ماكان منسق لكن حبيت اخوض التجربة وشوف ، انا من اول ماكنت ناوي اقعد شهر ، والسبب الثاني الي ياخذ عياله معه بيتعب بالذات اذا ماعنده ولد كبير يقوم بدوره وهو غايب ويخلص طلبات الاهل ، عموما انا تعبت حيل في هالعشرة ايام وقررت اروح القاهرة نفسح الاولاد 5 ايام ثم برجع ثاني لسفاجة اقعد فيها لين 20/8/2010 ثم ارجع للدمام .

عموما الي يبغى يروح بالحاله او معه زوجته بالحالها يكون احسن ، لكن الي عنده اربع اولاد وكلهم صغار مانصح ياخذهم معه دوخة راس يالله توفق بين روحتك للبحر ولا تخلص مقاضي البيت ومرح تضبط معك ، الا اذا سكن في فندك على البحر او في مينا فيل بس اسعارهم غالية ، يعني سعر الغرفة مزدوج حول 400 جنيه .
والي بياخذ شقة مفروشة اهم شي يتأكد ان خزان الموية كبير ويشرط على صاحب الشقة اذا انقطعت الموية عليه انه يوفرها وعلى حسابه ويحط عليه غرامة في العقد علشان يلتزم ، المويه هنا في سفاجة تجي كل 4 او 5 ايام مرة وحدة يعبون خزاناتهم في هاليوم وأكثر السكان مركبين خزانات كبيرة او اكثر من خزان علشان يكفيهم انقطاع الموية ، لكن الشقق المفروشة بتحصل بعضها خزان صغير والموية ماتمشيك يومين ولا هي قاطعة ، ولا في وايتات او سيارات موية تروح تشتري من برا علشان تعبي خزانك يبغالك واسطات علشان تلقى موية .

سفاجة عبارة عن قرية كبيرة وهادية وأمنة ولا فيها مشاكل وكلهم يعرفوا بعض .

لكن نصيحة الي بياخذ عياله معه يشحن سيارته من جده لسفاج ويروح طيران ثم يستلمها من سفاجة او يشحنها للغردقة احسن وينسق طيرانه انه يوصل ثاني يوم من وصول سيارته ويركبها ويروح سفاجه بسيارته ، لأن الي عنده سيارة يقدر يروح اي مكان براحته وفي اي وقت يبيه واي مواد غذائية مايلقاها في سفاجة يقدر يروح الغردقة كلها نص ساعة يشتري اي يبي ويعود لسفاجة ويقدر يفسح اولاده في الغردقة ويرجع بكل راحة ، لكن الي مامعه سيارة بيتعب حيييل .

عموما انا ان شاء الله ناوي ارجع السنة الجاية ان الله احيانا وبنسق زيارتي عدل قبل لاجي وانشاء الله يكتبلنا ولجميع الشفاء .
وكل الشكر لأصحاب الموقع وللسيد عبدالعال وللجميع ، وجزاكم الله خير ،،

السلام عليكم ورحمة الله وبركاته ،،

الاخوات "الانوار" "جودينا" "ام فرفورة" مشكورييييييين جدا على الدعوات الحلوة والله يشفي كل من عنده مريض يااااااااااااارب .

والشكر موصول لجميع الاخوة الي شاركو والي ردوا ، بارك الله في الجميع .

الاخت "ام فرفورة" ، ردا على تسائلك ، ابشرك ان المكان هناك هادي وآمن ومايخوف بس لزوم يكون معك رجل ، اماكن التمشية في على البحر مقاهي مفتوحة وحاطين كراسي وطاولات على البحر وبوفيهات مشروبات وفي مطاعم بس يعني المطاعم مو زي المدينة ، وفي حديقة كبيرة برضو قريبة من البحر عند شي يسمونه "الممشى" يعني شارع يتمشون فيه ويجلسون فيه ويسهرون للفجر ، القعدات في المقاهي حلوة وعائلات وشفت كثير عوائل خليجية هناك وجالسين عادي بعضهم بالحجاب وبعضهم بالنقاب ، بالنسبة للسكن ، انا سكنت في شقة ارضية مفصولة ومدخل بالحلها (غرفتين ومطبخ وصالة وغرفة سفرة) ونظيفة حيل ، كان مشكلتها الموية وكلمت صاحب البيت قبل لاجي القاهرة وقالي بترجع من القاهرة بتحصل خزان ثاني راكب ، عموما الجيران قالولي ان هذي الشقة حدها 2000جنية وانهم زودو السعر علي قلت مايخالف اول مرة محد يتعلم بلاش ، مكان الشقة بحي اسمه المساكن واقرب علامة له هو (مركز شباب سفاجة) هذا المركز مثل بيوت الشباب عندنا بالسعودية ، اذا جيتي من الغردقة ودخلتي سفاجة خليك على طول لاتروحي لا يمين ولا يسار بعد حوالي 500 متر بيصير مركز شباب سفاجة على يسارك ، حي المساكن هو البلوك الي بعد مركز الشباب ، البيوت فيها صغيرة بعضها دور واحد وبعضها دورين والشقة هي عبارة عن نص دور وكل دور له مدخلين منفصلين ، بعد مركز الشباب في شارع صحراوي وصيدلية على الزاوية اذا دخلتي يساب بعد المكز بتصير الصيدلية يمينك انا سكنت في نفس هذا الشارع ، عموما في بعد الصيدلية مغسلة على نفس خط المركز ثم بعدها يجي محل تصليح مكيفات ثم بعدها اول بقالة ، يعني لو ماندليتي على احد بتحصلي راعي البقالة يداوم بالنهار وزوجته تداوم في الليل اطلبي زوجته وطلبي منها تشوفلك شقة وقوليلها من الف الى الف وخمسمية زوجته محترمة وكانت ساكنة في السعودية وتقدري تعاملي معها ، بس برضو نصيحة لاتسكني من اول بيت تشوفيه ، انا ودي اعطيك ارقام تليفونات اصحاب الشقق هناك وبعض الي يسمونهم دليل سياحي والناس الي يساعدونك وتقدري تنسقي معهم قبل السفر تكوني مستأجرة وجاهزة بس مادري اذا اصحاب الموقع يسمحولي بكتبلك كل ارقام والي تبين (اتمنى من اصحاب الموقع يردوا علي) فهذا عمل خير .

الاخ "صابر وحامد" ، تسأل تقول وش يميز بحر سفاجة عن غيره ؟ والله ياخي انا ماعندي معلومات بالتركيبات لكن انا قريت عنها ان اشعة الشمس فوق البنفسجية اضعاف اي بحر ثاني والسبب ان المنطقة جبلية والجبال مسوية كأنها مصد للعواصف ولأتربة الي في الجو والي تسبب انكسار لأشعة الشمس اذا كانت الاتربة في الجو ، اما عن الموية بصراحة حسب تجربتي ، انا قريت ان ملحها كثييير ، لكن انا ساكن في الدمام وروح بحر الدمام بستمرار وبصراحة بحرنا اشد ملوحة بمراحل كثييييرة ، يعني اول مانزلت بحر سفاجة وذقت ملوحته مرررة عادية وحتى لما تدخل الموية لخشمك ابد مايصيرلك شي مو مثل عندنا تحس كن خشمك بينفقع من الملح ، لكن سبحان الله مويتهم تعالج اسرع ، بحر سفاجة صاااافي حيييييل ولا فيه اي تلوث في اماكن بتحصل فيها مرجان منتشر وبعضها رملية وكاثر الامكن بتحصل كنها مزروعة انجيل تحت الموية ، بس على فكرة انا فريت على الساحل من الغردقة لين سفاجة وكلهن نفس الطبيعة والشكل وكل القرى السياحية من الغردقة لين سفاجة تصلح للعلاج وهذا كلام اهل سفاجة ونت طالع من الغردقة بتحصل قرى سياحية كثيرة على يدك اليسار بس ترى سعرهم غالي مثل مينا فيل حول الخمسمية جنيه ، هذا الي اعرفه عن الموية اما تركيباتها مدري يبغالك مختبر ،

ونصيحة للي قرر يروح ياخذ معه (رواق) الرواق يعني قماش خيمة مركب عليه عصي خشب او عصي حديد وهذي نستخدمها في البحر عندنا تتثبت بالارض وتسوي ساتر كنها سور من ثلاث جهات وتصير الجهة لرابعة مفتوحة على البحر يعني بعد ماتطلع من البحر انسدح اخل الرواق وفصخ ملابسك مثل ماتبي وتقلب على كيفك ماحد حولك وخل ارتفاعه مناسب علشان بس ترتاح نفسيا ، وعادي تقدر تغلفه ببلاستيك او اصنعله شنطة قماش عند حقين الخيام وخل لها ممشك وحطها مع عفش الطيارة ، هذا اذا كان معك سيارة او نك سكنت قريب من البحر ، ولي مايقدر ياخذ روق يروح بعيد عن لمدينة بتجاه الغردقة في اماكن كثييير خالية مافيها احد .

بالنسبة للأكل صحيح في مطاعم بس يعني على مستوى قرية ، وبالنسبة للبقالات بصراحة اسعارهم اغلى من القاهرة وبعضهم يعتبرونك سايح ويعطوك اسعار سياحية ، المهم انا اخذت معي شنطة كبيرة مليانة اكل يكفينا من اسبوعين الى ثلاثة ، معلبات واشياء مثل كذا ولآلحين ماخلصت ، بالنسبة للحم كل محلات الجزارة يبيعون لحم بقر وعجل نااااادر تحصل خرفان ، حتى الدجاج يجيهم مبرد يحطونه في الفريزر ويثلجونه وسعر الدجاج اغلى من عندنا بالسعودية ، يعني الصحن فيه كيلو دجاد سعره من 20 - 25 جنيه ، انا اول مارحت سوق الخضار حصلت صعيدي معه تيوس وخرفان واسعارها حلوة ارخص من السعودية ، يبيعونها بالكيلو ، يعني يحط الخروف وهو حي على ميزان كبير وتدفع سعره بالكيلو ، سعر الكيلو للتيوس حول 25جنيه ، والخرفان 30 جنيه ، ابد انتعلك واحد وخله يذبحه ويقطعه حسب طلبك وحطه في الفريزر عندك بيكفيك شهر ، اما الاكلات الي تحبها خذها معك من السعودية او من اي بلد انت فيه ، والله انا اخذت كل شي حتى الرز والبهارات والشوربات ... الخ حتى جبن وزيتون اخذته معي ابد شنطتين كبار مواد غذائية وشنطتين ملابس ، والمرة الجاية باخذ معي رواق باذن الله .

ونصيحة مهمة الي ماعنده عزيمة وارادة لايروح ويتعب نفسه ، يعني الروحة للبحر مرتين في اليوم ومدة كل مرة حوالي 3 او اربع ساعات ثم رجعة للبيت واخذ حمام ودهان فازلين طبي ثم الصبح يتحمم مرة ثانية ويزيل الفازلين ويفركه بمنشفة لين يطلع ثم يروح البحر ..... الخ ، بصراحة مجهود كبييير وصعب ويهد الحيل ، يعني الي مافيه شدة على التعب يقعد في بيته اصرفله لأنه مارح يستفيد شي ويحاول يطبق هالشي في بلده او موية وملح في البيت بس اهم شي الشمس من غيرها بتكون النتايج ضعيفة حيييل .

عموما انا بعد 3 ايام برجع سفاجة وبكتب اسماء الشوارع واسماء المحلات الي هناك على ورقة وبكتبها لكم مرة ثانية للي ناوي يروح ،

واخر الكلام اتمنى من اصحاب الموقع يردوا علي بخصوص اني اكتب ارقام تليفونان الاماكن الي يقدروا يروحولها في سفاجة .

واتمنى لجميع الشفاء والسلامة ، وكل عام ونتوا بخير ورمضان كريم على الجميع بأذن الله .