عن القطران وصدفية الأظافر - لذوي الخبرة والتجارب السابقة

[صدافر]

السلام عليكم ورحمة الله وبركاته
سعدت جداً لإنضمامي لملتقاكم الطيب والمفيد , ملتقى الشفاء الإسلامي , حفظ الله جميع القائمين عليه
عندي إستفسارات عن صدفية أظافري وعلاجها.
أولاً : عن القطران :
1- التركيز :

ممكن حد يقدَّر لي تركيز القطران الذائب في المحلول في الصور هنا تقريباً كام % ؟
( الصور كلها في الألبوم بإسم "القطران" في بروفايلي هنا في المنتدي )


وهنا المنديل متشرب بالمحلول :

أنا بأستخدمه 3 مرات لضوافري يومياً- لتفادي التباطؤ في ظهور التحسن - علي أساس إنه 20%.
بس مش عارفة ليه مقارنة بالصور في الكتاب حاسّاه أخف ( لا تشكيكاً في المصدر.. لكن طموح لأفضل النتائج )
2- تكتلات زيتية :
ده إلي جانب وجود تكتلات زيتية.
مش عارفة .. هل المحلول في مرحلة مبكرة قبل الذوبان التام لكل المواد القابلة للذوبان ؟
هل أقدر أدَوِّبها - المادة الزيتية - فأستفيد بيها ؟ وللا ده آخرها ؟
محتاجة أكبر تركيز ممكن وأقوي مفعول للأظافر بحكم كونها الأبطأ والأعند .
أنا فاكرة إني قرأت في شرح لـ د/ أحمد ناصف ( هو مصدر القطران اللي بأستعمله ) هنا علي المنتدي – كان رأيه :
إنه مش شرط يكون (غير ذائب = غير مفيد)
بمعني تاني- ممكن تكون مواد ضارة أو غير مفيدة لكن ليها قابلية للذوبان في الكحول
والعكس .
يعني قابلية الذوبان لا تساوي بالضرورة قدرة علاجية أعلي .. ؟؟؟
ما مدي دقة الكلام ده بالنسبة للقطران ؟
لو إستعملت زيت القطران –المتراكم في المحلول- بين الإظافر أحيانا ( نسبته مش قليلة ) – أو حاولت .. هيكون ضار ( فرضاً تم إذابته وإمتصاصه ) ؟ لو مش ضار- إزاي الجسم ممكن يمتصه ؟
لما بأحاول امزجهم بالتقليب بأطراف أصابعي بيمتزجوا .. بس شوية ويرجعوا يتفككوا .. ويطفوا علي السطح الكحول الشفاف الخفيف جداً.
هل محتاج مثلاً بولي سوربات 80 ؟
وهي - بولي سوربات80- المادة اللي أعتقد د/ ناصف ما إستعملهاش ( بس هو فين نسأله )
سؤال محيرني.. بحكم إني إتجهت لإستعمال الزيوت للبشرة, ومعروف إنه ممكن نستفيد من مواد مفيدة في الزيوت الطبيعية بالتدليك علي البشرة لإمتصاصها .. ليه الكلام ده ما ينطبقش علي قطران الفحم الحجري – ولو مع نسبة إيثانول ؟
وللا هي مسألة إمتصاص أسرع ؟

4- تطاير سريع :
و ده - أفتكر- اللي بيورطني مع المادة الزيتية بسرعة .. سرعة التطاير .
فـ في حالة الضوافر أكيد بأستخدم نفس الكمية أكتر من مرة لوضع الأظافر بها - طبعا مع تغطية المحلول بعد الإستعمال - مش معقول هأرمي الباقي بعد كل إستعمال .
توقعت إن لتر ممكن يستمر معايا كتير- بالنظر لصغر مساحة الأظافر- و إني مش هأضطر أسافر تاني لكمية إضافية, لكن إتفاجأت بإستنزاف ملحوظ للمحلول في خلال يومين في الهوا - حرفياً .. بيتبخر .. فـتزيد كثافة المادة الزيتية.
أي إقتراح لحل المشكلة دي ؟
5- اللون :

هل القطران أنواع بتختلف درجات ألوانها ؟ فـ درجة لون المصري ( كما في الصور) = مائل للإصفرار, مش الإحمرار زي الكولا .. ده عادي ؟

أسئلتي كلها سببها الرئيسي طبيعة صدفية الأظافر العنيدة – البطيييئ تحسنها .
يعني ممكن أقضي شهور مش عارفة أنا ماشية صح وللا - بعد عذاب - غلطات بسيطة ممكن تضيع شهور تعب في الهوا .. مفيش إشارات ترشد مريض صدفية الأظافر , والسبب بُطء الإستجابة .
الوضع ضبابي – صعب جداً الربط بين السبب والنتيجة.
فـ يا ريت نصائح ذوي الخبرة
6- الأعراض :

- شد في الجلد وجفاف .
- حبوب في فروة الرأس (!!) بأستعمل القطران بس علي أصابع اليد. هل ممكن يكون له علاقة بحبوب فروة الأس ؟
مفيش حرقة أو حكة.
إيه الأعراض في صدفية الأظافر ؟
و إمتي ممكن ينتهي التدهور في الأظافر ؟
ثانياً : عن صدفية الأظافر :
1- بوادر إصابة الأظافر السليمة ؟
لاحظت ظهور تلون وردي للجلد تحت أطراف بعض الأظافر السليمة .. هل دي علامات بداية إصابتها بالصدفية ؟ يعني أبدأ أعالجها بالقطران ؟

أنا ما لاحظتش بداية إصابة الأظافر المنكوبة كانت إزاي – بس الأكيد إن الأظافر المصابة حالياً فيها تلون وردي للجلد تحت الأطراف المنسحبة للداخل ... تلون يليه دائماً إنفكاك الأظافر في نفس المكان .
زي كده :

تقعر عميق للداخل/ نحو الجذور .
بعدها بيبقي كده :


أبدأ علاجها بالقطران بإعتبارها بداية تصدف.. وللاّ أتجاهلها بإعتبارها مجرد هواجس ؟
2- الجذور الملتهبة :


الأظافر اللي صدفيتها في جوانب الجذور.. وبتزحف لتحتل الجذور بالعرض ومنابت الضافر,
دي علامات تمددها لإحتلال الخلايا المجاورة بتبدأ دايماً بإنتفاخها بإلتهاب مؤلم ( مش عارفة فيه داخلها صديد وللّا لأ ) وده للأسف اللي بيحصل دلوقتي.. القطران هيضرها ؟ أبعده عنها لغاية ما تهدأ ؟ رغم إنها نادر ما بتهدأ.
بأحس إن الأحماض ( خل, ليمون, .. ) بتهيجها .. رغم إني بستخدمهم كبديل طبيعي للصابون - كـ منظف × مطهر (مضاد بكتيريا و فطريات) × مقشر ( إزالة قشور الخلايا الميتة )
هل الكحول الطاغي ع المحلول هو اللي بيساهم في إلتهابها – زي الأحماض ؟ هل أنا محتاجة - تاني - نسبة قطران أعلي ؟
أتعامل مع صدفية الجذور دي إزاي ؟


3- الجوانتي (القفازات ) :
الكتاب كان فيه تحذير من لبس قفازات نايلون (مش عارفة أميز خام النايلون)
وكانت نظرة أ/ قيس العبيدي للتصرف ده من العضو إنه "إجتهاد" أو "مناورة" ثمارها سيئة
واللي فهمته إن فيه إعتقاد إن صاحب التصرف لبس القفازات للمساعدة علي إمتصاص القطران و زيادة مفعوله
افتكر السبب ببساطة – عن تجربة - إن ده الحل الوحيد لممارسة أبسط الأعمال اللي ما ينفعش نعملها غير بإيدينا :/ - زي الأكل مثلا أو تحضيره - من غير ما نسمم نفسنا, نوسخ كل اللي بنلمسه .. أو نضطر لغسل أي أثر للقطران بإستمرار .
أنا بأستعمل فوق القطران جوانتي بلاستيك ( الشفاف الطبي )

و فوقه ( غالباً - لو بأتعامل مع رطوبة ) جوانتي مطاط ( جوانتي مطبخ )

علي فترات متقطعة – غالباً لا تزيد مدة لبسهم كل مرة عن ربع ساعة متواصلة.
القطران بدأته من 10 أيام تقريباً .. أتصرف إزاي مع القفازات من غير ما أسبب أذي للجلد ؟
علماً إني مش لاقية جوانتيهات قطن + القطن غالباً هيمتص القطران ويمسحه .

[reem50]

طرح مفيد وواضح وباذن الله سوف تشفين فقط انا لم اجرب او اتعرف على القطران المصري في الواقع فقط من خلال الصور والنت وكل تجاربنا في العراق مع القطران البريطاني
وكل اسئلتك ممكن تشوفيها في الكتاب اللي بتوقيعي واي شيء غامض بعد كده راح نحاول نجاوب عليه وكل حسب خبرته واتمنى لك الشفاء التام باذن الله

[صدافر]

المشاركة الأصلية كتبت بواسطة reem50

وكل اسئلتك ممكن تشوفيها في الكتاب اللي بتوقيعي واي شيء غامض بعد كده راح نحاول نجاوب عليه وكل حسب خبرته واتمنى لك الشفاء التام باذن الله

شكراً أ/ فايزة

أنا فعلا قرأت الكتاب وأجاب عن الكتير اللي كنت عايزة أعرفه.

بمجهود حضرتك الوفي فيه .. و بحث أ/ قيس المتعمق الذي لا يرضي القشور, أنقذتوني من الكورتيزون وأجبرتوني علي الثقة بكم ومنتداكم .
حتي إني ما قررتش أستعمل مؤقتاً مرهم "ألوريد" إلا بعد تأكيد حضرتك علي إحتواءه علي نسبة قطران وخلوه من الكورتيزون.
رغم إني قلقانة من إقحامهم للكورتيزون في المرهم في أي وقت- فتجاهل ذكر وجود القطران أو كتابة محتوي 47 % من العلاج .. بيصعب الثقة فيهم أو في وجود خطوط حمراء في عرفهم للتلاعب بالمستهلك .. بالتالي كل ما أفكر أدعم القطران بإستعمال ألوريد معاه , بأنفض الفكرة عن بالي في ثواني.
فـ مفيش أهم من الصدق والشفافية, ده ببساطة اللي بيبني الثقة .

[صدافر]

أحب أضيف قلقي من حالة, أفتكر إنها أحد أعراض العلاج ( فـ واضح إنه بعد رد الأعضاء لا يسمح بالتعديل علي الموضوع )
1- حالياً بأشتكي من حالة حرقان في عيني ( أقوي من كل مرة ) بعد إستعمال القطران رغم إبعادي للأيدي عن مرمي العيون قدر الإمكان .. علماً إن عيوني دايماً حساسة حتي لأشعة الشمس.
الإحساس ده برضه لاحظته لما إستعملت مرهم "ألوريد" لمدة 10 أيام قبل إستعمال محلول القطران لكن المرة دي الحرقان في العين أقوي.
إيه الحكاية ؟ إزاي أعالج أو أتجنب الحرقان ده ؟
2- "حرقان" عند تلامس أي شئ مع بشرة وجهي ( أي شئ ما فيهوش أي أثر للقطران )
الحرقان في بشرة الوجه يستمر ثواني ويختفي .
إلي جانب بداية ظهورحبوب حمراء معدودة أشبه بلسعات الناموس شكلاً.. لكن أكبر قليلا حجماً.. إحداها ظهرت بجانب عيني واختفت .. الحبوب دي حاساها مختلفة عن حب الشباب القليل اللي بينشط عندي في فصل الصيف.
أيوة بشرة وجهي كانت دايماً حساسة , أبسط الإحتكاكات كانت بتسبب إحمرار خفيف , بس عمري ما حسيت فيها بالحرقان كدة, و من أقل لمسة .
هل لحبوب فروة الرأس أو الوجه علاقة بالمحلول ؟
الحال ده هيستمر كتير ؟ أقصد .. وجود تأثير العلاج في أي مكان إلا الأظافر المصابة.
أهدئ الأعراض دي إزاي؟

[ali_elsayed_10]

اولا بخصوص موضوع التركيذ سوف نترك الامر لمن جرب انواع اخري لكي يحكم علية
اما موضوع ان هترمي الكمية بعد الاستخدام فدة طبعا غلط بتطحطى كمية في اناء سطحى يكفي لغمس الاظافر ويكون لة غطاء يتقفل بعد ما تخلصى وبيستخدم مرة تانى ويفضل ميكوتش واسع قوي يعنى يكفي لغمس الاظافر اليد الواحدة وفي اوعية خاصة لحمامات الاظافر معرفش موجودة في مصر ولا لا
بس ممكن خلال عملية غمس الاظافر في القطران تغطي فتحت العلبة بكيس عشان القطران ميتبخرش
ولما تخلصى بتقفليها وتستخدمية تاني لحد ما الكمية تخلص

[ali_elsayed_10]

بخصوص الحبوب لو متاكدة ان الحبوب دي حبوب وليست صدفية يعنى حبوب حمراء زات رءوس فدي طبيعي وغالبا بتظهر في اماكن غير الاماكن المصابة ودي سببها القطران وبتسمي حبوب الشفاء

اما التحذير من لبس القفزات فهوا بسبب انها هعمل احتباس حراري للجسم مع القطران ووجود الايثانول قد يسبب حروق للجلد فكل القفزات واحد مش هيفرق النوع

اما لو حضرتك عايزة القطران موجود اكبر فترة على الاظافر وميتبخرش وممكن تلبسي القفزاتة علية فممكن تستخدي القطران المذاب في الفزلين ولكن ستكونين انت اول حالة تعالج الاظافر بالقطران المذاب بالفزلين

[ali_elsayed_10]

اما بخصوص ان حضرتك مصممة على استخدام تركيذ نسبة قطران اعلى فدة اعتقاد خاطء ومضر فتركيذ القطران اعلى من 20% غلط وغير مسموح طبي
اما بخصوص عيناكي والحرقان ممكن يكون من تبخر الايثانول فحاولى تغطي العبوة وقت غمس الاظافر واقعدي في مكان مفتوح جيد التهوية في بلكونة او ماشابة وبلاش يكون في نفس غرفة النوم

[صدافر]

شكرا أ/ علي علي ردود حضرتك.

المشاركة الأصلية كتبت بواسطة ali_elsayed_10

وفي اوعية خاصة لحمامات الاظافر معرفش موجودة في مصر ولا لا

هل الأوعية دي مجهزة بحيث تمنع تبخر الكحول ؟
لو كدة ممكن صورة أو وصف لها.

بس ممكن خلال عملية غمس الاظافر في القطران تغطي فتحت العلبة بكيس عشان القطران ميتبخرش
ولما تخلصى بتقفليها وتستخدمية تاني لحد ما الكمية تخلص

بأفكر في حاجة زي كدة بس
1- مش عارفة إزاي أعمل كدة الضبط من غير ما أسيب فتحات حول الأصابع تسمح بتبخر الهواء
أحكم غلق الكيس عند المعصم مثلاً ؟
2- الأخطر, هل وضع الأصابع مع المحلول بلا فتحات تهوية هيعمل إحتباس حراري زي اللي بيحصل مع الجوانتي ؟ ده اللي قالقني

بخصوص الحبوب لو متاكدة ان الحبوب دي حبوب وليست صدفية يعنى حبوب حمراء زات رءوس فدي طبيعي وغالبا بتظهر في اماكن غير الاماكن المصابة ودي سببها القطران وبتسمي حبوب الشفاء

ماعنديش صدفية جسم .. هي أكيد حبوب شفاء, عقبال الشفاء
مش عارفة, هي حبوب الصدفية مش بتكون بقشور ؟ وللا عادية ؟
ما أفتكرش هتبدأ تيجي لي في البشرة بعد ما بدأت العلاج
إلي جانب إنها وراثة في الأظافر- فــالمصدر اللي وارثاها منه (والدتي) لم تتعدي عندها حدود الأظافر.

بالمناسبة لو هأرفع تطورات لحالة الأظافر هنا - فـ حضرتك ليك كامل الحرية لإقتباسها وعرضها في الجروب للإستفادة .. لأني مش هأقدر أعرضها من أكونت غيري ع الفيس

اما التحذير من لبس القفزات فهو بسبب انها هعمل احتباس حراري للجسم مع القطران ووجود الايثانول قد يسبب حروق للجلد فكل القفزات واحد مش هيفرق النوع

طيب لو ماسيبناش القفازات علي القطران أكتر من 10 دقايق , و شيلناها للتهوية ؟ و فاصل ونواصل .. وهكذا
أفتكر كدة مايلحقش يحصل إحتباس حراري ولو في عز الصيف ؟ يلحق ؟
وطبعا لو غسلت آثار المحلول ألبسه براحتي .. مش كدة .

اما لو حضرتك عايزة القطران موجود اكبر فترة على الاظافر وميتبخرش وممكن تلبسي القفزات علية فممكن تستخدمي القطران المذاب في الفازلين

يعني المشكلة في الإيثانول مش القطران نفسه ؟
للأسف الفازلين إمتصاصه أبطأ - و الضوافر يومها بـ 20 سنة - علي عكس البشرة الحساسة .. فـ الفازلين أكفأ لها.

اما بخصوص عيناكي والحرقان ممكن يكون من تبخر الايثانول فـ اقعدي في مكان مفتوح جيد التهوية في بلكونة او ماشابة وبلاش يكون في نفس غرفة النوم

ده التفسير السليم .. فالحرقان كان بيبدأ بعد الإنتهاء من إستعمال المحلول و إنتقالي لغرفة مغلقة.
علم وينفذ , التهوية .

[ali_elsayed_10]

هقترح على حضرتك اقتراح ممكن تجربية بس معرفش حضرتك جبتى قطران مزاب بالفزلين ولا مجبتيش
شوفي هتدهنى الاظافر قطران مذاب بالفزلين وتلبسي الجونتى البلاستيك بتاع المطبخ عليها وتسبيها مع الفزلين اكبر فترة ممكن الا ازي حسيتى بحرقان او لم شيلى الجونتي لان زي ما قلتى القطران بالفزلين بطي فالقفازات البلاستك بتساعد على زيادة القطرة على الامتصاص

[ali_elsayed_10]

هل الأوعية دي مجهزة بحيث تمنع تبخر الكحول ؟
لو كدة ممكن صورة أو وصف لها.
لو دورتى على النت في جوجل قسم الصور اكتبي ( حمام اظافر ) هتلاقي صور لها ممكن تدبري نفسك بقة اي حاجة شبهها يعنى مثلا علب المحلول اللى بيتنقع فيها العدسات الاصقة بتاعت العينين
او ممكن علب مكعبات الثلج بتاعت الفريزي تظبطيها